ခတ္တမန္ဒူ၊ စက်တင်ဘာ ၅
တရုတ်-နီပေါနယ်စပ်ဒေသ၌ ဆိုးရွားသည့် ရေကြီးရေလျှံမှုဖြစ်ပွားပြီး တစ်ပတ်ကျော်အကြာတွင် နီပေါနိုင်ငံရှိ ရေအားလျှပ်စစ်စီမံကိန်းတစ်ခု၏ ဥမင်လိုဏ်ခေါင်းအတွင်း ပိတ်မိနေသူနှစ်ဦးကို အသက်ရှင်လျက် ကယ်ထုတ်နိုင်ခဲ့ကြောင်း သိရသည်။
ရေဘေးကြောင့် ရေအားလျှပ်စစ်စီမံကိန်းတည်နေရာမှာ ရွှံ့နွံများအောက် ဖုံးလွှမ်းသွားပြီး မူလအနေအထားကိုပင် ခွဲခြားရန်ခက်ခဲခဲ့သဖြင့် ကယ်ဆယ်ရေးအဖွဲ့များက ဂြိုဟ်တုပုံရိပ်များကို အသုံးပြု၍ တည်နေရာရှာဖွေကာ ကယ်ဆယ်ရေးလုပ်ငန်းများ ဆောင်ရွက်ခဲ့ရသည်။
ကယ်ထုတ်နိုင်ခဲ့သူများအနက် အသက် ၃၀ အရွယ် ဆန်ဂျေးဆားသည် ကျန်းမာရေးအခြေအနေ တည်ငြိမ်လျက်ရှိပြီး ကယ်ဆယ်ရေးသမားများနှင့် တွေ့ဆုံချိန်တွင် မည်သည့်နေ့ရက်သို့ ရောက်ရှိနေပြီဖြစ်ကြောင်း မေးမြန်းခဲ့သည်ဟု ဆိုသည်။
၎င်းသည် အခြားသူများ လွတ်မြောက်နိုင်ရန် ကူညီပေးနေစဉ် ဥမင်အတွင်း ပိတ်မိသွားခဲ့ခြင်းဖြစ်ပြီး ပိတ်မိနေစဉ်အတွင်း ဟိန္ဒူဘာသာမန္တန်များ ရွတ်ဆိုကာ စိတ်တည်ငြိမ်အောင် နေထိုင်ခဲ့ကြောင်း ပြောကြားသည်။
အခြားကယ်ထုတ်နိုင်သူ အသက် ၄၅ နှစ်အရွယ် ကာဘီရာ မဟာဂျန်မှာမူ ကျန်းမာရေးအခြေအနေ ဆိုးရွားနေပြီး ၎င်းတို့နှစ်ဦးစလုံးကို ဆေးရုံသို့ ပို့ဆောင်၍ ဆေးကုသမှုပေးထားသည်။
ယခုကဲ့သို့ နှစ်ဦးကို အသက်ရှင်လျက် ရှာဖွေကယ်ထုတ်နိုင်ခဲ့ခြင်းကြောင့် ပျောက်ဆုံးနေသူများအနက် နောက်ထပ် အသက်ရှင်ကျန်ရစ်သူများကို ရှာဖွေတွေ့ရှိနိုင်မည့် မျှော်လင့်ချက်များ မြင့်တက်လာခဲ့သည်။ ရေဘေးဖြစ်ပွားပြီးနောက် ရေအားလျှပ်စစ်စီမံကိန်းများရှိ လုပ်သားရာပေါင်းများစွာ ပျောက်ဆုံးနေကြောင်း သိရသည်။
အဆိုပါ ရေဘေးကြောင့် နီပေါနိုင်ငံဘက်တွင် သေဆုံးသူ ၁,၂၉၀ ကျော်ရှိလာပြီး တရုတ်နိုင်ငံဘက်တွင်လည်း အနည်းဆုံး ၃၁ ဦး သေဆုံးခဲ့ကြောင်း သိရသည်။ ထို့ပြင် နှစ်နိုင်ငံအတွင်း လူပေါင်း ၅,၅၀၀ ခန့် ပျောက်ဆုံးနေဆဲဖြစ်ကြောင်း သတင်းဖော်ပြချက်များအရ သိရသည်။
Ref: CNN