၂၀၂၅ ခုနှစ် နိုဝင်ဘာလ (၁၆) ရက်မှ (၃၀) ရက်အထိ ဝန်းကျင်လေထုအရည်အသွေး လေ့လာဆန်းစစ်၊ တိုင်းတာချက်များအရ တစ်နိုင်ငံလုံးတွင် လေထုအရည်အသွေး ကောင်းမွန်နေဆဲဖြစ်ကြောင်း ပတ်ဝန်းကျင်ထိန်းသိမ်းရေးဦးစီးဌာက ထုတ်ပြန်ထားသည်။
မြန်မာနိုင်ငံတစ်ဝန်းရှိ ဝန်းကျင်လေထုအရည်အသွေးအခြေ အနေအား လေ့လာဆန်းစစ်နိုင်ရန်အတွက် ပတ်ဝန်းကျင်ထိန်းသိမ်းရေးဦးစီးဌာနအနေဖြင့် ပြည်ထောင်စုနယ်မြေ/တိုင်း ဒေသကြီး/ ပြည်နယ်များရှိ သတ်မှတ် Sampling Point နေရာများတွင် ဝန်းကျင်လေထု အရည်အသွေးကို Environmental Perimeter Air Station (EPAS) – Haz-Scanner၊ Air Quality Monitoring Station (AQM-65)၊ Scentroid (SL – 50 Scential)၊ Aeroqual (Series – 500 Portable Air Quality Monitor)၊ AQMesh (Dust Analyzer – 1941150)၊ (Gas Analyzer – 1940150)၊ Portable Beta Attenuation Mass Monitor (BAM 1022)၊ Air Quality Monitoring Station (AQMS) နှင့် Continuous Particulate Monitor များအသုံးပြု၍ Particulate Matter 2.5 (PM2.5)၊ Particulate Matter 10 (PM10)၊ Sulphur Dioxide (SO2) ၊ Nitrogen Dioxide (NO2)၊ Ozone (O3) နှင့် Carbon Monoxide (CO) စသည့် အဓိက Parameter များကို ပုံမှန်တိုင်းတာပြီး လေ့လာဆန်းစစ်လျက်ရှိကြောင်း သိရသည်။
ထိုသို့တိုင်းတာချက်များအရ ပြည်နယ်တစ်ဝန်းရှိ မြို့နယ် (၂၇) မြို့နယ်တို့တွင် တိုင်းတာခဲ့ပြီး ရန်ကုန်မြို့တွင် ဗိုလ်တထောင်မြို့နယ်၊ သာကေတမြို့နယ်၊ တောင်ဒဂုံမြို့နယ်တို့၌ တိုင်းတာခဲ့ကြောင်းနှင့် လေထုအရည်အသွေးမှာ ကောင်းမွန်သည့် အနေအထားတွင်ရှိနေကြောင်း သိရသည်။
အမှုန်အမွှားပါဝင်မှု ပမာဏအနေဖြင့်မူ ပုဗ္ဗသီရိမြို့နယ်၊အမရပူရမြို့နယ်၊ အောင်မြေသာစံမြို့နယ်၊ ပုသိမ်ကြီးမြို့နယ်၊ ညောင်ဦးမြို့၊ ကျောက်ဆည်မြို့၊ ပြင်ဦးလွင်မြို့၊ မုံရွာမြို့၊ စစ်ကိုင်းမြို့၊ ကော့သောင်းမြို့၊ မော်လမြိုင်မြို့၊ သထုံမြို့၊ မုဒုံမြို့၊ ကျိုင်းတုံမြို့နှင့် တာချီလိတ်မြို့တို့တွင် အဝါရောင်အဆင့် (လက်ခံနိုင်သော လေထုအရည်အသွေးရှိသည့် အဆင့်) တွင် တည်ရှိလျက်ရှိကြောင်း သိရသည်။
လေထုအပူချိန်၊ လေတိုက်နှုန်း၊ လေတိုက်ခတ်ရာလမ်းကြောင်း၊ စိုထိုင်းမှု၊ မိုးရွာသွန်းမှုအခြေအနေ၊ မော်တော်ယာဉ်အသုံးပြုမှုအခြေအနေ၊ ပူပြင်းခြောက်သွေ့မှုကြောင့် ဖုန်မှုန့်ပျံ့လွင့်မှု၊ စက်ရုံများမှ ထုတ်လွှတ်အခိုးအငွေ့များ ထုတ်လွှတ်မှုအခြေအနေနှင့် ဝန်းကျင်လေထု အရည်အသွေးတိုင်းတာသည့်နေရာ အနီးဝန်းကျင် အခြေအနေတို့အပေါ်မူတည်၍ တိုင်းတာရရှိသည့် ဝန်းကျင်လေထုအရည်အသွေးရလဒ်များသည် ပြောင်းလဲမှုရှိနိုင်ကြောင်း ထုတ်ပြန်ချက်အရ သိရသည်။