ဘန်ကောက်၊ဒီဇင်ဘာ ၂၄
ထိုင်းနိုင်ငံ၏အစိုးရပိုင်စွမ်းအင်ကုမ္ပဏီ PTT လက်အောက်ရှိ ကုမ္ပဏီခွဲတစ်ခုသည် မြန်မာနိုင်ငံရှိ အကြမ်းဖက်မှုနှင့်မတည်ငြိမ်မှုများကြောင့် မြန်မာနိုင်ငံရှိရေနံသယ်ယူပို့ဆောင်ရေးနှင့် သိုလှောင်ရေးလုပ်ငန်းများအား ရပ်ဆိုင်းမည်ဖြစ်ကြောင်း ကုမ္ပဏီကကြေငြာခဲ့သည်။
အဆိုပါကုမ္ပဏီခွဲသည် မြန်မာနိုင်ငံကမ္ဘောဇအုပ်စုလက်အောက်ရှိ ယူနစ်တစ်ခုနှင့် ၂၀၁၉ ခုနှစ်တွင်ဖွဲ့စည်းခဲ့သည့် ဖက်စပ်လုပ်ငန်းဖြစ်သော Bright Energy ၌ ရှယ်ယာ ၃၅ ရာခိုင်နှုန်းပိုင်ဆိုင်ထားကြောင်းသိရှိရသည်။
ယခုကဲ့သို့ရပ်ဆိုင်းလိုက်ခြင်းသည် နော်ဝေအစိုးရ၏ Pension Fund Global မှ PTT နှင့်မြန်မာရှိ PTT လက်အောက်ခံကုမ္ပဏီနှစ်ခုလုံးအား ၎င်း၏ရင်းနှီးမြှုပ်နှံမှုအစုမှ ဖယ်ရှားလိုက်ကြောင်း ဒီဇင်ဘာ ၁၅ ရက်နေ့က ကြေငြာလိုက်မှုကြောင့်ဖြစ်သည်ဟုလည်းသိရှိရသည်။
“လူ့အခွင့်အရေးကိုလေးစားခြင်းသည် PTT Group ၏ အခြေခံအကျဆုံး ကျင့်ထုံးများထဲမှတစ်ခုဖြစ်ပြီး ၎င်းတို့အနေဖြင့် မြန်မာနိုင်ငံတွင်းရှိအခြေအနေများနှင့်ပတ်သက်၍ အလွန်စိုးရိမ်မိသည်” ဟုလည်း ကြေငြာချက်ထုတ်ပြန်ခဲ့သည်။
PTT ကုမ္ပဏီသည် မြန်မာနိုင်ငံရှိသဘာဝဓာတ်ငွေ့နယ်ပယ်အများစု၏ အကျိုးစီးပွားများကို ထိန်းချုပ်ထားပြီး ထုတ်ကုန်များအား ထိုင်းနိုင်ငံသို့တင်ပို့လျက်ရှိသည်။ထိုင်းနိုင်ငံသဘာဝဓာတ်ငွေ့သုံးစွဲမှု၏ ၁၅ ရာခိုင်နှုန်းသည် မြန်မာနိုင်ငံ၏ သဘာဝဓာတ်ငွေ့ဖြစ်သည်ဟုလည်း သိရှိရသည်။
မတ်လကပြင်သစ်၏ Total Energies က မြန်မာ့ရတနာဓာတ်ငွေ့လုပ်ကွက်မှ နှုတ်ထွက်သွားပြီးနောက် မြန်မာ၏ရေရှည်စွမ်းအင်ဖူလုံရေးအတွက် Total ၏ အစုရှယ်ယာအချို့အား PTTEP ကတာဝန်ယူမည်ဟုကြေငြာခဲ့သည်။
သို့သော်လည်း PTTEP သည် မြန်မာ့ရဲတံခွန်သဘာဝဓာတ်ငွေ့ပရောဂျက်အား ရပ်ဆိုင်းတော့မည်ဖြစ်ကြောင်း ဧပြီလကပြောကြားခဲ့သည်။အဆိုပါရဲတံခွန်ပရောဂျက်သည် နိုင်ငံတကာဝေဖန်မှုများကြောင့် ဆက်လက်အကောင်အထည်ဖော်ရန်မဖြစ်နိုင်တော့ဟုလည်းသိရှိရသည်။
Source : Nikkei Asia