နိုင်ငံအဆင့် ကွန်ပျူတာတွက်ချက်မှု ကွန်ရက်ကို အရှိန်မြှင့်‌ဖေါ်‌ဆောင်ရန် တရုတ်ဒုဝန်ကြီးချုပ် တိုက်တွန်း

ဟိုဟော့၊ မေလ ၁၈ ရက်

တရုတ်နိုင်ငံ ဒုတိယဝန်ကြီးချုပ် ဒင်းရွှေရှန်း က အရည်အသွေးမြင့်မားသော ဖွံ့ဖြိုးတိုးတက်မှုကို အားကောင်းမောင်းသန် အထောက်အကူပြုနိုင်ရန်အတွက် “နိုင်ငံတော်အဆင့် ပေါင်းစပ်ကွန်ပျူတာ တွက်ချက်မှုစွမ်းရည်ကွန်ရက်” တစ်ခု တည်ဆောက်ရန်နှင့် ယင်းကို စနစ်တကျ ထိရောက်စွာ အသုံးပြုနိုင်ရန် ပိုမိုအားကောင်းသည့် အဆင့်မြင့်စီမံကိန်းရေးဆွဲမှုနှင့် မဟာဗျူဟာမြောက် စီမံခန့်ခွဲမှုများ လိုအပ်ကြောင်း တိုက်တွန်းပြောကြားခဲ့သည်။

တရုတ်ကွန်မြူနစ်ပါတီဗဟိုကော်မတီ နိုင်ငံရေးဗျူရို အမြဲတမ်းကော်မတီဝင်လည်းဖြစ်သူ ဒုတိယဝန်ကြီးချုပ် ဒင်းသည် မကြာသေးမီက ပေကျင်းမြို့၊ ဟဲပေပြည်နယ်နှင့် အတွင်းမွန်ဂိုလီးယား ကိုယ်ပိုင်အုပ်ချုပ်ခွင့်ရဒေသများသို့ သွားရောက်ခဲ့သည့် ကွင်းဆင်းစစ်ဆေးရေးခရီးစဉ်များအတွင်း ယခုကဲ့သို့ ထည့်သွင်းပြောကြားခဲ့ခြင်း ဖြစ်သည်။

ပေကျင်းမြို့ရှိ အဓိက ကွန်ပျူတာဗဟိုဌာနနှင့် အတွင်းမွန်ဂိုလီးယားရှိ အရင်းအမြစ်စီမံခန့်ခွဲမှု ပလက်ဖောင်းများသို့ သွားရောက်စဉ်အတွင်း ဒင်းက ကွန်ပျူတာတွက်ချက်မှုစွမ်းရည်သည် နိုင်ငံတစ်ခု၏ ဘက်စုံအင်အားကို ပြသသည့် အရေးကြီးသော ညွှန်းကိန်းတစ်ခုဖြစ်ကြောင်း ပြောကြားခဲ့သည်။

၎င်းက တစ်ပြေးညီဖြစ်သော နိုင်ငံတော်အဆင့် ကွန်ပျူတာ တွက်ချက်မှုကွန်ရက်တစ်ခု ကို လျင်မြန်စွာ ပေါ်ထွက်လာစေရန်အတွက် ကွန်ပျူတာတွက်ချက်မှုဆိုင်ရာ ရရှိနိုင်မှုနှင့် လိုအပ်ချက် အကြား ဟန်ချက်ညီစေရန်၊ ထို့ပြင် ကွန်ပျူတာစနစ်နှင့် လျှပ်စစ်စွမ်းအင်စနစ်များ အကြား ဟန်ချက်ညီစေရန် အလေးထားလျက် ပေါင်းစပ်စီမံကိန်းများနှင့် စနစ်တကျ ဖွံ့ဖြိုးတိုးတက်မှုကို ဖော်ဆောင်ရန် တောင်းဆိုခဲ့သည်။

ထို့ပြင် ပြန့်ကျဲနေသော အရင်းအမြစ်များကို စုစည်းကာ မတူကွဲပြားသည့် လိုအပ်ချက်များကို ထိရောက်စွာ ဖြည့်ဆည်းပေးနိုင်ရန်အတွက် ကွန်ပျူတာစနစ် အသုံးပြုနိုင်မှုနှင့် တိကျစွာ ချိတ်ဆက်နိုင်မှုကို မြှင့်တင်ရန်၊ စောင့်ကြည့်စစ်ဆေးခြင်းနှင့် စီမံခန့်ခွဲခြင်းစွမ်းရည်များကို အားကောင်းမောင်းသန် လုပ်ဆောင်ရန် ၎င်းက အလေးအနက် ပြောကြားခဲ့သည်။ လအစဉ်အလာအန္တရာယ်များနှင့် ပေါ်ထွက်လာသည့် အန္တရာယ် အသစ်များ ရောယှက်နေသည့် ရှုပ်ထွေးသော အခင်းအကျင်းတွင် အခြေခံအဆောက်အဦ၊ မိုဒယ်များ၊ ဒေတာများနှင့် ကွန်ရက်များတစ်လျှောက် လုံခြုံရေးကို မြှင့်တင်ရန် လိုအပ်ပြီး ယင်းမှတစ်ဆင့် ကွန်ပျူတာစနစ်တစ်ခုလုံး၏ ကြံ့ကြံ့ခံနိုင်ရည်ကို မြှင့်တင်ရန် အရေးကြီးကြောင်း မီးမောင်းထိုးပြခဲ့သည်။

ဟဲပေပြည်နယ်နှင့် အတွင်းမွန်ဂိုလီးယားတို့ရှိ ထိပ်တန်းဆက်သွယ်ရေးနှင့် နည်းပညာကုမ္ပဏီကြီးများ လည်ပတ်နေသည့် အဓိက ဒေတာစင်တာတစ်ခုနှင့် စမတ်ကွန်ပျူတာစနစ် အဆောက်အအုံ နှစ်ခုသို့ သွားရောက်စဉ် ဒင်းက တရုတ်နိုင်ငံတွင် ကြွယ်ဝသော ဒေတာအရင်းအမြစ်များနှင့် ကျယ်ပြန့်သော အသုံးချမှုကဏ္ဍများ ရှိနေကြောင်း ပြောကြားခဲ့သည်။ ၎င်းက ဒစ်ဂျစ်တယ်နှင့် စမတ်ကျသော တိုးတက်မှု ၏ အခြေခံအုတ်မြစ်ကို ခိုင်မာစေရန်အတွက် ကွန်ပျူတာအခြေခံအဆောက်အဦး၊ မိုဒယ်အယ်လ်ဂိုရီသမ်များနှင့် ဒေတာပံ့ပိုးမှုတို့ကို ပေါင်းစပ်ညှိနှိုင်း ဆောင်ရွက်ခြင်းဖြင့် ယင်းအားသာချက်များကို အသုံးချရန် တောင်းဆိုခဲ့သည်။

လုပ်ငန်းကဏ္ဍ၊ ပညာရှင်အသိုင်းအဝိုင်း၊ သုတေသနနှင့် အသုံးချမှုကဏ္ဍတို့အကြား ပိုမိုအားကောင်းသော ပူးပေါင်းဆောင်ရွက်မှု ရှိရန် လိုအပ်ကြောင်း အလေးထားပြောကြားခဲ့ပြီး အဓိကနည်းပညာများတွင် အောင်မြင်မှုများ အရှိန်မြှင့်ဖော်ဆောင်ရန်၊ စံနှုန်းများနှင့် လုပ်ထုံးလုပ်နည်းများကို သန့်စင်ရန်နှင့် ပြည်တွင်းဖြစ် ဟာ့ဒ်ဝဲနှင့် ဆော့ဖ်ဝဲလ်များကို “အသုံးပြုရုံသက်သက်” အဆင့်မှသည် “အလွန်ထိရောက်မှုရှိသော” အဆင့်သို့ အမြန်ဆုံး ကူးပြောင်းနိုင်ရန် တိုက်တွန်းခဲ့သည်။

ထို့ပြင် ဝန်ဆောင်မှုပုံစံများကို ဆန်းသစ်တီထွင်ရန်နှင့် ကွန်ပျူတာတွက်ချက်မှုစွမ်းရည်ကို ပိုမိုထိရောက်၊ လက်လှမ်းမီပြီး အသုံးပြုရလွယ်ကူစေရန်အတွက် ဈေးကွက်ကို အခြေခံပြီး အသုံးချမှုကို ဦးတည်သည့် ချဉ်းကပ်မှုမျိုးကို လုပ်ဆောင်ရန် တောင်းဆိုခဲ့သည်။

လေအားနှင့် နေရောင်ခြည်စွမ်းအင် ကြွယ်ဝပြီး အစိမ်းရောင်လျှပ်စစ်စွမ်းအင် မြင့်မားစွာရရှိသည့် အတွင်းမွန်ဂိုလီးယားရှိ ဒေသတွင်း လျှပ်စစ်ဓာတ်အားလိုင်း အော်ပရေတာတစ်ခုနှင့် ကာဗွန်ဓာတ်ငွေ့ထုတ်လွှတ်မှုမရှိသော ကွန်ပျူတာအခြေစိုက်စခန်းသို့ သွားရောက်စဉ် ဒင်းက ကွန်ပျူတာစနစ်များမှ မြင့်တက်လာသော စွမ်းအင်လိုအပ်ချက်များသည် စွမ်းအင်ခွဲဝေမှုနှင့် အခြေခံအဆောက်အဦး ဖွံ့ဖြိုးတိုးတက်မှုတို့အကြား ပိုမိုကောင်းမွန်သော ပေါင်းစပ်ညှိနှိုင်းမှု လိုအပ်ကြောင်း အလေးပေးပြောကြားခဲ့သည်။

Ref ဆင်ဟွာ