နိုင်ငံရေးသမား ၁၀ ဦးကို ကျားဖြန့်၊ လောင်းကစား၊ မူးယစ်နှင့် ဆက်နွှယ်မှုဖြင့် ထိုင်းရဲစုံစမ်းစစ်ဆေးနေ

ဘန်ကောက်၊ ဇန်နဝါရီလ ၉

ကျားဖြန့်လုပ်ငန်းများ၊ အွန်လိုင်းလောင်းကစားကွန်ရက်များနှင့် မူးယစ်ဆေးဝါးမှောင်ခိုမှုများတွင် ပါဝင်ပတ်သက်သည်ဟု သံသယရှိရသော ထိုင်းနိုင်ငံရေးသမားများနှင့် အမတ်ဟောင်း ၁၀ ဦးထက်မနည်းကို စုံစမ်းစစ်ဆေးနေပြီး မကြာမီ ဖမ်းဆီးနိုင်ဖွယ်ရှိကြောင်း တရားရေးဝန်ကြီး ဒုတိယရဲဗိုလ်ချုပ်ကြီး ရုထာဖုန်း နဝရတ် က ကြာသပတေးနေ့တွင် ပြောကြားခဲ့သည်။

ယခင် ပြည်သူ့ပါတီ (ပီပီ) အမတ်ဟောင်း ရန်စီမန်ရုန်း၏ အစိုးရသည် ကျားဖြန့်ဂိုဏ်းများနှင့် တရားမဝင်လောင်းကစားကွန်ရက်များကို နှိမ်နင်းရန် ပျ-က်ကွက်နေပြီး “အမှောင်စီးပွားရေးလုပ်ငန်းများ” ကို နိုင်ငံရေးသြဇာလွှမ်းမိုးလာအောင် ခွင့်ပြုထားသည်ဟူသော စွပ်စွဲချက်ကို ဝန်ကြီးက တုံ့ပြန်ပြောကြားခဲ့ခြင်းဖြစ်သည်။ ဒုတိယရဲဗိုလ်ချုပ်ကြီး ရုထာဖုန်းက ဆိုက်ဘာရဲတပ်ဖွဲ့အပါအဝင် သက်ဆိုင်ရာဌာနများသည် အဆိုပါတရားမဝင်လုပ်ငန်းများကို အစဉ်တစိုက် စုံစမ်းစစ်ဆေးလျက်ရှိပြီး ဆက်နွှယ်မှုရှိသည့် ရွေးကောက်ပွဲဝင်ကိုယ်စားလှယ်လောင်းများနှင့် အမတ်ဟောင်းများကို ပူးပေါင်းစစ်ဆင်ရေးများဖြင့် မကြာမီ အရေးယူသွားမည်ဟု ဆိုသည်။

“ရရှိထားတဲ့ အချက်အလက်တွေအရ နိုင်ငံရေးသမား ၁၀ ဦးခန့်ဟာ အွန်လိုင်းလောင်းကစားဝက်ဘ်ဆိုဒ်တွေနဲ့ ကျားဖြန့်လုပ်ငန်းတွေမှာ ပတ်သက်နေတာ တွေ့ရပါတယ်” ဟု ဝန်ကြီးက ပြောကြားခဲ့သည်။

အများပြည်သူထံ တိတိကျကျဖြင့် အခြေအနေတိုးတက်မှုကို တင်ပြနိုင်ရန်အတွက် ဆိုက်ဘာရဲတပ်ဖွဲ့၊ ထိုင်းနိုင်ငံတော်ရဲတပ်ဖွဲ့နှင့် အထူးစုံစမ်းစစ်ဆေးရေးဦးစီးဌာန (ဒီအက်စ်အိုင်) တို့မှ အချက်အလက်များကို ပေါင်းစပ်ပြီး အသေးစိတ် စုံစမ်းစစ်ဆေးသွားမည်ဟုလည်း ၎င်းက ဖြည့်စွက်ပြောကြားခဲ့ပါသည်။

ယခင်ဆွေးနွေးပွဲတွင် ဤကဲ့သို့သော အမှုတွဲများမရှိဟု ငြင်းဆိုသည့်သဘောမျိုး အထင်မှားစေခဲ့သည့် ၎င်း၏ ပြောကြားချက်နှင့်ပတ်သက်၍လည်း ဝန်ကြီးက ရှင်းပြခဲ့ပါသည်။

လတ်တလော ဆိုက်ဘာရဲတပ်ဖွဲ့အစည်းအဝေးတွင် မူးယစ်ဆေးဝါးနှင့် ဆက်နွှယ်သော နိုင်ငံရေးသမားများအကြောင်း ဆွေးနွေးခဲ့ခြင်း ရှိ၊ မရှိ သတင်းထောက်တစ်ဦးက မေးမြန်းခဲ့ရာ အဆိုပါဆွေးနွေးပွဲတွင် မူဝါဒပိုင်းကိုသာ အဓိကဆွေးနွေးခဲ့သဖြင့် ယခုကိစ္စကို ထည့်သွင်းမပြောခဲ့ခြင်းဖြစ်ကြောင်း ရှင်းပြခဲ့သည်။

“ဒါကြောင့် ကျွန်တော်က နိုင်ငံရေးသမားတွေဟာ မူးယစ်ဆေးဝါး ဒါမှမဟုတ် အွန်လိုင်းလောင်းကစားမှာ မပတ်သက်ဘူးလို့ ပြောနေသလိုမျိုး အထင်အမြင်တွေ ဖြစ်သွားခဲ့ပုံရပါတယ်၊ တကယ်တော့ အဲ့ဒီလိုမဟုတ်ပါဘူး” ဟု ၎င်းက ဆိုသည်။

ဝန်ကြီး၏ ပြောကြားချက်များနှင့် ပတ်သက်၍ ရန်စီမန်ရုန်းက ဖေ့စ်ဘွတ်ခ်စာမျက်နှာပေါ်တွင် ရေးသားရာ၌ ဝန်ကြီး၏ မှတ်ချက်များသည် အစိုးရ၏ အုပ်ချုပ်ရေးညံ့ဖျင်းမှုနှင့် ရာဇဝတ်ဂိုဏ်းနှင့် ဂိုဏ်းသားများ နိုင်ငံရေးအတွင်းသို့ ထိုးဖေ-ာက်ဝင်ရောက်လာမှုကို မတားဆီးနိုင်ခြင်းကို ထင်ဟပ်နေကြောင်း ပြန်လည်ဝေဖန်ခဲ့သည်။

Ref: ဗန်ကောက်ပို့စ်