မြန်မာနိုင်ငံတွင်းရှိ အာမခံစျေးကွက်တွင် ရာနှုန်းပြည့် နိုင်ငံခြားသားပိုင် အသက်အာမခံကုမ္ပဏီများ အပါအဝင် အာမခံကုမ္ပဏီ (၂၇)ခုမှ အာမခံဝန်ဆောင်မှုများ ဆောင်ရွက်ပေးနေကြောင်း မြန်မာ့အာမခံလုပ်ငန်း၏ အချက်အလက်အရ သိရသည်။
မြန်မာနိုင်ငံ၏ အာမခံစျေးကွက်တွင် ရာနှုန်းပြည့် နိုင်ငံခြားသားပိုင် အသက်အာမခံကုမ္ပဏီ ငါးခု၊ ဖက်စပ် အသက်အာမခံကုမ္ပဏီ သုံးခု၊ နိုင်ငံသားပိုင် အသက်အာမခံကုမ္ပဏီ ကိုးခု၊ ဖက်စပ် အထွေထွေ အာမခံကုမ္ပဏီ သုံးခု၊ နိုင်ငံသားပိုင် အထွေထွေအာမခံကုမ္ပဏီ ခြောက်ခုနှင့် မြန်မာ့အာမခံလုပ်ငန်း အပါအဝင် အာမခံကုမ္ပဏီ ၂၇ ခုမှ အာမခံဝန်ဆောင်မှုများကို ဆောင်ရွက်ပေးလျက်ရှိကြောင်း သိရသည်။
လက်ရှိ ပုဂ္ဂလိကအာမခံကုမ္ပဏီများမှ အာမခံအမျိုးအစား (၄၂) မျိုးကို ဝန်ဆောင်မှုပေးလျက်ရှိကြောင်းနှင့် အာမခံလုပ်ငန်းကြီးကြပ်ရေးအဖွဲ့အနေဖြင့် အာမခံကုမ္ပဏီများက အဆိုပြုတင်ပြလာကြသော အသက်အာမခံနှင့် အထွေထွေအာမခံ အမျိုးအစားသစ်များကို ဥပဒေ၊ စည်းမျဉ်းစည်းကမ်းများနှင့်အညီ စိစစ်ခွင့်ပြုပေးလျက်ရှိကြောင်း မြန်မာ့အာမခံလုပ်ငန်းမှ သိရသည်။
အာမခံလုပ်ငန်းကြီးကြပ်ရေးအဖွဲ့အနေဖြင့် ပုံမှန်အစည်းအဝေးများကျင်းပ၍ အာမခံလုပ်ငန်းလုပ်ကိုင်ခွင့် ဥပဒေ၊ နည်းဥပဒေများနှင့်အညီ အာမခံအမျိုးအစားသစ်များ လုပ်ကိုင်ခွင့်ပြုခြင်း၊ အာမခံကိုယ်စားလှယ် လုပ်ကိုင်ခွင့်လိုင်စင် ခွင့်ပြုပေးခြင်းအပြင် အထွေထွေအာမခံကုမ္ပဏီများအနေဖြင့် ရခိုင်ပြည်နယ်တွင် မိုခါမုန်တိုင်းဖြစ်ပွားမှုကြောင့် မီးအာမခံနှင့် မော်တော်ကား အာမခံများအတွက် အာမခံလျော်ကြေး ပေးချေမှုများလည်း ဆောင်ရွက်ခဲ့ကြကြောင်း သိရသည်။
ထို့ပြင် တောင်သူလယ်သမားများအတွက် လိုအပ်သည့် သီးနှံအာမခံ ထားရှိနိုင်ရေးအတွက် မြန်မာ့အာမခံလုပ်ငန်းက ဆောင်းစပါးသီးနှံအမီ ပေါ်လစီရေးဆွဲ ဆောင်ရွက်လျက်ရှိကြောင်း၊ သီးနှံများကြိတ်ခွဲပြီး သယ်ယူသည့်အခါတွင်လည်းကောင်း၊ သိုလှောင်သည့်အခါတွင်လည်းကောင်း လိုအပ်သည့် အာမခံအကာအကွယ်များဖြစ်သည့် မီးအာမခံ၊ သယ်ယူပို့ဆောင်ရေးနှင့် သက်ဆိုင်သည့် အာမခံအကာအကွယ်များကိုလည်း အာမခံကုမ္ပဏီများမှ ရောင်းချပေးလျက်ရှိကြောင်း မြန်မာ့အာမခံလုပ်ငန်းမှ သိရသည်။
Photo Credit- MOPF
