ဟနွိုင်း၊ စက်တင်ဘာ ၅
ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်နှင့်အတူ ဗီယက်နမ်ဆိုရှယ်လစ်သမ္မတနိုင်ငံသို့ နိုင်ငံတော်အဆင့် တရားဝင်ချစ်ကြည်ရေးခရီးစဉ် (Official Visit) အဖြစ် ရောက်ရှိနေသည့် နိုင်ငံတော်သမ္မတ၏ဇနီး ဒေါ်ကြူကြူလှသည် ယနေ့နံနက်ပိုင်းတွင် ဟနွိုင်းမြို့ရှိ Van Phuc ပိုးထည်ရွာ (Silk Village) သို့ သွားရောက်လေ့လာခဲ့သည်။
ဦးစွာ နိုင်ငံတော်သမ္မတ၏ဇနီး ဒေါ်ကြူကြူလှ Van Phuc ပိုးထည်ရွာသို့ ရောက်ရှိရာ ဗီယက်နမ်ဆိုရှယ်လစ်သမ္မတနိုင်ငံ သမ္မတ၏ဇနီး မဒမ် ငိုဖုန်လီနှင့် ပိုးထည်ရွာမှ တာဝန်ရှိသူများက ရင်းနှီးနွေးထွေးစွာ ကြိုဆိုနှုတ်ဆက်ကြသည်။
ထို့နောက် နိုင်ငံတော်သမ္မတ၏ဇနီး ဒေါ်ကြူကြူလှသည် ဗီယက်နမ်နိုင်ငံ သမ္မတ၏ဇနီးနှင့်အတူ Van Phuc ပိုးထည်ရွာအတွင်း လှည့်လည်ကြည့်ရှုလေ့လာရာ တာဝန်ရှိသူများက ဗီယက်နမ်ရိုးရာ ပိုးထည်ယက်လုပ်ခြင်းဆိုင်ရာ လုပ်ငန်းအဆင့်ဆင့်၊ ရိုးရာရက်ကန်းပညာရပ်များနှင့် ပိုးထည်ထုတ်လုပ်မှုလုပ်ငန်းစဉ်များကို လိုက်လံရှင်းလင်းပြသကြသည်။
ယင်းနောက် နိုင်ငံတော်သမ္မတ၏ဇနီး ဒေါ်ကြူကြူလှနှင့် ဗီယက်နမ်နိုင်ငံ သမ္မတ၏ဇနီး မဒမ် ငိုဖုန်လီတို့သည် ပိုးထည်ရွာအတွင်း ခင်းကျင်းပြသထားသည့် ဗီယက်နမ်ရိုးရာ ပိုးထည်အမျိုးမျိုးနှင့် ရိုးရာလက်မှုပညာပစ္စည်းများကို လှည့်လည်ကြည့်ရှုခဲ့ကြသည်။
Van Phuc ပိုးထည်ရွာသည် ဗီယက်နမ်နိုင်ငံ၏ ထင်ရှားသည့် ရိုးရာပိုးထည်ယက်လုပ်ရာ ကျေးရွာများအနက် တစ်ခုဖြစ်ပြီး ပိုးထည်ယက်လုပ်သည့် ရိုးရာအမွေအနှစ်မှာ နှစ်ပေါင်း ၁၀၀၀ ကျော် သက်တမ်းရှိကာ ဗီယက်နမ်ရိုးရာရက်ကန်းလုပ်ငန်း၏ အရေးပါသည့် ယဉ်ကျေးမှုအမွေအနှစ်တစ်ရပ်အဖြစ် ထိန်းသိမ်းထားရှိသည်။
အဆိုပါ ပိုးထည်ရွာတွင် ပိုးမွေးမြူခြင်းမှစတင်၍ ပိုးချည်မျှင်ထုတ်လုပ်ခြင်း၊ ချည်မျှင်ပြင်ဆင်ခြင်း၊ ရိုးရာရက်ကန်းစင်များဖြင့် ယက်လုပ်ခြင်း၊ အရောင်ဆိုးခြင်းနှင့် ပိုးထည်အချောထည်များ ထုတ်လုပ်ခြင်းအထိ လုပ်ငန်းအဆင့်ဆင့်ကို လေ့လာနိုင်သည့်အပြင် ရိုးရာလက်မှုပညာရှင်များက ရက်ကန်းပညာကို မျိုးဆက်အလိုက် လက်ဆင့်ကမ်းထိန်းသိမ်းလာပုံနှင့် ရိုးရာလက်မှုပညာကို ခရီးသွားလုပ်ငန်းနှင့် ချိတ်ဆက်ဖွံ့ဖြိုးဆောင်ရွက်ထားမှုတို့ကိုလည်း လေ့လာနိုင်သည်။
ထို့ပြင် Van Phuc ပိုးထည်ရွာသည် ဗီယက်နမ်ရိုးရာပိုးထည်လုပ်ငန်း၏ သမိုင်းကြောင်း၊ ရိုးရာရက်ကန်းပညာနှင့် လက်မှုပညာအမွေအနှစ်များကို ထိန်းသိမ်းဖော်ထုတ်ထားသည့် ထင်ရှားသော ယဉ်ကျေးမှုအမွေအနှစ်နေရာတစ်ခုလည်း ဖြစ်သည်။
ဆက်လက်၍ ဗီယက်နမ်နိုင်ငံ သမ္မတ၏ဇနီး မဒမ် ငိုဖုန်လီက နိုင်ငံတော်သမ္မတ၏ဇနီး ဒေါ်ကြူကြူလှအား ဗီယက်နမ်ရိုးရာရေနွေးကြမ်းဖြင့် တည်ခင်းဧည့်ခံခဲ့ပြီး ခင်မင်ရင်းနှီးစွာ စကားပြောဆိုခဲ့ကြသည်။
ယင်းနောက် နိုင်ငံတော်သမ္မတ၏ဇနီး ဒေါ်ကြူကြူလှနှင့် Van Phuc ပိုးထည်ရွာမှ တာဝန်ရှိသူတို့သည် အမှတ်တရလက်ဆောင်ပစ္စည်းများ အပြန်အလှန်ပေးအပ်ခဲ့ကြသည်။
နိုင်ငံတော်သမ္မတ၏ဇနီး ဒေါ်ကြူကြူလှသည် Van Phuc ပိုးထည်ရွာအတွင်း လှည့်လည်ကြည့်ရှုလေ့လာပြီးနောက် ပြန်လည်ထွက်ခွာရာ ဗီယက်နမ်နိုင်ငံ သမ္မတ၏ဇနီး မဒမ် ငိုဖုန်လီနှင့် ပိုးထည်ရွာမှ တာဝန်ရှိသူများက ရင်းနှီးနွေးထွေးစွာ ပို့ဆောင်နှုတ်ဆက်ခဲ့ကြကြောင်း သတင်းရရှိသည်။