ယနေ့ နိုင်ငံတော်တွင် လိုအပ်လျက်ရှိသော တည်ငြိမ်းအေးချမ်းရေး၊ တရားဥပဒေစိုးမိုးရေးနှင့် လူမှုစီးပွားဘဝများ တိုးတက်ရေးတို့အတွက် ကရင်ပြည်နယ်မှ ကရင်တိုင်းရင်းသားများအပါအဝင် တိုင်းရင်းသားပြည်သူလူထုတစ်ရပ်လုံးကဝိုင်းဝန်း အကောင်ထည်ဖော်ဆောင်ရွက်သွားရမည်ဖြစ်ကြောင်း ယနေ့ကျရောက်သည့် ကရင်အမျိုးသားနှစ်ကူးနေ့အခမ်းအနားသဝဏ်လွှာ၌ ယာယီသမ္မတ ဗိုလ်ချုပ်မှုးကြီးမင်းအောင်လှိုင်က ထည့်သွင်းပြောကြားခဲ့ခြင်း ဖြစ်သည်။
ကရင်ပြည်နယ်အပါအဝင် မိမိတို့နေထိုင်ရာဒေသများအတွင်း လက်နက်ကိုင်ပဋိပက္ခများနှင့် ဆူပူအကြမ်းဖက်မှုများ လျော့နည်းပပျောက်လာစေရန် အချင်းချင်းဝိုင်းဝန်းဆောင်ရွက်ပြီး တိုင်းရင်းသားများအားလုံး စည်းလုံးညီညွတ်စွာဖြင့် ဒီမိုကရေစီဖက်ဒရယ်စနစ်ကို အခြေခံသည့် ပြည်ထောင်စုကြီးအဖြစ် တည်ဆောက်နိုင်ပါစေကြောင်းလည်း နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ ယာယီသမ္မတ ဗိုလ်ချုပ်မှုးကြီး မင်းအောင်လှိုင်က ပြောကြားထားသည်။
နိုင်ငံတော်အနေဖြင့် တည်ငြိမ်အေးချမ်းရေးနှင့် တရားဥပဒေစိုးမိုးရေး အပြည့်အဝရှိလာစေရန်နှင့် ဖွံ့ဖြိုးတိုးတက်ရေးကို အခက်ခဲများကြားမှ ပိုမိုကြိုးစားဆောင်ရွက်သွားမည်ဖြစ်ကြောင်းလည်း ယာယီသမ္မတက ပြောသည်။
နိုင်ငံတော် အစိုးရအဆက်ဆက်အနေဖြင့် နိုင်ငံတော်ထာဝရငြိမ်းချမ်းရေးကို ကြိုးစားဆောင်ရွက်ခဲ့ကြသော်လည်း လွဲမှားသည့် အတွေးအခေါ် အယူအဆများနှင့် နိုင်ငံနှင့်တိုင်းရင်းသားပြည်သူများ အားလုံးအကျိုးထက် ကျဉ်းမြောင်းသည့် ကိုယ်ကျိုးအတ္တများကို ရှေ့တန်းတင်နေကြခြင်းကြောင့် လက်နက်ကိုင် ပဋိပက္ခများနှင့် ဆူပူအကြမ်းဖက်မှုများသည် ယနေ့ကာလထိ ရှည်ကြာနေကြောင်းလည်း ဗိုလ်ချုပ်မှုးကြီး မင်းအောင်လှိုင်က ပြောသည်။
တစ်နိုင်ငံလုံးပ-စ်ခတ်တို-က်မှုရပ်စဲရေးသဘောတူစာချုပ်(NCA) ကို တိုင်းရင်းသားလက်နက်ကိုင်အဖွဲ့များအနေဖြင့် ပါဝင်လက်မှတ်ရေးထိုးပြီး လက်တွဲပူးပေါင်းဆောင်ရွက်ခဲ့သော်လည်း အချို့မှာ အမှန်အတိုင်း ရှု့မြင်ဆင်ခြင်သုံးသပ်ခြင်းမရှိဘဲ လမ်းမှားပေါ်၌ လျှောက်လှမ်းနေဆဲဖြစ်နေပြီး နိုင်ငံနှင့်ပြည်သူ့အကျိုးကို ရှေးရှု့လျက် ငြိမ်းချမ်းရေးလမ်းလျှောက်လှမ်းကြရန်လည်း ယာယီသမ္မတက အသိပေးတိုက်တွန်းပြောကြားထားသည်။