နိုင်ငံတစ်နိုင်ငံ၏ ပြည်တွင်းရေးကို ဝင်ရောက်စွက်ဖက်ခြင်း မပြုလုပ်ကြရန် ကုလ တာဝန်ရှိသူများကို မြန်မာအစိုးရ တုံ့ပြန်
မြန်မာ့အရေးနှင့် ပတ်သက်၍ ကုလသမဂ္ဂ တာဝန်ရှိသူ များ၏ ပြောကြားချက်များအပေါ် နိုင်ငံတစ်နိုင်ငံ၏ ပြည်တွင်းရေးကို ဝင်ရောက်စွက်ဖက်ခြင်း မပြုလုပ်ကြရန် မြန်မာအစိုးရက တုံ့ပြန်စကား ပြောကြားလိုက်သည်။
ဂျီနီဗာမြို့တွင် ၂၀၂၂ ခုနှစ်၊ ဇွန်လ (၁၃) ရက်မှ ဇူလိုင်လ (၈)ရက်အထိ ကျင်းပနေသည့် ကုလသမဂ္ဂ လူ့အခွင့်အ ရေးကောင်စီ အစည်းအဝေးတွင် ကုလသမဂ္ဂ လူ့အခွင့်အ ရေးဆိုင်ရာမဟာမင်းကြီး အပါအဝင် မြန်မာ့အရေးအထူး အစီရင်ခံစာ တင်သွင်းသူများ၏ ပြောကြားချက်များ အ ပေါ် ယခုလို ပြန်လည် တုန့်ပြန်ခဲ့ခြင်း ဖြစ်သည်။
ဂျနီဗာမြို့တွင် ကျင်းပနေသည့် ကုလသမဂ္ဂ လူ့အခွင့်အ ရေးကောင်စီအစည်းအဝေးမှ ထုတ်ပြန်ချက် များသည် မြေပြင်အခြေအနေကို ထင်ဟပ်ခြင်းမရှိဘဲ ချဲ့ကားထားသော ကိန်းဂဏန်းများ၊ သိမ်းကျုံးစွပ်စွဲချက်များနှင့် နိုင်ငံရေး သွတ်သွင်းမှုများ ပါဝင် နေသည့်အတွက် မြန်မာနိုင်ငံအနေဖြင့် အခြေအမြစ်မရှိ သည့် တစ်ဖက်သတ်ပြောကြားချက်များကို လက်မခံဘဲ ပယ်ချသည်ဟု နစက၏ နိုင်ငံခြားရေး ဝန်ကြီးဌာနက သတင်းထုတ်ပြန်သည်။
မြန်မာ့အရေး အထူးအစီရင်ခံစာ တင်သွင်းသူအနေဖြင့် ၎င်းတို့ထုတ်ပြန်မည့် သတင်းတွင် သက်ဆိုင်ရာနိုင်ငံမှ ပေးပို့လာသောအချက်များကို မျှတစွာထည့်သွင်း ထုတ်ပြန်ရမည့် တာဝန်ရှိသော်လည်း ၎င်းတို့ထုတ်ပြန်ခဲ့သည့်သတင်းတွင် မြန်မာနိုင်ငံဘက်မှ ပေးပို့ခဲ့သောအချက်များကို ထည့်သွင်းဖော်ပြရန် ထင်ရှားစွာ ပျက်ကွက်ခဲ့သည်ဟုလည်း မြန်မာဘက်က ပြန်လည်ချေပထားသည်။
ထို့အပြင် ဇွန်လ ၁၄ ရက်က လူ့အခွင်းအရေး ကောင်စီသို့ တင်သွင်းသည့် လူ့အခွင့်အရေးဆိုင်ရာ မဟာမင်းကြီး အ စီရင်ခံစာတွင်လည်း သိမ်းကျုံးစွပ်စွဲချက်များနှင့် တာဝန်မဲ့ ကောက်ချက်ချမှုများဖြင့် အထင်အမြင် မှားစေသည့်မိန့်ခွန်းကို ၎င်း၏လုပ်ပိုင်ခွင့်ထက်ကျော်လွန် ပြောကြားခဲ့သည်ဟု နိုင်ငံခြားရေး ဝန်ကြီးဌာန ဘက်က ပြန်လည် ပြောကြားထားသည်။
ကုလသမဂ္ဂ တာဝန်ရှိသူများ၏ အစီရင်ခံချက်များတွင် ပြည်တွင်း၌ ဖြစ်ပေါ်နေသည့် ဗုံးဖောက်ခွဲတိုက်ခိုက်မှုများ၊ အရပ်သား ၊ ကျောင်းသားနှင့်၊ ဆရာ ဆရာမများသတ်ဖြတ်ခံရမှု၊ အုပ်ချုပ်ရေးအဖွဲ့ဝင်များ သတ်ဖြတ်ခံရမှု၊ ဆက်သွယ်ရေး ယန္တရား မလည်ပတ်နိုင်အောင် နှောင့် ယှက်ဖျက်ဆီးမှုများအပါအဝင် မြေပြင်အခြေအနေများကို ထိန်ချန်ထားကြောင်းလည်း နိုင်ငံခြားရေးဝန်ကြီးဌာနထုတ်ပြန်ချက်တွင် ထောက်ပြထားသည်။
ထို့အပြင် သက်ဆိုင်ရာကုလသမဂ္ဂ အဖွဲ့အစည်းများနှင့် ဝန်ထမ်းများအနေဖြင့် ၎င်းတို့၏ လုပ်ငန်း တာဝန်များကို ဂုဏ် သိက္ခာရှိရှိပညာရှင်ဆန်စွာနှင့် တိကျစွာဆောင်ရွက် ကြရန် အကြံပြုသည်ဟုလည်း ဖော်ပြထားသည်။