နိုင်ငံတော် သံဃနာယကအဖွဲ့ ဥက္ကဋ္ဌ နဝမမြောက် ဗန်းမော်ဆရာတော်ကြီး၏ အန္တိမအဂ္ဂိစျာပနအား ဇွန်လ (၆) ရက်တွင် ကျင်းပသွားမည်ဖြစ်ပြီး လမ်းအချို့အား ယာယီပိတ်ထားမည်ဖြစ်ကြောင်း မန္တလေးမြို့တော်စည်ပင်မှ အသိပေးထားသည်။
ဆရာတော်ကြီး၏ အန္တိမ ဈာပန ကျင်းပနေစဉ်အချိန်တွင် (၇၃) လမ်း အား (၃၇) လမ်းမှ (၄၁) လမ်းအထိ၊ (၃၈) လမ်းအား (၆၉) လမ်းမှလမ်း (၈၀) အထိ၊ (၇၈) လမ်းအား (၃၇) လမ်းမှ (၄၂) လမ်းအထိ၊ (၄၂)လမ်းအား (၇၈) လမ်း မှ လမ်း (၈၀) အထိ၊ ရန်ကုန် – မန္တလေး အမြန်လမ်းအား (၄၂) လမ်းမှ မြဝတီမင်းကြီး လမ်းဆုံအထိ၊ သိပ္ပံလမ်းအား (၇၃) လမ်းမှ (၇၈) လမ်းအထိ၊ ဦးပွားခုံးကျော်တံတားအား (၇၈) လမ်းမှ ရန်ကုန် – မန္တလေးအမြန်လမ်းအထိ၊ ရန်ကုန် – မန္တလေး အမြန်လမ်း၏ ဝဲ၊ ယာဘေးရှိ ဆိုင်ကယ်လမ်းအား မြဝတီမင်းကြီးလမ်းမှ သိပ္ပံလမ်းအထိ ယာယီပိတ်ထားမည်ဖြစ်ကြောင်း သိရသည်။
နဝမမြောက် ဗန်းမော်ဆရာတော်ကြီး၏ ရုပ်ကလာပ်တော်အား လက်ရှိအချိန်၌ မန္တလေးတိုင်း၊ မဟာအောင် မြေမြို့နယ်၊ မဟာနွယ်စဥ် ရပ်ကွက်ရှိ ဗန်းမော်ကျောင်းတိုက်၌ အပူဇော်ခံထားရှိကာ ဇွန် ၆ ရက်တွင် ချမ်းမြသာစည်လေယာဥ်ကွင်းဟောင်း၌ မီးပူဇော်သွားမည်ဖြစ်ကြောင်း သိရသည်။