နန်စီ ပေလိုစီ အာရှခရီးစဉ်စတင်၊ ထိုင်ဝမ်အကြောင်း မပြောသေး
ပေကျင်း၊ ဇူလိုင် ၃၁ ရက်
အမေရိကန် အောက်လွှတ်တော်ဥက္ကဌ နန်စီပေလိုစီသည် ၎င်း၏ လေးနိုင်ငံအာရှခရီးစဉ်အား ဇူလိုင်လ ၃၁ ရက် တနင်္ဂနွေနေ့တွင် စတင်ခဲ့ကြောင်း ၎င်း၏ရုံးက ထုတ်ပြန်ကြေငြာခဲ့သည်။ သို့သော် တရုတ်နှင့် အမေရိကကြား လတ်တလော တင်းမာမှုများ မြင့်မားနေသည့် ထိုင်ဝမ် ခရီးစဉ်နှင့် ပတ်သက်၍မူ ထုတ်ဖော်ပြောဆိုခြင်း မရှိခဲ့ပေ။
လွှတ်တော်ဥက္ကဌ နန်စီပေလိုစီသည် ကွန်ဂရက်လွှတ်တော် ကိုယ်စားလှယ်အဖွဲ့ကို ဦးဆောင်ကာ အင်ဒို-ပစိဖိတ်ဒေသများသို့ ခရီးဆက်နေကြောင်းနှင့် ၎င်းခရီးစဉ်တွင် အာရှလေးနိုင်ငံဖြစ်သည့် စင်္ကာပူ၊ မလေးရှား၊ တောင်ကိုရီးယားနှင့် ဂျပန်တို့လည်း ပါဝင်ကြောင်း ၎င်းရုံး၏ ထုတ်ပြန်ချက်တွင် ဖော်ပြထားသည်။
ခရီးစဉ်တွင် ပါဝင်မည့် နိုင်ငံများကို ဖော်ပြထားသော်လည်း အခြားနိုင်ငံများသို့ ဝင်ရောက်လည်ပတ်သွားခြင်း ရှိ၊ မရှိကိုမူ ပြောကြားထားခြင်း မရှိချေ။
အဆိုပါခရီးစဉ်၌ ပေလိုစီသည် အင်ဒို-ပစိဖိတ်ဒေသအတွင်း အပြန်အလှန် လုံခြုံရေးထားရှိခြင်း၊ စီးပွားရေး ပူးပေါင်းဆောင်ရွက်မှုနှင့် ဒီမိုကရေစီ အုပ်ချုပ်ရေး တို့အပေါ် အဓိကထားလုပ်ဆောင်သွားမည်ဟု ၎င်း၏ ရုံးကဆိုသည်။
ပေလိုစီ သည် တနင်္လာနေ့တွင် စင်ကာပူနိုင်ငံသို့ နှစ်ရက်ကြာလာရောက်လည်ပတ်ရန် မျှော်လင့်ထားကြောင်း နိုင်ငံခြားရေးဝန်ကြီးဌာနကို ကိုးကား၍ CNA သတင်းဌာနက ဖော်ပြထားသည်။
စင်ကာပူနိုင်ငံရှိ အမေရိကန်ကုန်သည်ကြီးများအသင်းသည် တနင်္လာနေ့ နေ့လယ်ပိုင်းတွင် နန်စီပေလိုစီနှင့် လွှတ်တော်ကိုယ်စားလှယ်များအတွက် ဧည့်ခံပွဲကျင်းပရန် စီစဉ်ထားကြောင်း ၎င်း၏ ဝဘ်ဆိုက်တွင် ရေးသားထားသည်။
အမေရိကန်နိုင်ငံမှ အရာရှိများ ထိုင်ဝမ်ကျွန်းသို့ လာရောက်လည်ပတ်ခြင်းသည် ထိုင်ဝမ်အား တရုတ်ပြည်ထောင်စုမှ ခွဲထွက်ကာ ကိုယ်ပိုင်လွတ်လပ်ရေးရ နိုင်ငံ အဖြစ် ကြေငြာရန် တွန်းအားပေးမှုတအဖြစ် တရုတ်နိုင်ငံက ရှုမြင်နေခြင်းဖြစ်သည်။
ဝါရှင်တန်သည် ထိုင်ဝမ်နှင့် တရားဝင် သံတမန်ဆက်ဆံရေးမရှိသော်လည်း ၎င်း၏ ခုကာကွယ်ရေးရေးအတွက် အကူအညီပေးရန် ဥပဒေအရ သဘောတူညီမှု ပြုလုပ်ထားသည်။
တရုတ်သမ္မတ ရှီသည် ပြီးခဲ့သည့်အပတ် အမေရိကန်သမ္မတ ဘိုင်ဒင်နှင့် ဖုန်းေပြာရာတွင် ပေလိုစီ၏ ထိုင်ဝမ်ခရီးစဉ်နှင့် ပတ်သက်၍ သတိပေးခဲ့သည်။
အမေရိကန်စစ်တပ်က ပေလိုစီ ထိုင်ဝမ်သို့ သွားရောက်လည်ပတ်မည့် အစီအစဉ်သည် ယခုအချိန်တွင် ကောင်းမွန်သည့် အကြံအစည်မဟုတ်ဟု ယုံကြည်နေကြောင်း ဘိုင်ဒင်က သတင်းထောက်များကို ပြီးခဲ့သည့် ဗုဒ္ဓဟူးနေ့တွင် ပြောကြားခဲ့သည်။
Source: Reuters
