နစကက ထုတ်ရောင်းမည့် ရွှေဒင်္ဂါးပြားများ၏ ဈေးနှုန်းကို ကမ္ဘာ့ရွှေပေါက်ဈေးအား အခြေခံကာ သတ်မှတ်ရောင်းချမည်
နစကက ထုတ်ရောင်းရန် ပြင်နေသည့် ရွှေဒင်္ဂါးပြားများ၏ ဈေးနှုန်းကို ကမ္ဘာ့ရွှေဈေးနှုန်းပေါ် အခြေခံ၍ ရောင်းချမည်ဖြစ်ပြီး နိုင်ငံပိုင် အရန်ရွှေနှင့် အရန်ငွေများအားအထိခံမည် မဟုတ်ကြောင်း နစက ပြောရေးဆိုခွင့်ရှိ သူ ဗိုလ်ချုပ်ဇော်မင်းထွန်းက ပြောသည်။
အဆိုပါ ရွှေဒင်္ဂါး ရောင်းချမည့် အစီအစဉ်ကို သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီးဌာနက ဗဟိုဘဏ်မှတဆင့် ပြည်သူသို့ တိုက်ရိုက်ရောင်းချသွားမည်ဖြစ်ပြီး အစိုးရ၏ အရောင်းကောင်တာများ စီစဉ်ရောင်းချသွားမည်ဟုလည်း ၎င်းကဆိုသည်။
” အစိုးရကနေ အရောင်း ကောင်တာတွေ ဖွင့်လှစ်ပြီး ရောင်းချပေးမယ့် ပုံစံကို ကျွန်တော်တို့ ရည်ညွှန်းပါတယ်။ ပြည်သူ လူထု လက်ထဲကို တိုက်ရိုက် ရောင်း ချပေးဖို့ ရည်မှန်းချက်ထားပြီး ကျွန်တော်တို့ ဆောင် ရွက်လျက်ရှိပါတယ်။ တစ်ဦးကို ဘယ်လောက်ပမာဏ ရောင်းချပေးမလဲ ၊ တစ်နေ့ကိုဘယ်လောက် ပမာဏ ရောင်းချပေးမလဲကတော့ ကျွန်တော်တို့ ဆက်လက်ဆောင်ရွက်ဆဲ ကိစ္စ ဖြစ်ပါတယ်” ဟု ဗိုလ်ချုပ်ဇော်မင်းထွန်းက ပြောသည်။
အဆိုပါ ရွှေဒင်္ဂါး ရောင်းချမှု အစီအစဉ်မှာလည်း သယံဇာတ ဝန်ကြီးဌာန လက်အောက်မှ ရွှေလုပ်ကွက်များမှ ရရှိသည့် အခွန်ရွှေများကို ပြန်လည်ရောင်းချပေးခြင်းဖြစ်ပြီး ပြည်သူလူထု လက်ထဲသို့ ရောက်ရှိရန်နှင့် အမှန်တကယ် ရင်းနှီးမြှုပ်နှံမည်သူများ၏ လက်ထဲသို့ လိုအပ်သည့်ပမာဏအထိရောက်ရှိသွားစေရန် ရည်ရွယ်လုပ်ဆောင်ခြင်း ဖြစ်ကြောင်းလည်း ၎င်းကပြောသည်။
ပြည်တွင်းဈေးကွက်၌ အခေါက်ရွှေ (၁) ကျပ်သားလျင် (၃၇) သိန်းအထိ စံချိန်တင် မြင့်တက်ခဲ့ရာမှ အစိုးရ၏ ထိန်းချုပ်မှုကြောင့် (၂) ရက်အတွင်း (၁၀) သိန်းဝန်းကျင်အထိ ပြန်ကျခဲ့သော်လည်း ပြည်တွင်းရွှေအသင်းများ၏ ရည်ညွှန်းဈေးနှုန်းနှင့် (၇) သိန်းမှ (၈) သိန်းဝန်းကျင်အထိ ကွာဟနေဆဲ ဖြစ်သည်။
ယင်းသို့ဖြစ်နေရခြင်းမှာ ကမ္ဘာ့ရွှေဈေး အတက်အကျနှင့်ဆိုင်သလို ပြည်တွင်းရှိ ဈေးကစားသူများ၏ လက်ချက်ကြောင့်လည်း ပါဝင်ကြောင်း ဗိုလ်ချုပ်ဇော်မင်းထွန်းက ပြောသည်။