ဓာတ်အားလိုင်းအဟောင်း ပြန်လည်ဖြုတ်သိမ်းခြင်းမှ ဆယ်တင်ပစ္စည်းများအား စနစ်တကျစာရင်းပြုစုသိမ်းဆည်းထားရမည်

ရန်ကုန်တိုင်း၊ ရွှေပြည်သာမြို့နယ်၌ အမှတ် (၄) လမ်းမကြီးအား အဆင့်မြှင့်တင်တိုးချဲ့လျက်ရှိ၍ ဒညင်းဂုံးလမ်းဆုံ မီးရထားသံလမ်းထိပ်မှ လှော်ကားတာဆုံအထိ လမ်းနယ်နှင့် မလွတ်ကင်းသော ဓာတ်အားလိုင်းများကို လွတ်ကင်းရာသို့ရွှေ့ပြောင်းလျက်ရှိကြောင်း သိရသည်။

၆၆ ကေဗွီ ၊ ၃၃ ကေဗွီ ၊ ၁၁ ကေဗွီနှင့် ၄၀၀ ဗို့ ဓာတ်အားလိုင်းများအား လမ်းမကြီးနှင့်လွတ်ကင်းရာသို့ ပြောင်းရွှေ့တည်ဆောက်ခြင်း၊ ဓာတ်အားလိုင်းတိုင်များအသစ်စိုက်ထူခြင်း၊ ကြိုးဆွဲခြင်းနှင့် ဓာတ်အားလိုင်းဟောင်းဖြုတ်သိမ်းခြင်းတို့ကို လျှပ်စစ်ကျွမ်းကျင်ဝန်ထမ်းများကဆောင်ရွက်လျက်ရှိကြောင်း သိရသည်။

ထိုသို့ ဆောင်ရွက်နေမှုများအား လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီးဦးဥာဏ်ထွန်းမှ နိုဝင်ဘာ ၂၈ ရက်ညနေပိုင်းကကြည့်ရှုစစ်ဆေး၍ ဓာတ်အားလိုင်းများဖြုတ်သိမ်းခြင်းနှင့် ရွှေ့ပြောင်းတည်ဆောက်ခြင်းလုပ်ငန်းများအား သတ်မှတ်ချိန်အတွင်းအချိန်မီပြီးစီးနိုင်ရေး စနစ်တကျဆောင်ရွက်ရန်မှာကြားခဲ့ကြောင်း သိရသည်။

ထို့ပြင် ဝန်ထမ်းများအန္တရာယ်ကင်းရှင်းစွာဆောင်ရွက်နိုင်ရေးနှင့်  လုပ်ငန်းခွင်ဘေးအန္တရာယ်ကင်းရှင်းရေးအတွက်အဆင့်ဆင့်ကြပ်မတ်၍ ဂရုပြုဆောင်ရွက်ရန်၊ လုပ်ငန်းခွင်သုံးပစ္စည်းများ စံချိန်စံညွှန်းပြည့်မီစေရေးနှင့် လေလွင့်ဆုံးရှုံးမှုမရှိစေရေး အလေးထားဆောင်ရွက်ရန်၊ ဓာတ်အားလိုင်းအဟောင်းပြန်လည်ဖြုတ်သိမ်းခြင်းမှ ဆယ်တင်ပစ္စည်းများအား စနစ်တကျစာရင်းပြုစုသိမ်းဆည်းထားရန်တို့ကိုလည်းမှာကြားခဲ့ကြောင်း သိရသည်။