ဒေသတွင်းနှင့် နိုင်ငံတကာအရေး ပိုမိုပူးပေါင်းဆောင်ရွက်ရန် တရုတ်နှင့် ဆော်ဒီ သဘောတူ

တရုတ်နှင့် ဆော်ဒီအာရေဗျနိုင်ငံတို့သည် ဒေသတွင်းနှင့် နိုင်ငံတကာကိစ္စရပ်များတွင် ပိုမိုနီးကပ်စွာ ဆက်သွယ်ညှိနှိုင်းဆောင်ရွက်ရန် သဘောတူခဲ့ကြသည်။ တနင်္ဂနွေနေ့က နှစ်နိုင်ငံ နိုင်ငံခြားရေးဝန်ကြီးများ တွေ့ဆုံဆွေးနွေးမှုအပြီး၌ ထုတ်ပြန်ခဲ့သော ကြေညာချက်များတွင် အရှေ့အလယ်ပိုင်း သံခင်းတမန်ခင်းနှင့်ပတ်သက်၍ ရီယာ့ဒ်၏ အခန်းကဏ္ဍကို ပေကျင်းက ချီးကျူးကြောင်း ဖော်ပြထားသည်။

တရုတ်နိုင်ငံခြားရေးဝန်ကြီး ဝမ်ယိသည် အာရပ်စော်ဘွားများပြည်ထောင်စု(ယူအေအီး) ဖြင့်စတင်ခဲ့သည့် အရှေ့အလယ်ပိုင်းသုံးနိုင်ငံကို ခရီးသွားရောက်နေခြင်းဖြစ်ကာ ဂျော်ဒန်တွင် ခရီးစဉ် ကို အဆုံးသတ်ရန် စီစဉ်ထားသည်။ ၎င်းသည် တနင်္ဂနွေနေ့တွင် ဆော်ဒီအာရေဗျနိုင်ငံခြားရေးဝန်ကြီး မင်းသား ဖိုင်ဆယ်ဘင် ဖာဟန် အယ်လ်ဆော့ဒ်နှင့် တွေ့ဆုံခဲ့သည်။

တရုတ်အစိုးရပိုင် ရှင်းဟွာသတင်းဌာနက ဖော်ပြခဲ့သော ပူးတွဲထုတ်ပြန်ချက်တွင် နှစ်နိုင်ငံ ပူးပေါင်းဆောင်ရွက်မှုကို ခိုင်မာစေမည့်ကိစ္စရပ်များကို အသေးစိတ်မဖော်ပြခဲ့သော်လည်း ဆော်ဒီအာရေဗျနှင့် အီရန်နှစ်နိုင်ငံ ဆက်ဆံရေး ဖွံ့ဖြိုးတိုးတက်မှုနှင့် မြှင့်တင်မှုကို တရုတ်နိုင်ငံက ထောက်ခံကြောင်း ဖော်ပြခဲ့သည်။

တရုတ်နိုင်ငံသည် ဆော်ဒီအာရေဗျ၏ ဦးဆောင်အခန်းကဏ္ဍနှင့် ဒေသတွင်းနှင့် နိုင်ငံတကာ လုံခြုံရေးနှင့် တည်ငြိမ်ရေး ကြိုးပမ်းအားထုတ်မှုများကို နစ်သက်တန်ဖိုးထားကြောင်း တနင်္လာနေ့က ထုတ်ပြန်ခဲ့သော ကြေညာချက်တွင် ဖော်ပြထားသည်။

ပါလက်စတိုင်းအရေးအတွက် ပြည့်စုံပြီး တရားမျှတသော ဖြေရှင်းချက်နှင့် ပါလက်စတိုင်းလူမျိုးများအတွက် လွတ်လပ်သောနိုင်ငံတစ်နိုင်ငံကို ထူထောင်ဖွဲ့စည်းရေးအတွက် နှစ်နိုင်ငံစလုံး၏ ထောက်ခံမှုကိုလည်း ထပ်လောင်းအတည်ပြုကြောင်း အဆိုပါကြေညာချက်တွင် ဖော်ပြခဲ့သည်။

အဆင့်မြင့်အရာရှိအဆင့် ဆွေးနွေးပွဲတွင် တရုတ်နိုင်ငံသည် ဆော်ဒီအာရေဗျကို အရှေ့အလယ်ပိုင်းသံခင်းတမန်ခင်းအတွက် ဦးစားပေးအဖြစ်နှင့် နိုင်ငံတကာ သံတမန်ရေးရာတွင် အရေးပါသည့်မိတ်ဖက်နိုင်ငံအဖြစ် အမြဲသတ်မှတ်ကြောင်း ဝမ်က ဆော်ဒီနိုင်ငံခြားရေးဝန်ကြီးကို ပြောကြားခဲ့ကြောင်း တရုတ်နိုင်ငံခြားရေးဝန်ကြီးဌာန၏ တနင်္လာနေ့က ထုတ်ပြန်ချက်တွင် ပြောကြားခဲ့သည်။

စွမ်းအင်နှင့် ရင်းနှီးမြှုပ်နှံမှုများအပြင် စွမ်းအင်အသစ်နှင့် အစိမ်းရောင်အသွင်ကူးပြောင်းမှုနယ်ပယ်များ တွင်လည်း ပိုမိုပူးပေါင်းဆောင်ရွက်သွားရန် ၎င်းက အားပေးခဲ့သည်။

ထို့အပြင် နှစ်နိုင်ငံစလုံးမှ သံတမန်နှင့် အထူးနိုင်ငံကူးလက်မှတ်ကိုင်ဆောင်သူများအတွက် ဗီဇာများကို အပြန်အလှန်ကင်းလွတ်ခွင့်ပေးရန် သဘောတူညီခဲ့ကြောင်း ပူးတွဲကြေညာချက်တွင် ဖော်ပြခဲ့သည်။

Ref: ရိုက်တာ