ဒစ်ဂျစ်တယ်နည်းပညာသည် MSME လုပ်ငန်းများ တိုးချဲ့ရေးနှင့် ဈေးကွက်စွမ်းရည်မြှင့်တင်ပေးနိုင်

ဒစ်ဂျစ်တယ်နည်းပညာသည် MSME လုပ်ငန်းများအတွက် အခွင့်အလမ်းဖန်တီးပေး၍ လုပ်ငန်းများတိုးချဲ့ရေးနှင့် ဈေးကွက်စွမ်းရည်မြှင့်တင်ပေးနိုင်ကြောင်း စက်မှုဝန်ကြီးဌာန၊ ဒုတိယဝန်ကြီး ဦးရင်မောင်ညွန့်က ပြောကြားသည်။

ယင်းပြောကြားချက်ကို ဇူလိုင်လ ၂၇ ရက်မှ ၂၈ ရက်အထိ နေပြည်တော်၌ ကျင်းပခဲ့သည့် လန်ချန်း-မဲခေါင် MSME များ ဒစ်ဂျစ်တယ်ကျွမ်းကျင်မှုဆိုင်ရာ အဆင့်မြှင့်တင်နိုင်ရန် စွမ်းဆောင်ရည်ဖွံ့ဖြိုးတိုးတက်ရေးဖိုရမ် ဖွင့်ပွဲအခမ်းအနားတွင် ဒုတိယဝန်ကြီးက ထည့်သွင်းပြောကြားခဲ့ခြင်းဖြစ်သည်။

မြန်မာနိုင်ငံအနေဖြင့် MSME များကို အလွန်အလေးထားကြောင်းနှင့် မြန်မာနိုင်ငံ စိုက်ပျိုးရေးနှင့် မွေးမြူရေးလုပ်ငန်းများအတွက် လုံလောက်သည့်ကုန်ကြမ်းများ ထောက်ပံ့ပေးပြီး အချောကိုင်ခြင်းဖြင့် ကုန်ပစ္စည်းတန်ဖိုးမြှင့်တင်ကာ ပြည်သူများ ဝင်ငွေတိုးမြှင့်ပေးနိုင်ကြောင်းလည်း ဒုတိယဝန်ကြီးက ဆိုသည်။

ဖိုရမ်သို့ လန်ချန်း-မဲခေါင်နိုင်ငံများမှ ကိုယ်စားလှယ်များ၊ မြန်မာနိုင်ငံမှ တိုင်းနှင့်ပြည်နယ်အသီးသီးမှ အရာရှိများ၊ ပညာရှင်များနှင့် MSME ကိုယ်စားလှယ် စုစုပေါင်း (၁၀၀) ကျော် တက်ရောက်ခဲ့ပြီး MSME များ ဒစ်ဂျစ်တယ်ကျွမ်းကျင်မှုဆိုင်ရာ စွမ်းဆောင်ရည်ဖွံ့ဖြိုးတိုးတက်ရေးနှင့်စပ်လျဉ်း၍ ဆွေးနွေးခဲ့သည့်အပြင် အခြားအစီအစဉ်များလည်း ရေးဆွဲခဲ့ကြောင်း သိရသည်။

ယင်းအခမ်းအနားတွင် မြန်မာနိုင်ငံဆိုင်ရာ တရုတ်သံရုံးမှ သံမှူး Mr. Ouyang Daobing က MSME များသည် လက်ရှိ ကမ္ဘာ့စီးပွားရေးဖွံ့ဖြိုးတိုးတက်မှု၏ အဓိကတွန်းအားဖြစ်ပြီး လုပ်ငန်းခွင်ဝင်မှုတိုးချဲ့ရေးနှင့် လူနေမှုဘဝကောင်းမွန်လာရေးအတွက် အရေးပါကျားကန်မှု ဖြစ်ကြောင်း၊ လန်ချန်း-မဲခေါင်ဒေသတွင်း MSME များဖွံ့ဖြိုးတိုးတက်မှုသည် ဒေသတွင်း Industry Chain၊ Supply Chain တည်ငြိမ်မှုထိန်းသိမ်းထားပြီး ကုန်သွယ်မှုအဆင်ပြေချောမွေ့ရေး၊ ဈေးကွက်အပြန်အလှန်ချိတ်ဆက်ရေးကို ထိန်းသိမ်းထားကာ ဒေသတွင်း တသမတ်တည်း ဈေးကွက်ကြီးတည်ဆောက်ရေး၊ နိုင်ငံအသီးသီးရှိ ပြည်သူများ ဝင်ငွေနှင့် လူနေမှုဘဝအဆင့်အတန်းမြှင့်တင်ရေးအတွက် အရေးပါသည့်အခန်းကဏ္ဍမှ ပါဝင်နေကြောင်းနှင့် လန်ချန်း-မဲခေါင် ပူးပေါင်းဆောင်ရွက်မှု အထူးရန်ပုံငွေပံ့ပိုးမှုဖြင့် ကျင်းပသည့် ယခုဖိုရမ်သည် အချိန်အခါသင့်၍ MSME များအတွက် ဉာဏ်ပညာများပံ့ပိုးပေးမည်ဖြစ်ကြောင်းလည်း ပြောကြားခဲ့သည်။