ရန်ကုန်တိုင်း၊ဒဂုံမြို့သစ်(မြောက်ပိုင်း)မြို့နယ်၊ ၃၅ ရပ်ကွက်နေ ကိုသီဟထွန်း(၃၁)နှစ်သည် ဒီဇင်ဘာ ၂၉ ရက်ညနေပိုင်းက ပျောက်ဆုံးသွားခဲ့ကြောင်း သိရသည်။
ယင်းနေ့နေ့လည် ၃ နာရီ ၅၀ မိနစ်ခန့်က ကိုသီဟထွန်းသည် နေအိမ်မှပြိုင်စက်ဘီး(အပြာရောင်)ဖြင့် ၃၀ ရပ်ကွက်ရှိ ကျောင်းလမ်းသို့သွားသည့်အချိန်၌ ပျောက်ဆုံးသွားခဲ့ခြင်းဖြစ်ကြောင်း သိရသည်။
“ကျွန်တော့်ညီက အဲဒီအချိန်ပုံမှန်ထွက်နေကြ သူ့ကောင်မလေးကိုသွားခေါ် ပြီး Gym ကိုသွားတယ် သွားခေါ်တဲ့နေရာနဲ့ ကျွန်နော်တို့အိမ်က ၁၀ မိနစ် ၁၅ မိနစ်လောက်ဆိုရင်ရောက်ပြီ အဲဒီနေ့ကလည်း ပုံမှန်အတိုင်းပဲအိမ်ကထွက်သွားတယ် ပိုက်ဆံလည်းအများကြီးထည့်မသွားဘူး ဖုန်းပဲယူသွားတယ်”ဟု ပျောက်ဆုံးနေသူ၏ အကိုဖြစ်သူ ကိုဝေမိုးကပြောသည်။
ထိုသို့ နေအိမ်မှထွက်ခွာသွားပြီးနောက် ၎င်း၏မိတ်ဆွေထံရောက်ရှိလာခြင်းမရှိသဖြင့် ကိုသီဟထွန်း၏ ဖုန်းအားဆက်သွယ်ရာတွင် စက်ပိတ်ထားသဖြင့် မိသားစုဝင်များထံ ဆက်သွယ်မေးမြန်းရာမှ နေအိမ်မှထွက်ခွာသွားပြီဖြစ်ကြောင်း သိရှိရသဖြင့် ပျောက်ဆုံးသွားခြင်းဖြစ်ကြောင်းကို သိရှိခဲ့ရသည်ဟု မိသားစုဝင်ထံမှ သိရသည်။
“သူ့ကောင်မလေးက ရောက်မလာသေးတဲ့အတွက် ညီလေးဖုန်းကိုဆက်တော့ စက်ပိတ်ထားတယ်ဆိုတာနဲ့အိမ်ကိုဖုန်းဆက်ပြီး ညီလေးရှိမရှိမေးမှ နာရီဝက်လောက်အတွင်းမှာ ပျောက်သွားတယ်ဆိုတာကိုသိရတာ လက်ရှိအချိန်အထိ အဆက်အသွယ်မရသေးဘူး ကျွန်တော်တို့လည်း ညီလေးဖုန်းကို ၁၅ မိနစ်တစ်ခါလောက်ဆက်သွယ်ကြည့်တယ် မရပါဘူး အရင်ကည ၆ နာရီခွဲလောက်ဆိုရင်အိမ်ပြန်ရောက်ပြီ သူဖုန်းကိုင်ထဲက တစ်ခါမှအဆက်အသွယ်မပြတ်ခဲ့ဘူး”ဟု ကိုဝေမိုးကပြောသည်။
ကိုသီဟထွန်း ပျောက်ဆုံးသွားသဖြင့် ၃၅ ရပ်ကွက်အုပ်ချုပ်ရေးမှူးရုံးသို့ ဆက်သွယ်အကြောင်း ကြားပြီးနောက် ဒဂုံမြို့သစ်(မောက်ပိုင်း)မြို့မရဲစခန်း၌ လူပျောက်တိုင်ကြားထားကြောင်း သိရသည်။
“အိမ်ကလူတွေအကုန်လုံးကလည်းစိတ်ပူနေကြတယ် ရဲစခန်းမှာလူပျောက်တိုက်ချက်ဖွင့်ထားတယ် ထူးခြားမှုတော့မရှိသေးဘူး ရဲစခန်းကလည်းစုံစမ်းစစ်ဆေးတာတွေလုပ်နေတယ်”ဟု ကိုဝေမိုးကပြောသည်။
ကိုသီဟထွန်းသည် အသက်(၃၁)နှစ်ရှိပြီဖြစ်ကာ အရပ် ၅ ပေ ၉ လက်မ၊ အသားညိုသဖြင့် ၎င်းအားတွေ့ရှိသူများအနေဖြင့် ဖုန်း ၀၉ ၉၆၁၁၈၅၁၃၈ ၊ ၀၉ ၄၅၆၈၅၁၆၁၆ နှင့် ၀၉ ၄၄၈၀၁၂၈၉၁ တို့သို့ဆက်သွယ်အကြောင်းကြားပေးကြပါရန် မိသားစုဝင်များက မေတ္တာရပ်ခံထားသည်။
“ညီမလည်း နေရာအနှံ့မှာရှာပြီးသွားပြီ ဆေးရုံတွေမှာလည်းလိုက်ရှာခဲ့တယ် မတွေ့သေးပါဘူး ဘာမှမပြောတတ်သေးဘူး ဘယ်လိုလုပ်ရမှန်းလည်းမသိသေးဘူး ဖြစ်နိုင်ခြေရှိတာတွေကို လုပ်နေပါတယ်”ဟု ကိုသီဟထွန်းနှင့်နီးစပ်သူတစ်ဦးဖြစ်သည့် မယွန်းယွန်းကပြောသည်၊