ထိုင်း-စင်ကာပူ ဆက်ဆံရေး ခိုင်မာအောင်ဆောင်ရွက်

ထိုင်းဝန်ကြီးချုပ် အနူတင် ချန်ဗီရာကူလ်သည် စင်ကာပူနိုင်ငံတွင် ကျင်းပသော ဆွေးနွေးပွဲများတွင် အွန်လိုင်းအလိမ်အညာလုပ်ငန်းများကို တို-က်ဖျက်ရာတွင်လည်း‌ကောင်း၊ ထောက်လှမ်းရေးကွန်ရက်များကို ချဲ့ထွင်ရာတွင် လည်းကောင်း ထိုင်းနိုင်ငံ၏ ခိုင်မာသောမဟာမိတ်ဖြစ်လာရန် စင်ကာပူကို တိုက်တွန်းခဲ့သည်။

မစ္စတာ အနူတင်သည် သောကြာနေ့တွင် စင်ကာပူနိုင်ငံခြားရေးဝန်ကြီးဌာန၌ ပြုလုပ်သည့် တရားဝင်ကြိုဆိုပွဲအခမ်းအနားကို တက်ရောက်ခဲ့ကာ ဂုဏ်ပြုတပ်ဖွဲ့ကို စစ်ဆေးခဲ့သည်။ ယင်းနောက်တွင် ဝန်ကြီးဌာန၌ စင်ကာပူဝန်ကြီးချုပ် လောရင့်စ်ဝေါင်နှင့် ဆွေးနွေးခဲ့ကြောင်း ထိုင်းအစိုးရပြောရေးဆိုခွင့်ရှိသူ ဆီရီဖွန် အန်ကာဆာကူလ်ကီယတ်က ပြောကြားခဲ့သည်။

ထိုင်းနှင့် စင်ကာပူအကြား သံတမန်ဆက်ဆံရေး နှစ် ၆၀ ပြည့်အထိမ်းအမှတ်နှင့် တရားဝင် သံတမန်ဆက်ဆံရေးမတိုင်ခင်ကာလ ကြာရှည်စွာကတည်းက ရှိနေခဲ့သော နက်ရှိုင်းသည့် ချစ်ကြည်ရင်းနှီးမှုကို ထင်ဟပ်စေသည့် မစ္စတာ အနူတင်၏ ခရီးစဉ်သည် အလွန်အရေးပါကြောင်း မစ္စတာဝေါင်က အလေးပေးပြောကြားခဲ့သည်ဟု မစ္စတာ ဆီရီဖွန်က ပြောသည်။

နှစ်နိုင်ငံပြည်သူများနှင့် ခေါင်းဆောင်များအကြား နီးကပ်သောနှောင်ကြိုးကို ၎င်းက ထပ်လောင်းအတည်ပြု ပြောကြားခဲ့ပြီး ယင်း နှောင်ကြိုးသည် ၎င်းတို့၏ ခိုင်မာ‌သော ဘက်စုံပူးပေါင်းဆောင်ရွက်မှုအတွက် အခြေခံအုတ်မြစ်ဖြစ်ကြောင်း ဖော်ပြခဲ့သည်။ ကမ္ဘာတစ်ဝန်းရှိ စိန်ခေါ်မှုများအကြားတွင် ထိုင်း-စင်ကာပူ ပူးပေါင်းဆောင်ရွက်မှုကို ပိုမိုတိုးတက်စေရန်နှင့် ခိုင်မာစေရန် ထိုင်းဝန်ကြီးချုပ်နှင့် နီးကပ်စွာလက်တွဲလုပ်ဆောင်သွားရန် စိတ်ပိုင်းဖြတ်ထားကြောင်းလည်း မစ္စတာဝေါင်က ပြောကြားခဲ့သည်။

သံတမန်ဆက်ဆံရေး နှစ် ၆၀ ပြည့်အထိမ်းအမှတ်အဖြစ် တော်ဝင်ခရီးစဉ်များ၊ ပြီးခဲ့သည့် ဒီဇင်ဘာလအတွင်းက မစ္စတာဝေါင်၏ ထိုင်းနိုင်ငံခရီးစဉ်နှင့် နှစ်နိုင်ငံ နိုင်ငံခြားရေးဝန်ကြီးများ နှင့် ကူးသန်းရောင်းဝယ်ရေးဝန်ကြီးများအကြား တွေ့ဆုံမှုများမှတဆင့် အဆင့်မြင့်ဆက်ဆံရေးကို နက်ရှိုင်းစေရန် အရေးကြီးသောအခွင့်အလမ်းတစ်ခုဖြစ်ခဲ့ကြောင်း ခေါင်းဆောင်နှစ်ဦးစလုံးက သဘောတူခဲ့သည်။

နှစ်ဖက် အပြန်အလှန်အဆင်ပြေသောအချိန်အခါတွင် ထိုင်းနိုင်ငံသို့ လာရောက်လည်ပတ်ပါရန် မစ္စတာ အနူတင်က မစ္စတာဝေါင်ကို ဖိတ်ကြားခဲ့သည်။

Ref: ဘန်ကောက်ပို့စ်