ထိုင်းဝန်ကြီးချုပ် နောက်လ စင်ကာပူသွားမည်

ထိုင်းဝန်ကြီးချုပ် အနူတင် ချန်ဗီရာကူလ်သည် နှစ်နိုင်ငံ ပူးပေါင်းဆောင်ရွက်မှုခိုင်မာစေရန်အတွက် နိုဝင်ဘာလ ၇ ရက်နေ့တွင် စင်ကာပူနိုင်ငံကို သွားရောက်မည်ဖြစ်ကြောင်း နှစ်နိုင်ငံသံတမန်ဆက်ဆံမှု နှစ် ၆၀ ပြည့်အထိမ်းအမှတ်အဖြစ် ဗုဒ္ဓဟူးနေ့တွင် စင်ကာပူကို ရောက်ရှိနေခဲ့သော ထိုင်းနိုင်ငံခြားရေးဝန်ကြီး ဆီဟာဆက် ဖူအန်ကတ်ကောက ပြောကြားခဲ့သည်။

အင်္ဂါနေ့က စင်ကာပူနိုင်ငံခြားရေးဝန်ကြီး ဗီဗီယန် ဘာလာခရစ်ရှ်နန်နှင့် တွေ့ဆုံခဲ့သည့် မစ္စတာ ဆီဟာဆက်က နှစ်ဖက်စလုံးသည် ထိုင်းဝန်ကြီးချုပ်၏ နိုင်ငံတော်ခရီးစဉ်အတွက် ပြင်ဆင်နေသည်ဟု ပြောကြားခဲ့သည်။

ဝန်ကြီးချုပ်၏ ခရီးစဉ်သည် သဘာဝပတ်ဝန်းကျင်ကို မထိခိုက်စေသောစီးပွားရေးစနစ်၊ စားနပ်ရိက္ခာနည်းပညာနှင့် စားနပ်ရိက္ခာဖူလုံရေး ပူးပေါင်းဆောင်ရွက်မှုကို တိုးချဲ့သွားရေးကိုအဓိကအာရုံစိုက်မည်ဖြစ်သည်။

နိုင်ငံခြားရေးဝန်ကြီးနှစ်ဦး တွေ့ဆုံခဲ့စဥ် ဆန်နှင့် စိုက်ပျိုးရေးထွက်ကုန်ဆိုင်ရာ ကုန်သွယ်ရေးသဘောတူညီချက်များမှတဆင့် စင်ကာပူ၏ စားနပ်ရိက္ခာဖူလုံရေးကို ပံ့ပိုးပေးရန်၊ ဒေတာစင်တာများနှင့် တပိုင်းလျှပ်ကူးပစ္စည်းများကဲ့သို့သော စက်မှုလုပ်ငန်းများတွင် စင်ကာပူ၏ ရင်းနှီးမြှုပ်နှံမှုများကို ဆွဲဆောင်ရန်၊ ပြည်သူ့ကျန်းမာရေး၊ ဒစ်ဂျစ်တယ်စီးပွားရေးနှင့် သဘာဝပတ်ဝန်းကျင်ကို မထိခိုက်သော စီးပွားရေးကဏ္ဍများတွင် ပူးပေါင်းဆောင်ရွက်မှု ကိုမြှင့်တင်ရန် ဝန်ကြီးနှစ်ဦး က ဆွေးနွေးခဲ့ကြသည်။

ထို့အပြင် အာဆီယံစည်းလုံးညီညွတ်မှုကို အားကောင်းစေရေး၊ အမေရိက အကောက်ခွန်စည်းကြပ်မှုများ၏ အကျိုးဆက်များကို ဖြေရှင်းရေးနှင့် မြန်မာနိုင်ငံ၊ ကမ္ဘောဒီးယားနိုင်ငံတို့၏ အခြေအနေများကို ဆွေးနွေးခြင်းအပါအဝင် ဒေသတွင် ကိစ္စရပ်များအပေါ် ဝန်ကြီးနှစ်ဦး အမြင်ခြင်းဖလှယ်ခဲ့ကြကြောင်း သိရသည်။

Ref: ဘန်ကောက်ပို့စ်