ထိုင်းဝန်ကြီးချုပ်ဟောင်းဒီမိုကရက်ခေါင်းဆောင်တ‌ ကျော့ ပြန်ဖြစ်လာ

ထိုင်းဝန်ကြီးချုပ်ဟောင်း အဘီဇစ် ဝေဇ္ဇာဇီဝသည် စနေနေ့က ဘန်ကောက်မြို့၌ ကျင်းပသော ပါတီ၏ အထူးအထွေထွေညီလာခံတွင် မဲအပြတ်အသတ်ဖြင့် အနိုင်ရကာ ဒီမိုကရက်ပါတီ၏ ခေါင်းဆောင်အဖြစ် တကျော့ပြန်ရောက်ရှိလာခဲ့ပြီဖြစ်သည်။

“အစည်းအဝေးကို ညီညီ ညွတ်ညွတ်တက်ရောက်လာကြပြီး ကျွန်တော့်ကို ထပ်မံယုံကြည်အပ်နှင်းပေးကြသူအားလုံးကို ကျေးဇူးတင်ပါတယ်” ဟု မစ္စတာ အဘီဇစ်က ၎င်း၏ အောင်ပွဲခံမိန့်ခွန်းတွင် ပြောကြားခဲ့သည်။

Lak Si ခရိုင် Miracle Grand Convention ဟိုတယ်တွင် ကျင်းပပြုလုပ်ခဲ့သည့် အစည်းအဝေးတွင် ပါတီ၏ အမှုဆောင်ကော်မတီအသစ်ကိုလည်း ရွေးချယ်တင်မြှောက်ခဲ့သည်။ အစည်းအဝေးကို လက်ရှိနှင့် ယခင်လွှတ်တော်အမတ်များ၊ ဝန်ကြီးဟောင်းများနှင့် ပါတီဝင်များ တက်ရောက်ခဲ့ကြသည်။

ပါတီဒုတိယခေါင်းဆောင်ဟောင်း Therdpong Chaiyanan က မစ္စတာအဘီဇစ်ကို ပါတီခေါင်းဆောင်နေရာအတွက် အမည်စာရင်းတင်ခဲ့ခြင်းဖြစ်သည်။ ပါတီခေါင်းဆောင်နေရာအတွက် အခြား အဆိုပြုခံရသော ကိုယ်စားလှယ်လောင်းများ မရှိခဲ့ပေ။

ရွေးကောက်ပွဲကော်မရှင်၏ လုပ်ထုံးလုပ်နည်းအရ ခေါင်းဆောင်သစ် ကိုမဲပေး‌ ရွေးချယ်ရာလက်ရှိလွှတ်တော်အမတ်များ( ၄၀ ရာခိုင်နှုန်း)၊ လွှတ်တော်အမတ်ဟောင်းများ( ၄၀ ရာခိုင်နှုန်း) နှင့် ပါတီဝင်များ( ၂၀ ရာခိုင်နှုန်း) ဟူ၍ အုပ်စုသုံးခုမှ ရွေးချယ်တင်မြှောက်ခဲ့ခြင်းဖြစ်သည်။

အောက်စ်ဖို့ဒ်ဘွဲ့ရ မစ္စတာအဘီဇစ်သည် ထောက်ခံမဲ ၉၆ ဒဿမ ၂ ရာခိုင်နှုန်းဖြင့် အနိုင်ရခဲ့ပြီး စည်းဝေးပွဲခန်းမအတွင်းမှ ပါတီဝင်များက လက်ခုပ်သြဘာပေးခဲ့ကြသည်။

အသက် ၆၁ နှစ်အရွယ် မစ္စတာအဘီဇစ်သည် ဒီမိုကရက်ပါတီ၏ ၇ ဦးမြောက် ခေါင်းဆောင်အဖြစ် ၂၀၀၅ ခုနှစ် မတ်လမှ ၂၀၁၉ ခုနှစ် မတ်လအထိ ထမ်းဆောင်ခဲ့သည်။ ယင်းနောက် သူပါတီဝင်အဖြစ်မှ နုတ်ထွက်သွားခဲ့ပြီးနောက် ၂ နှစ်အကြာတွင် ပါတီ၏ ၁၀ ဦးမြောက်ခေါင်းဆောင်အဖြစ် တကျော့ပြန်ရောက်ရှိလာခြင်းဖြစ်သည်။

Ref: ဘန်ကောက်ပို့စ်