၂၀၂၃ -၂၀၂၄ ဘဏ္ဍာနှစ်ဖြစ်သည့် ဧပြီလမှ ဇွန်လကုန်အထိ သုံးလတာကာလအတွင်း ရှမ်းပြည်နယ်မှ ထိုင်းနိုင်ငံသို့ အမေရိကန်ဒေါ်လာ ၁၉ ဒသမ ၇၉၃ သန်းကျော် တန်ဖိုးရှိ ပြောင်း (၆၃၇၆၆) တန် တင်ပို့ရောင်းချခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ စာရင်းများအရ သိရသည်။
မြန်မာနိုင်ငံမှ ထိုင်းနိုင်ငံသို့ ပြောင်းသီးနှံများ တင်ပို့ရောင်းချရာတွင် နှစ်နိုင်ငံသဘောတူညီချက်အရ နှစ်စဉ် ဖေဖော်ဝါရီလမှ စတင်ကာ ဩဂုတ်လအထိ အခွန်ကင်းလွတ်ခွင့်ဖြင့် တင်ပို့ခွင့်ရရှိထားကြောင်း သိရသည်။
ယင်းကဲ့သို့ အခွန်ကင်းလွတ်ခွင့်တနှစ်လျှင် (၇)လ ရထားသည့်အတွက် လက်ရှိကာလတွင် မြန်မာနိုင်ငံ ရှမ်းပြည်နယ်အတွင်းမှ ထွက်ရှိ ပြောင်းများကို ထိုင်းနိုင်ငံသို့ တင်ပို့ရောင်းချမှုမြင့်တက်နေခြင်းဖြစ်သည်။
ယင်းသို့ တင်ပို့ရောင်းချလျက်ရှိရာ ယခုနှစ် ဧပြီလတွင် အမေရိကန် ဒေါ်လာ ၄ ဒသမ ၁၂၂ သန်း တန်ဖိုးရှိ ပြောင်း ၁၃၂၄၂ တန်၊ မေလတွင် အမေရိကန်ဒေါ်လာ ၈ ဒသမ ၁၂၁ သန်းတန်ဖိုးရှိ ပြောင်း ၂၆၁၅၁ တန်၊ ဇွန်လတွင် အမေရိကန်ဒေါ်လာ ၇ ဒသမ ၅၅ သန်းတန်ဖိုးရှိ ပြောင်း ၂၄၃၇၃ တန်၊ စုစုပေါင်း အမေရိကန်ဒေါ်လာ ၁၉ ဒသမ ၇၉၃ သန်းတန်ဖိုးရှိ ပြောင်း ၆၃၇၆၆ တန် တင်ပို့ရောင်းချထားခြင်းဖြစ်ကြောင်း သိရသည်။
အဆိုပါ သုံးလတာကာလအတွင်းတွင် ရှမ်းပြည်နယ် တာချီလိတ်ဒေသမှ ပြောင်းလုပ်ငန်းရှင်များက ခိုလမ်၊ နမ့်စန်၊ လင်းခေး၊ မိုင်းနောင်၊ မိုင်းရှူးမြို့နယ်တို့မှ ပြောင်းများကို တာချိလိတ်နယ်စပ် ကုန်သွယ်ရေးစခန်းမှတဆင့် ထိုင်းနိုင်ငံသို့ တင်ပို့ရောင်းချပေးနေခြင်းဖြစ်ကြောင်း စုံစမ်းသိရသည်။
