ထိုင်ဝမ်ကျွန်းရဲ့ အရှေ့ဘက် ရေပြင်မှာ တရုတ်နိုင်ငံက အထူးဥပဒေစိုးမိုးရေး လုပ်ငန်းစဉ်တစ်ခုကို စီစဉ်လုပ်ဆောင်ခဲ့တယ်လို့ ဆင်ဟွာသတင်းဌာနက ပြောပါတယ်။
“ဒီလုပ်ဆောင်ချက်ဟာ ဂျပန်နဲ့ ဖိလစ်ပိုင်တို့က ထိုင်ဝမ်ကျွန်းအရှေ့ဘက် ပင်လယ်ရေပိုင်နက် နယ်နိမိတ်သတ်မှတ်ရေးအတွက် ဆွေးနွေးပွဲတွေ စတင်တော့မယ်ဆိုပြီး တစ်ဖက်သတ် ထုတ်ပြန်ခဲ့တာကို မဖြစ်မနေ တုံ့ပြန်လိုက်တာ ဖြစ်ပါတယ်။ ဂျပန်နဲ့ ဖိလစ်ပိုင်တို့ရဲ့ ထုတ်ပြန်ချက်ဟာ တရုတ်နိုင်ငံရဲ့ နယ်မြေအချုပ်အခြာအာဏာနဲ့ ရေပိုင်နက်ဆိုင်ရာ အခွင့်အရေးတွေကို ပြင်းပြင်းထန်ထန် ထိခိုက်စေပါတယ်” လို့ သတင်းဌာနက ဖော်ပြထားပါတယ်။
ဒီလှုပ်ရှားမှုတွေမှာ တရုတ်နိုင်ငံရဲ့ ဖူကျန်းပြည်နယ် ရေကြောင်းဘေးကင်းလုံခြုံရေးအာဏာပိုင်အဖွဲ့၊ ကွမ်တုံးပြည်နယ် ရေကြောင်းဘေးကင်းလုံခြုံရေးအာဏာပိုင်အဖွဲ့၊ အရှေ့တရုတ်ပင်လယ် ရေကြောင်းပို့ဆောင်ရေး ထောက်ပံ့မှုဗဟိုဌာနနဲ့ အရှေ့တရုတ်ပင်လယ် ကယ်ဆယ်ရေးအာဏာပိုင်အဖွဲ့တို့ ပါဝင်ခဲ့ကြပါတယ်။
ဆင်ဟွာသတင်းဌာနရဲ့ ပြောကြားချက်အရ ဒီလုပ်ငန်းစဉ်ရဲ့ အဓိကရည်ရွယ်ချက်တွေကတော့ –
တရုတ်နိုင်ငံရဲ့ ရေကြောင်းစီမံခန့်ခွဲမှုဥပဒေကို လိုက်နာမှုရှိစေဖို့၊ ရေနက်ပိုင်းဒေသတွေမှာ ကင်းလှည့်တဲ့စွမ်းရည်ကို ပိုကောင်းအောင် လုပ်ဆောင်ဖို့၊ အရေးပါတဲ့ ရေပြင်တွေမှာ သင်္ဘောတွေ သွားလာလှုပ်ရှားမှုကို ထိန်းချုပ်ဖို့ နဲ့ ရေကြောင်းသယ်ယူပို့ဆောင်ရေး ဘေးကင်းလုံခြုံစေဖို့နဲ့ အမျိုးသားအကျိုးစီးပွားကို ကာကွယ်စောင့်ရှောက်ဖို့တွေ ဖြစ်ကြောင်း သိရပါတယ်။