ထိုင်ဝမ်အတိုက်အခံခေါင်းဆောင်ကတရုတ်နှင့်ပြန်လည်ပေါင်းစည်းရေးကို ကတိပြု

ထိုင်ဝမ်အတိုက်အခံခေါင်းဆောင် ချန်လီဝမ်က ပါတီတည်ထောင်သူ ဆွန်ယက်ဆင်၏ စိတ်ဆန္ဒ အတိုင်း တရုတ်နိုင်ငံနှင့် ပြန်လည်သင့်မြတ်ရေးကို ရှာဖွေရန် ဗုဒ္ဓဟူးနေ့တွင် ကတိပြုခဲ့ပြီး ကွန်မြူနစ်တော်လှန်အပြီးတွင် နိုင်ငံ၏ အောင်မြင်မှုများအတွက် သူ၏ ဂူဗိမာန်တွင် ချီးကျူးဂုဏ်ပြုခဲ့သည်။

ပေကျင်းက ၎င်းပိုင်နယ်မြေဟု ရှုမြင်သော ထိုင်ဝမ်အပေါ် ပေကျင်း၏စစ်ရေးဖိအားများတိုးမြင့်လာနေချိန်နှင့် အတိုက်အခံလွှမ်းမိုးသော လွှတ်တော်တွင် အစိုးရက တင်ပြသော အပိုကာကွယ်ရေးအသုံးစရိတ် ဒေါ်လာ ၄၀ ဘီလျံကိစ္စကို ဆိုင်းငံ့ထားချိန်တွင် ထိုင်ဝမ်၏ အကြီးဆုံးအတိုက်အခံပါတီဖြစ်သော ကူမင်တန်ပါတီဥက္ကဌ ချန်သည် တရုတ်နိုင်ငံသို့ ရောက်ရှိနေခဲ့ခြင်းဖြစ်သည်။

နိုင်ငံသို့ ရောက်ရှိလာသည့် ပထမဆုံးနေ့တွင် အထိမ်းအမှတ်အခမ်းအနားများဖြင့် ပြည့်နှက်နေသော အခိုက်အတန့်တွင် ချန်သည် အရှေ့ပိုင်းမြို့ နန်ကျင်းရှိ ဆွန်၏ ဂူဗိမာန်တွင် ပန်းခွေချခဲ့သည်။ နန်ကျင်းသည် ပြည်တွင်းစစ်အတွင်း ကူမင်တန်တို့ မော်စီတုန်း၏ ကွန်မြူနစ်များကို စစ်ရှုံးကာ ၁၉၄၉ ခုနှစ်တွင် ထိုင်ဝမ်သို့ ထွက်မပြေးမီအချိန်က ကူမင်တန်ဦးဆောင်သော တရုတ်သမ္မတနိုင်ငံအစိုးရ၏ မြို့တော်လည်းဖြစ်သည်။

“မိုးကောင်းကင်အောက်ကလူတိုင်း တန်းတူညီမျှတယ် ဆိုတဲ့ ဆွန်ယက်ဆင်ရဲ့ စံနှုန်းတွေက အမြဲတမ်း တန်းတူညီမျှမှု၊ ပါဝင်မှုနဲ့ စည်းလုံးညီညွတ်မှုပါပဲ” ဟု ထိုင်ဝမ်ရုပ်သံလိုင်းများတွင် တိုက်ရိုက်ထုတ်လွှင့်မှုအတွင်း ချန်က ပြောဆိုထားခဲ့သည်။

“ထိုင်ဝမ်ရေလက်ကြားတလျှောက် ပြန်လည်သင့်မြတ်ရေးနဲ့ စည်းလုံးညီညွတ်မှုကို မြှင့်တင်ဖို့၊ ဒေသတွင်း ကြွယ်ဝချမ်းသာမှုနဲ့ ငြိမ်းချမ်းရေးကို ဖော်ဆောင်ဖို့ ကျွန်မတို့ အတူတကွ လုပ်ဆောင်သင့်ပါတယ်” ဟု ချန်က ဆိုခဲ့သည်။

နောက်ဆုံးအင်ပါယာမင်းဆက်ကို ဖြုတ်ချပြီး ၁၉၁၂ ခုနှစ်တွင် တရုတ်သမ္မတနိုင်ငံကို တည်ထောင်ခဲ့သည့် ဆွန်သည် ၁၉၂၅ ခုနှစ်တွင် ကင်ဆာရောဂါဖြင့် ကွယ်လွန်ခဲ့သည်။

ထိုင်ဝမ်တွင် သူ့ကို တရုတ်သမ္မတနိုင်ငံတည်ထောင်သူအဖြစ် တရားဝင်လေးစားကြသကဲ့သို့ တရုတ်နိုင်ငံတွင်လည်း ကွန်မြူနစ်ပါတီက သူ့ကို တရုတ်နိုင်ငံ၏ အမျိုးသားသူရဲကောင်းအဖြစ် ဂုဏ်ပြုကြသည်။ မော်စီတုန်းကမူ သူ့ကို “ကြီးကြယ်သော တော်လှန်ရေးရှေ့ဆောင်လမ်းပြ” အဖြစ် ကြေညာခဲ့သည်။

BiRef: စီအင်န်အေ