ထိုင်ဝမ်လွတ်လပ်ရေးကို ဆန့်ကျင်သည်–ရုရှားနိုင်ငံခြားရေးဝန်ကြီး

ရုရှားနိုင်ငံသည် မည်သည့်ပုံစံမျိုးဖြင့်မဆို ထိုင်ဝမ်လွတ်လပ်ရေးကို ဆန့်ကျင်ပြီး ထိုင်ဝမ်ကျွန်းသည် တရုတ်နိုင်ငံ၏ ခွဲထုတ်မရသော အစိတ်အပိုင်းတစ်ခုအဖြစ်သာ မှတ်ယူကြောင်း ရုရှားနိုင်ငံခြားရေးဝန်ကြီး ဆာဂေးလက်ဗ်ရော့ဗ်က ရုရှားနိုင်ငံပိုင်သတင်းဌာန တာ့စ်နှင့် အင်တာဗျူးတွင် ပြောကြားခဲ့သည်။

ထိုင်ဝမ်အရေးနှင့်ပတ်သက်၍ အများသိကြပြီးဖြစ်သည့် မော်စကို၏ ရပ်တည်ချက်သည် မပြောင်းလဲကြောင်း လက်ဗ်ရော့ဗ်က ထပ်လောင်းအတည်ပြုခဲ့သည်။ ထိုင်ဝမ်ကို တရုတ်နိုင်ငံ၏ အစိတ်အပိုင်းအဖြစ် ရုရှားက အသိအမှတ်ပြုကြောင်းနှင့် လွတ်လပ်ရေးဆီဦးတည်သည့် မည်သည့်လှုပ်ရှားမှုကိုမဆို ငြင်းပယ်ကြောင်း ဆက်လက်ပြောကြားခဲ့သည်ဟု တာ့စ်က ဖော်ပြသည်။

ထို့အပြင် ဂျပန်နိုင်ငံသည် စစ်အင်အားတိုးချဲ့မှုသို့ ဦးတည်သည့်လမ်းကြောင်းကိုလိုက်နေကြောင်း လက်ဗ်ရော့ဗ်က မှတ်ချက်ပြုခဲ့ပြီး ယင်းကိစ္စအပေါ် ဂရုတစိုက်စဉ်းစားဆောင်ရွက်ရန် ၎င်းက တိုက်တွန်းခဲ့သည်။ မကြာသေးခင်က တိုကျို၏ လုပ်ဆောင်ချက်များသည် ဒေသတွင်းတည်ငြိမ်ရေးအပေါ် အနုတ်လက္ခဏာဆောင်သော သက်ရောက်မှုရှိလာနိုင်ကြောင်းလည်း ၎င်းက သတိပေးခဲ့သည်။

ထိုအင်တာဗျူးတွင်ပင် အနောက်နိုင်ငံများသည် ထိုင်ဝမ်၏ ငွေကြေးနှင့် နည်းပညာမှ အကျိုးအမြတ်ရယူရန် နောက်တွန့်ခြင်းမရှိကြောင်း လက်ဗ်ရော့ဗ်က မှတ်ချက်ပြုခဲ့ပြီး တိုင်ဝမ်သို့ ဈေးကြီးသော အနောက်တိုင်းလက်နက်များ ရောင်းချပေးခြင်းနှင့် တစ်ပိုင်းလျှပ်ကူးပစ္စည်းထုတ်လုပ်မှုကို အမေရိကသို့ ရွှေ့ပြောင်းရန် ကြိုးပမ်းမှုများသည် တရုတ်နိုင်ငံအပေါ် စီးပွားရေးဖိအားပေးမှုပုံစံတစ်ခုအဖြစ် ရှုမြင်၍ရကြောင်း ပြောကြားခဲ့သည်ဟု တာ့စ်က ဖော်ပြသည်။

အဆိုပါမှတ်ချက်များသည် တရုတ်နိုင်ငံ၏ အချုပ်အခြာအာဏာဆိုင်ရာ ရပ်တည်ချက်ကို ရုရှားက ဆက်လက်ထောက်ခံခြင်းနှင့် အရှေ့အာရှရှိ လုံခြုံရေးဆိုင်ရာ ဒိုင်းနမစ်အရွေ့များအပေါ် စိုးရိမ်ပူပန်မှုကို ထင်ဟပ်စေကြောင်း နိုင်ငံခြားရေးဝန်ကြီးက ထုတ်ဖော်ပြောဆိုခဲ့သည်ဟု တာ့စ်က ဖော်ပြခဲ့သည်။

Ref: အိန္ဒိယအိတ်စပရက်စ်