တနင်္ဂနွေနေ့တွင် အမေရိကန်သမ္မတ ဒေါ်နယ်ထရမ့်နှင့် တွေ့ဆုံဆွေးနွေးရာ၌ ဒွန်းဘတ်စ်ဒေသအရေးနှင့် ပတ်သက်၍ ယူကရိန်းအတွက် ပိုမိုသာလွန်သော အနေအထားတစ်ရပ်ကို မရရှိခဲ့ပါက၊ သမ္မတ ဗလာဒီမာ ဇလန်းစကီးအနေဖြင့် ထရမ့်၏ ငြိမ်းချမ်းရေးအစီအစဉ်ကို ပြည်သူ့ဆန္ဒခံယူပွဲ(Referendum) ခံယူသွားမည်ဖြစ်ကြောင်း Axios သတင်းဌာနက ဖော်ပြထားသည်။
ဇလန်းစကီးနှင့် ဖုန်းဖြင့် အင်တာဗျူးမှုကို ကိုးကား၍ အဆိုပါသတင်းဌာနက ရေးသားရာတွင် ဇလန်းစကီးသည် ပဋိပက္ခကို အဆုံးသတ်ရန်အတွက် ထရန့်နှင့် မူဘောင်သဘောတူညီချက်တစ်ရပ် ရယူရန် စီစဉ်ထားကြောင်း သိရသည်။
“ဇလန်းစကီးက အဆိုပါအစီအစဉ်ကို ပြည်သူ့ဆန္ဒခံယူပွဲအထိ တင်ပြဖို့ ဆန္ဒရှိကြောင်း ထုတ်ဖော်ပြောဆိုခဲ့ပါတယ်” ဟု Axios က ရေးသားထားသည်။ “တိုးတက်မှုအများအပြား ရှိနေပြီဟု ဇလန်းစကီးက အလေးပေးပြောဆိုသော်လည်း၊ ထရန့်၏ အစီအစဉ်တွင် ယူကရိန်းအရှေ့ပိုင်း၌ နယ်မြေအလိုက်ပေးဆပ်ရမည့် နာကျင်ဖွယ်အချက်များ ပါဝင်နေဆဲဖြစ်သည်။ ဇလန်းစကီးက အဆိုပါအချက်များကို ပိုမိုကောင်းမွန်အောင် ညှိနှိုင်းရန် မျှော်လင့်နေဆဲဖြစ်ပြီး၊ အကယ်၍ နယ်မြေကိစ္စတွင် ‘ခိုင်မာသော’ အနေအထားတစ်ရပ် မရရှိခဲ့ပါက ယူကရိန်းပြည်သူများ၏ သဘောထားကို ရယူရန် လိုအပ်လိမ့်မည်ဟု ဆိုသည်။”ဟုလည်း ရေးသားထားသည်။
ဒီဇင်ဘာ ၂၄ ရက်နေ့တွင် ဇလန်းစကီးသည် အချက် ၂၀ ပါဝင်သော ငြိမ်းချမ်းရေးအစီအစဉ်ကို မီဒီယာများသို့ မျှဝေခဲ့ပြီး၊ ယင်းမှာ မကြာသေးမီက အမေရိကန်၌ ပြုလုပ်ခဲ့သော ဆွေးနွေးမှုများအတွင်း အမေရိကန်ဘက်သို့ တင်ပြခဲ့သည့် အစီအစဉ်ဖြစ်သည်ဟု ဆိုသည်။
အဆိုပါအစီအစဉ်တွင် ယူကရိန်းကျောင်းများ၌ ကွဲပြားသော ယဉ်ကျေးမှုများအပေါ် သည်းခံနိုင်စွမ်းရှိစေမည့် ပညာရေးအစီအစဉ်များ ထည့်သွင်းရန်၊ နယ်မြေဆိုင်ရာကိစ္စရပ်များကို ကိုင်တွယ်ရန်၊ ဒွန်းဘတ်စ်ဒေသမှ ယူကရိန်းတပ်များ ရုပ်သိမ်းပေးရန်ကို ငြင်းဆိုရန်၊ နေတိုး (NATO) ၏ အပိုဒ် ၅ နှင့် ဆင်တူသော လုံခြုံရေးအာမခံချက်များ တောင်းဆိုရန်၊ ယူကရိန်းတွင် ငြိမ်းချမ်းရေးကာလ၌ စစ်သည်အင်အား ၈ သိန်းရှိသော စစ်တပ်ရှိရန် လိုအပ်ချက်ကို အလေးပေးရန်၊ ယူကရိန်း၏ နျူကလီးယားကင်းစင်သော အဆင့်အတန်းကို သတ်မှတ်ရန်၊ ဇာပိုရီရှား (Zaporozhye) နျူကလီးယားစက်ရုံ၏ အခြေအနေကို မှတ်တမ်းတင်ရန်၊ ဒနီပါ (Dnieper) မြစ်အတွင်း လွတ်လပ်စွာ ရေကြောင်းသွားလာခွင့် ရရှိစေရန်၊ သုံ့ပန်းအားလုံး အပြန်အလှန်လဲလှယ်ရန်နှင့် ယူကရိန်းတွင် သမ္မတရွေးကောက်ပွဲ ကျင်းပရန် တို့ပါဝင်သည်။
နယ်မြေဆိုင်ရာကိစ္စရပ်များနှင့် ဇာပိုရီရှား နျူကလီးယားစက်ရုံ အခြေအနေတို့နှင့် ပတ်သက်၍မူ အမေရိကန်နှင့် ယူကရိန်းကြား ယနေ့ထက်တိုင် အပေးအယူတည့်သည့် သဘောတူညီချက် မရရှိသေးပေ။
တစ်ဖက်တွင်လည်း ရုရှားဒုတိယနိုင်ငံခြားရေးဝန်ကြီး ဆာဂေး ရိုင်ဘော့ကော့ဗ် (Sergey Ryabkov) က ဇလန်းစကီး၏ အစီအစဉ်မှာ “အစီအစဉ်လို့ ခေါ်နိုင်မယ်ဆိုရင်တောင်မှ၊ ဒီဇင်ဘာလဆန်းပိုင်းကစလို့ အမေရိကန်နဲ့ ရုရှားတို့ ဆွေးနွေးနေခဲ့တဲ့ အချက် ၂၇ ချက်နဲ့ လုံးဝကို ကွဲပြားခြားနားနေပါတယ်” ဟု ပြောကြားခဲ့သည်။