ရန်ကုန်တိုင်းဒေသကြီး၊ ထန်းတပင်မြို့နယ် မြစိမ်းရောင်စက်မှုဇုန်၊ အကွက်အမှတ် C-4 ငါးအအေးခန်းတွင် ယနေ့ နိုဝင်ဘာ (၇) ရက်၊ နံနက် အစောပိုင်း (၃)နာရီ (၃၁)မိနစ်အချိန်ခန့်က မီးလောင်မှု တစ်ခုဖြစ်ပွားခဲ့ကြောင်း မီးသတ်တပ်ဖွဲ့သတင်းများအရ သိရသည်။
အဆိုပါ ငါးအအေးခန်းတွင် မီးလောင်မှုဖြစ်ပွားကြောင်း သတင်းအရ ထန်းတပင်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ လှိုင်သာယာမြို့နယ်မီးသတ်စခန်းမှ မီးငြှိမ်းသတ်ယာဉ်(၂)စီး၊ သန္ဓေမီးသတ်တပ်ဖွဲ့ဝင်များဖြင့် ထွက်ခွာငြှိမ်းခဲ့ရာ နံနက် (၃)နာရီ (၅၃)မိနစ်အချိန်တွင် မီးငြှိမ်းသတ်နိုင်ခဲ့ကြောင်း သိရသည်။
အဆိုပါ မီးလောင်မှုဖြစ်စဉ်နှင့် ပတ်သက်၍ ထိခိုက်ပျက်စီးဆုံးရှုံးမှုတန်ဖိုးနှင့် မီးလောင်မှုအကြောင်းရင်းကို မီးသတ်တပ်ဖွဲ့မှ ဆက်လက်စစ်ဆေးကာ လိုအပ်သည်များ လုပ်ဆောင်သွားမည်ဖြစ်ကြောင်း သိရသည်။
အလားတူ ယမန်နေ့ နိုဝင်ဘာ (၆)ရက်၊ နံနက် (၀၀)နာရီ (၅၈)မိနစ်အချိန်ခန့်ကလည်း ရန်ကုန်တိုင်းဒေသကြီး၊ လှိုင်သာယာ (အရှေ့ပိုင်း)မြို့နယ်၊ အမှတ်(၁)ရပ်ကွက်၊ စက်မှုဇုန်အပိုင်း(၂) တပင်ရွှေထီးလမ်းရှိ တာယာဂိုဒေါင်တစ်လုံး မီးလောင်မှုဖြစ်ပွားခဲ့ကြောင်း မီးသတ်တပ်ဖွဲ့ သတင်းများအရ သိရသည်။
အဆိုပါ မီးလောင်မှုဖြစ်ပွားကြောင်း သတင်းအရ လှိုင်သာယာမြို့နယ်မီးသတ်စခန်းမှ မီးငြှိမ်းသတ်ယာဉ် (၉)စီး၊ ရေသယ်ယာဉ် (၁၂)စီး၊ အုပ်ချုပ်မှုယာဉ် (၁)စီး၊ သန္ဓေအရံမီးသတ်တပ်ဖွဲ့ဝင် (၁၂၀) ကျော်ဖြင့် တစ်နာရီကျော်ကြာ မီးငြှိမ်းသတ်ခဲ့ရာ နံနက် (၁)နာရီခွဲအချိန်တွင် မီးထိန်းနိုင်ခဲ့ပြီး နံနက် (၂)နာရီ (၉)မိနစ်အချိန် မီးငြှိမ်းသတ်နိုင်ခဲ့ကြောင်း သိရသည်။
မီးလောင်မှုမှာ အလျားပေ (၁၈၀)၊ အနံပေ (၁၀၀)ရှိသော Steel Structure အဆောက်အအုံတွင် လုပ်ငန်းသိမ်းချိန်၌တာယာအမှုန့်ကြိတ်စက်ကို ပိတ်ထားခဲ့သော်လည်း စက်အတွင်းရှိ တာယာအမှုန့်များ အပူရှိန်ကျန်ရှိခဲ့ရာ အချိန်ကြာလာသည့်အခါ အပူချိန်မြင့်တက်လာရာမှ မီးစတင်လောင်ကျွမ်းခဲ့ခြင်းဖြစ်ကြောင်း သတင်းများအရ သိရသည်။
ဖြစ်စဉ်ကြောင့် တာယာအမှုန့်ကြိတ်စက် (၁) လုံးနှင့် တာယာအဟောင်းများ မီးလောင်ကျွမ်းခဲ့သဖြင့် တာယာဂိုဒေါင်ပိုင်ရှင် အသက် (၃၁) နှစ်အရွယ် အမျိုးသား တစ်ဦးကို မီးပေါ့ဆစွာသုံးစွဲမှု ရာဇသတ်ကြီး ဥပဒေ ပုဒ်မ ၂၈၅ ဖြင့် လှိုင်သာယာ(အရှေ့ပိုင်း) မြို့နယ် မြို့မရဲစခန်းက အမှုဖွင့်ထားကြောင်း သတင်းများအရ သိရသည်။
ထို့အတူ ယမန်နေ့ နိုဝင်ဘာ (၆)ရက်၊ ညနေ (၄)နာရီ (၄၉)မိနစ်အချိန်ခန့်ကလည်း ရန်ကုန်တိုင်းဒေသကြီး၊ လမ်းမတော်မြို့နယ်၊ (၁၆)လမ်း အလယ်ဘလောက်ရှိ လူနေအိမ်ခန်း တိုက် (၆)လွှာတွင် မီးလောင်မှု ဖြစ်ပွားခဲ့ကြောင်း သိရသည်။
အဆိုပါ မီးလောင်မှုဖြစ်ပွားရာသို့ ကျောက်တံတားမြို့နယ်မီးသတ်စခန်းမှ မီးသတ်ယာဉ်(၄)စီးနှင့် လူမှုကူညီကယ်ဆယ်ရေးအသင်းများ ထွက်ခွာငြှိမ်းသတ်ခဲ့ရာ ညနေ (၅)နာရီတွင် မီးထိန်းနိုင်ခဲ့ပြီး ညနေ(၅)နာရီ (၆)မိနစ်အချိန်တွင် မီးငြှိမ်းသတ်နိုင်ခဲ့ကြောင်း သိရသည်။
