တွံတေးမြို့တွင် အဌားကားစီးလာသည့် ရပ်ကျေးအဖွဲ့ဝင်များ သေနတ်ဖြင့်ပစ်ခတ်ခံရ ၅ ဦးသေဆုံးပြီး ၁ ဦးဒဏ်ရာရ
ရန်ကုန်တိုင်း၊တွံတေးမြို့နယ်၊ဇီးဖြူကုန်းကျေးရွာတွင် သြဂုတ် ၂၂ ရက်ညနေပိုင်းက အဌားကားစီးလာသည့် ရပ်ကျေးအဖွဲ့ဝင်များ သေနတ်ဖြင့်ပစ်ခတ်ခံခဲ့ရသဖြင့် ၅ ဦးသေဆုံးကာ ၁ ဦးထိခိုက်ဒဏ်ရာရရှိခဲ့ကြောင်း သိရသည်။
ယင်းနေ့ညနေ ၄ နာရီခွဲခန့်တွင် လက်နက်ကိုင်အဖွဲ့ဝင်များက ဇီးဖြူကုန်းကျေးရွာအဝင် မြကန်သာလမ်းဆုံအနီး၌ အဌားကားဖြင့်ပြန်လာသည့် ဇီးဖြူကုန်းကျေးရွာအုပ်ချုပ်ရေးမှူးဦးခင်ညွှန့် အပါအဝင် ရပ်ကျေးအဖွဲ့ဝင်များအား သေနတ်ဖြင့်ပစ်ခတ်ခဲ့ကြခြင်းဖြစ်ကြောင်း သိရသည်။
ထိုသို့ ပစ်ခတ်ခံရမှုကြောင့် ကျေးရွာအုပ်ချုပ်ရေးမှူးဦးခင်ညွန့်၊ရာအိမ်မှူးများဖြစ်သည့် ဦးအေးမြင့်၊ဦးဝင်းဇော်၊ဦးသန်းဌေး၊ကိုဘိုဘိုနှင့်အငှားကားမောင်းသူတို့မှာ ကျည်ထိမှန်ဒဏ်ရာများဖြင့် အခင်းဖြစ်နေရာ၌ သေဆုံးသွားခဲ့ကြောင်း သိရသည်။
အလားတူ ရာအိမ်မှူးတစ်ဦးဖြစ်သည့် ဦးစန်းလွင်တွင်လည်း ကျည်ထိမှန်ဒဏ်ရာအများအပြားရရှိခဲ့သဖြင့် ဆေးရုံသို့ပို့ဆောင်ကာ အရေးပေါ်ဆေး ကုသမှုများခံယူနေရသည်ဟု သိရသည်။
အဆိုပါ ပစ်ခတ်မှုဖြစ်စဥ်အား မြို့ပြပြောက်ကျား (တွံတေး)ကပြုလုပ်ခဲ့ခြင်းဖြစ်ကြောင်း ထုတ်ပြန်ထားသည်။
ထို့ကြောင့် ပြစ်မှုကျူးလွန်သူများအား ဖမ်းဆီးရ မိရေးနှင့်ဥပဒေအရထိရောက်စွာအရေးယူနိုင်ရေးတို့အတွက် လုံခြုံရေးအဖွဲ့ဝင်များက ပိတ်ဆို့ရှာ ဖွေစစ်ဆေးမှုများပြုလုပ်လျက်ရှိကြောင်း သိရသည်။