တောင်သူလယ်သမားများ၊ ရေလုပ်သားများကြွေးမှီကင်းရှင်းအောင်ဆောင်ရွက်သွားမည်ဟု ဧရာဝတီတိုင်း၊ မဲဆန္ဒနယ်အမှတ် (၁) ၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၏ အမျိုးသားလွှတ်တော်ကိုယ်စားလှယ်လောင်း ဦးမြင့်ကြိုင်က ပြောသည်။
အမျိုးသားလွှတ်တော်ကိုယ်စားလှယ်လောင်းဦးမြင့်ကြိုင်မှ ယနေ့ ဒီဇင်ဘာ ၁၀ ရက်နံနက်ပိုင်းက ဧရာဝတီတိုင်း၊ မြောင်းမြမြို့၌ ဒေသခံများနှင့် တွေ့ဆုံပွဲ၌ ပြောကြားခဲ့ခြင်းဖြစ်သည်။
ထို့ပြင် စီးပွားရေးဖွံ့ဖြိုးတိုးတက်ပြီး ခိုင်မာသည့်နိုင်ငံဖြစ်ရမည်ဖြစ်ကာ ဧရာဝတီတိုင်းသားများသည် စိုက်ပျိုးရေးလုပ်ငန်းများ၊ ရေလုပ်ငန်းများလုပ်ကိုင်ကြသဖြင့် စိုက်ပျိုးမွေးမြူရေးလုပ်ငန်းများဖွံ့ဖြိုး၍ လက်ရှိဖြစ်ပေါ်နေသည့် အနေအထားများ၊ ဖွံ့ဖြိုးမှုများထက်ပိုမိုကြွယ်ဝချမ်းသာလာစေရန် တောင်သူလယ်သမားများ၊ ရေလုပ်သားများကြွေးမှီကင်းရှင်းရန် ဆောင်ရွက်သွားမည်ဟု ပြောသည်။
တွေ့ဆုံပွဲတွင် ပြည်သူ့လွှတ်တော် (FPTP) ကိုယ်စားလှယ်လောင်း ဒေါ်မြင့်စန္ဒာအောင်၊ အမျိုးသားလွှတ် တော် (FPTP) ကိုယ်စားလှယ်လောင်းဦးထိန်လင်း၊ အမျိုးသားလွှတ်တော် (PR) ကိုယ်စားလှယ်လောင်း ဦးပြုံးချို၊ တိုင်းဒေသကြီးလွှတ်တော် (FPTP) ကိုယ်စားလှယ်လောင်း ဦးစိုးနိုင်နှင့် တိုင်းဒေသကြီးလွှတ်တော် (PR) ကိုယ်စားလှယ်လောင်း ဒေါ်နီနီဝင်းတို့မှလည်း မိတ်ဆက်စကားများပြောကြားခဲ့ကြသည်။