တောင်တရုတ်ပင်လယ်မှာဖိလစ်ပိုင်ကင်းလှည့်တာကိုခြေရာခံမိ–တရုပ်

ပေကျင်း၊ နိုဝင်ဘာ ၁

အငြင်းပွားဖွယ် တောင်တရုတ်ပင်လယ်တွင် ဖိလစ်ပိုင်က စီစဉ်သည့် ပူးတွဲကင်းလှည့်မှုကို အောက်တိုဘာလ ၃၀ ရက်နေ့နှင့် အောက်တိုဘာလ ၃၁ ရက် နေ့တို့တွင် စောင့်ကြည့်ခဲ့ကြောင်း တရုတ်စစ်တပ်က စနေနေ့တွင် ပြောကြားခဲ့သည်။

ဝါရှင်တန်နှင့် မနီလာတို့သည် စစ်ဘက်ဆိုင်ရာ ပူးပေါင်းဆောင်ရွက်မှုကို အရှိန်မြှင့်ကာ နှစ်စဉ် သင်္ဘောဖြင့် ကူးသန်းရောင်းဝယ်နေသည့် ဒေါ်လာ ၃ ထရီလျံကျော်တန် တောင်တရုတ်ပင်လယ် အပါအဝင် ဒေသများအတွက် ပူးတွဲလုပ်ငန်းအဖွဲ့သစ်တစ်ရပ်ကို ဖွဲ့စည်းရန် အစီအစဉ်များကို သောကြာနေ့တွင် ထုတ်ဖော်ခဲ့သည်။

တရုတ်ပြည်သူ့လွတ်မြောက်ရေးတပ်မတော် တောင်ပိုင်းကွပ်ကဲမှုဌာနမှ ပြောရေးဆိုခွင့်ရှိသူ တီယန်ဂျန်လီ က အမည်မဖော်လိုသည့် မိတ်ဖက်များနှင့်အတူ ကင်းလှည့်ခြင်းသည် ဒေသတွင်း ငြိမ်းချမ်းရေးနှင့် တည်ငြိမ်ရေးကို ဆိုးရွားစွာ ထိခိုက်စေကြောင်း ပြောကြားခဲ့သည်။ တရုတ်က ဖိလစ်ပိုင်ကို ဒေသတွင်းမှာ ဒုက္ခပေးသူလို့ ခေါ်ဆိုထားသည်။

“ကွပ်ကဲမှုတပ်ဖွဲ့များသည် သတိကြီးစွာ၊ နိုးကြားစွာဖြင့်ရှိနေပြီး နိုင်ငံတော်၏ ပိုင်နက်အချုပ်အခြာအာဏာနှင့် ရေကြောင်းဆိုင်ရာ အခွင့်အရေးများနှင့် အကျိုးစီးပွားများကို ပြတ်ပြတ်သားသားကာကွယ်ပေးလိမ့်မည်” ဟု တီယန်က ကြေညာချက်တွင် ထည့်သွင်းပြောကြားခဲ့သည်။

ပေကျင်းရှိ ဖိလစ်ပိုင်သံရုံးသည် မှတ်ချက်ပေးရန် အီးမေးလ်ပေးပို့တောင်းဆိုမှုကို ချက်ချင်းတုံ့ပြန်ခြင်းမရှိကြောင်းသိရသည်။

သြစတြေးလျ၊ နူးဇီလန်၊ ဖိလစ်ပိုင်နှင့် အမေရိကတို့သည် တောင်တရုတ်ပင်လယ်၌ အောက်တိုဘာလ ၃၀ ရက်နေ့နှင့် ၃၁ ရက်နေ့တို့တွင် စစ်ရေးလေ့ကျင့်မှုကို ပြုလုပ်ခဲ့သည်။

လွတ်လပ်၍ ပွင့်လင်းသော အင်ဒို-ပစိဖိတ်ဒေသကို ပံ့ပိုးကူညီရန်အတွက် ဒေသတွင်းနှင့် နိုင်ငံတကာပူးပေါင်းဆောင်ရွက်မှု အားကောင်းစေရန်ရည်ရွယ်ကြောင်း အမေရိကန် အမှတ် ၇ ရေတပ်မဟာက ပြောကြားခဲ့ပါသည်။

ဘရူနိုင်း၊ အင်ဒိုနီးရှား၊ မလေးရှား၊ ဖိလစ်ပိုင်နှင့် ဗီယက်နမ်တို့က ပိုင်ဆိုင်သည့် အစိတ်အပိုင်းများအပါအဝင် တောင်တရုတ်ပင်လယ်တစ်ခုလုံးနီးပါးကို တရုတ်နိုင်ငံက သူပိုင်ဆိုင်ကြောင်း အခိုင်အမာပြောဆိုထားသည်။

၂၀၁၆ ခုနှစ်တွင် သည်ဟိတ်မြို့ရှိ အမြဲတမ်း ဖျန်ဖြေရေးတရားရုံးက တရုတ်နိုင်ငံ၏ ပိုင်ဆိုင်ကြောင်းပြောကြားချက်များကို နိုင်ငံတကာဥပဒေအရ အထောက်အထားမရှိကြောင်း ဆုံးဖြတ်ခဲ့ပြီး အဆိုပါဆုံးဖြတ်ချက်ကိုလည်း ပေကျင်းက ပြန်လည်ငြင်းဆိုပယ်ချခဲ့သည်။

Ref: ရို-က်တာ