တောင်ကြီး၊ ဇူလိုင် ၂၀
ရှမ်းပြည်နယ်၊ တောင်ကြီးမြို့၌ Myanmar Women’s League 2026-27 ပြိုင်ပွဲ၏ အိမ်ကွင်းပွဲစဉ်များကို ပထမဆုံးအကြိမ် လက်ခံကျင်းပမည့် အမျိုးသမီးကလပ်အသင်းအဖြစ် ရှမ်းယူနိုက်တက်အသင်းက ဇူလိုင်လအတွင်း အိမ်ကွင်းပွဲစဉ်နှစ်ပွဲ ယှဉ်ပြိုင်ကစားသွားမည် ဖြစ်သည်။
ရှမ်းယူနိုက်တက် အမျိုးသမီးအသင်းသည် ဒေသခံဘောလုံးပရိသတ်များ အမျိုးသမီးဘောလုံးပြိုင်ပွဲများကို အနီးကပ် ကြည့်ရှုအားပေးနိုင်ရန်နှင့် ဒေသတွင်း ဘောလုံးအားကစား ဖွံ့ဖြိုးတိုးတက်ရေးကို အထောက်အကူပြုနိုင်ရန် ရည်ရွယ်၍ Myanmar Women’s League 2026-27 ပြိုင်ပွဲ၏ အပတ်စဉ် (၆) နှင့် (၇) အိမ်ကွင်းပွဲစဉ်များကို တောင်ကြီးမြို့ရှိ ပြည်နယ်အားကစားကွင်း၌ လက်ခံကျင်းပသွားမည်ဖြစ်ကြောင်း ထုတ်ပြန်ထားသည်။
ရှမ်းယူနိုက်တက်အသင်းသည် အပတ်စဉ် (၆) ပွဲစဉ်အဖြစ် ဇူလိုင် ၂၂ ရက် ညနေ ၃ နာရီခွဲတွင် ဇွဲကပင်ယူနိုက်တက်အသင်းနှင့် လည်းကောင်း၊ အပတ်စဉ် (၇) ပွဲစဉ်အဖြစ် ဇူလိုင် ၂၇ ရက် ညနေ ၃ နာရီခွဲတွင် ရန်ကုန်ယူနိုက်တက်အသင်းနှင့် လည်းကောင်း တောင်ကြီးမြို့ ပြည်နယ်အားကစားကွင်း၌ အိမ်ကွင်းပွဲစဉ်အဖြစ် ယှဉ်ပြိုင်သွားမည် ဖြစ်သည်။
ယခုကဲ့သို့ အိမ်ကွင်းပွဲစဉ်များ လက်ခံကျင်းပခြင်းကြောင့် ရှမ်းယူနိုက်တက်အသင်းသည် မြန်မာအမျိုးသမီးလိဂ်တွင် ရန်ကုန်ယူနိုက်တက်နှင့် ဧရာဝတီအသင်းတို့ပြီးနောက် အိမ်ကွင်းပွဲစဉ်များ လက်ခံကျင်းပသည့် တတိယမြောက် အမျိုးသမီးကလပ်အသင်း ဖြစ်လာမည်ဖြစ်သည်။
ထို့ပြင် အပတ်စဉ် (၇) ပွဲစဉ်ဖြစ်သော I.S.P.E အသင်းနှင့် ရန်ကုန်စီးတီးအသင်းတို့၏ ပွဲစဉ်ကိုလည်း မူလသတ်မှတ်ထားသည့်ရက်အစား ဇူလိုင် ၂၉ ရက် ညနေ ၃ နာရီခွဲတွင် ပဒုမ္မာအားကစားကွင်း၌ ပြောင်းလဲကျင်းပသွားမည်ဖြစ်ကြောင်း Myanmar Women’s League က အသိပေးထားသည်။