တောင်ကိုရီးယားနိုင်ငံဘက်ကို အမှိုက်သရိုက်ထုတ်တွေချိတ်ဆွဲထားတဲ့ မိုးပျံပူဖောင်းတွေ ပို့လွှတ်နေခြင်းအား ရပ်တန့်သွားမယ်လို့ မြောက်ကိုရီးယားက ပြောဆိုလိုက်ပြီး ယင်းအစီအစဉ်ဟာ သူတို့ ခံစားခဲ့ရတဲ့ မနှစ်မြို့ဖွယ်ရာကိစ္စတွေနဲ့ ပတ်သက်ပြီး တောင်ကိုရီးယားနိုင်ငံသားတွေကို အတွေ့အကြုံကောင်းကောင်း ပေးလိုက်နိုင်တယ်လို့ လည်း အခိုင်အမာဆိုခဲ့ပါတယ်။
မြောက်ကိုရီးယားရဲ့ မိုးပျံပူဖောင်းပို့လွှတ်မှုတွေ၊ မကြာသေးခင်က အခြားရန်စမှုလုပ်ရပ်တွေနဲ့ ပတ်သက်ပြီး မခံမရပ်နိုင်လောက်တဲ့ လက်တုန့်ပြန်မှုမျိုးနဲ့ မကြာခင်မှာ ပြစ်ဒဏ်ပေးသွားမယ်လို့ တောင်ကိုရီးယားက ပြောဆိုခဲ့အပြီးမှာ မြောက်ကိုရီးယားရဲ့ ကြေညာချက် ထွက်လာတာပါ။
လေ့လာသူတွေကတော့ တောင်ကိုရီးယားအနေနဲ့ နယ်စပ်လိုင်းပေါ်ကနေ မြောက်ကိုရီးယားဘက်ကို အသံချဲ့စက် ထုတ်လွှင့်မှုတွေ ပြန်စလုပ်လာဖွယ်ရှိတယ်လို့ သုံးသပ်ကြပါတယ်။ ယင်း အသံချဲ့စက်တွေနဲ့ ထုတ်လွှင့်မှုအတွင်း မြောက်ကိုရီးယားရဲ့ ဆိုးဝါးလှတဲ့ လူ့အခွင့်အရေးအခြေအနေတွေအပေါ် ဝေဖန်ထားတာတွေ၊ ကမ္ဘာ့သတင်းတွေနဲ့ ကေပေါ့ပ်သီချင်းတွေပါဝင်လေ့ရှိတယ်လို့ သိရပါတယ်။
မြောက်ကိုရီးယားရဲ့ လူဦးရေ ၂၆ သန်းအနက် အများစုဟာ နိုင်ငံခြား ရုပ်သံနဲ့ အသံလွှင့်အစီအစဉ်တွေကို တရားဝင် ကြည့်ရှု့နားထောင်ခွင့် မရှိကြတဲ့အတွက် ယင်းကဲ့သို့ ထုတ်လွှင့်မှုတွေအပေါ် မြောက်ကိုရီးယားဘက်က မခံမရပ်နိုင်ဖြစ်လေ့ရှိပါတယ်။
လက်ရှိမှာ မြောက်ကိုရီးယားဘက်က မိုးပျံပူဖောင်း ပို့လွှတ်တာတွေ ရပ်ဆိုင်းမယ်ဆိုတဲ့ ကြေညာချက်ကြောင့် တောင်ကိုရီးယားအနေနဲ့ ၎င်းတို့ရဲ့ ပြစ်ဒဏ်ပေး အစီအစဉ်တွေကို ဆက်လုပ်သွားမလားဆိုတာကတော့ လတ်တလောမှာ ရှင်းရှင်းလင်းလင်း မသိရသေးပါဘူး။
မြောက်ကိုရီးယားအနေနဲ့ မိုးပျံပူဖောင်း ပို့လွှတ်တာတွေကို ယာယီရပ်ဆိုင်းသွားမယ်လို့ မြောက်ကိုရီးယား ဒုတိယ ကာကွယ်ရေးဝန်ကြီး ကင်ကန်အီလ်က တနင်္ဂနွေညပိုင်းမှာ ထုတ်ပြန်ပြောဆိုခဲ့ပါတယ်။ ဒီအစီအစဉ်ဟာ တောင်ကိုရီးယားရဲ့ လက်ကမ်းစာစောင်တွေ ပို့လွှတ်ခဲ့မှုအား တန်ပြန်ဆောင်ရွက်ခဲ့ခြင်းဖြစ်တယ်လို့လည်း သူက ပြောဆိုသွားပါတယ်။
သူတို့ခံစားခဲ့ရတဲ့ မနှစ်မြို့ဖွယ်ရာ အတွေ့အကြုံတွေ၊ ပြန့်ကျဲနေတဲ့ အမှိုက်စက္ကူတွေကို လိုက်လံရှင်းလင်းဖို့ ကြိုးစားအားထုတ်ခဲ့ရပုံတွေနဲ့ ပတ်သက်ပြီး ROK (ကိုရီးယားသမ္မတနိုင်ငံ) မှ မျိုးနွယ်စုတွေကို အတွေ့ကြုံကောင်းကောင်း ပေးနိုင်ခဲ့တယ်လို့လည်း သူက ပြောဆိုသွားခဲ့ပါတယ်။
Ref: Politico