လတ်တလောတွင် တုပ်ကွေးရောဂါအမျိုးမျိုး မကြာခနဖြစ်ပွားမှုများရှိနေသည့်အတွက် ထပ်ဆောင်းကာကွယ်ဆေး လာရောက်ထိုးနှံနိုင်ကြောင်း ရန်ကုန်တိုင်းဒေသကြီး၊ ပြည်သူ့ကျန်းမာရေးနှင့် ကုသရေးဦးစီးဌာနမှူး ဒေါက်တာဌေးလွင်က ပြောကြားသည်။
“ကိုဗစ်ကာကွယ်ဆေး နောက်ဆုံးအကြိမ် ထိုးထားပြီး (၆) လပြည့်ပြီးသူ မည်သူမဆို ကျန်းမာရေးဌာနတွေမှာ ထပ်ဆောင်းကာကွယ်ဆေး လာထိုးလို့ရပါတယ်။ အကြိမ်ရေ ဘယ်လောက်ရယ်လို့ မသတ်မှတ်ထားပါဘူး။ ခြောက်လကျော်ပြီးတာနဲ့ ထိုးပေးမှာပါ။ လတ်တလော တုပ်ကွေးအမျိုးမျိုးကလည်း ဖြစ်နေကြတော့ ဆေးထိုးထားရင် ကာကွယ်နိုင်တာပေါ့။ တုပ်ကွေးဆိုတဲ့သဘောက ဆေးရဲ့အာနိသင်က ခြောက်လ၊ တစ်နှစ်ပဲ ခံတဲ့အတွက် ထပ်ဆောင်းကာကွယ်ဆေးထိုးဖို့ လိုပါတယ်” ဟု ဒေါက်တာ ဌေးလွင်က ပြောသည်။
ထပ်ဆောင်းကာကွယ် ဆေးထိုးနှံခြင်းဖြင့် ရောဂါကူးစက်မှုနှင့် ပြင်းထန်မှုတို့ကို လျော့နည်းစေနိုင်ခြင်း ( အထူးသဖြင့် နာတာရှည် ရောဂါ ခံစားနေရသူများနှင့် သက်ကြီးရွယ်အိုများ)၊ ရောဂါ၏ နောက်ဆက်တွဲ ပြဿနာဖြစ်သည့် ကိုယ်တွင်းအင်္ဂါများ ထိခိုက်ပျက်စီးမှုမှ အသက်အန္တရာယ်ဆုံးရှုံးမှု ဖြစ်သည်အထိ ဖြစ်ပေါ်ခြင်းမှ လျှော့ချနိုင်မည် ဖြစ်ကြောင်း သိရသည်။
အဆိုပါ အခြေအနေများကြောင့် အသက်ငါးနှစ်နှင့်အထက်ရှိသော ပြည်သူများအားလုံး ကျန်းမာရေးဌာနနှင့်ဆက်သွယ်၍ ကိုဗစ်-၁၉ ရောဂါကာကွယ်ဆေး ( ပထမအကြိမ်၊ ဒုတိယ အကြိမ်နှင့် ထပ်ဆောင်းကာကွယ်ဆေး) များကို မဖြစ်မနေ သွားရောက်ထိုးနှံကြရန် တိုက်တွန်းနှိုးဆော်ထားသည်။
လက်ရှိတွင် မြန်မာနိုင်ငံအတွင်း၌ ကိုဗစ် – ၁၉ ရောဂါ ကူးစက်မှုများ ပြန်လည်တွေ့ရှိနေရသော်လည်း ကူးစက်မှုနှုန်း ကျဆင်းနေပြီဖြစ်သည့်အပြင်ရောဂါပြင်းထန်မှုအခြေအနေ လျှော့နည်းလာခြင်းကြောင်း စိုးရိမ်ရမည့်အ ခြေအနေမဟုတ်ကြောင်းလည်း သိရသည်။
‘’ ကိုဗစ်-၁၉ နဲ့ ပတ်သက်ရင် ရန်ကုန်တိုင်းက တစ်နေ့ကို နှစ်ဦး၊ သုံးဦးက ပုံမှန်ဆိုသလို စစ်တဲ့အထဲမှာ တွေ့တယ်။ ကျန်တာတွေကတော့ တခြားတိုင်းနဲ့ ပြည်နယ်တွေကလာတဲ့ ဓာတ်ခွဲနမူနာတွေကို စစ်လို့တွေ့တဲ့ ရလဒ်တွေပါ။ သူလည်း ပုံမှန်တုပ်ကွေးလိုပဲ များများစစ်ရင် များများတွေ့နိုင်တယ်။ တွေ့ပေမယ့်လည်း ရောဂါက ပြင်းထန်မှုမရှိဘူးဆိုရင်တော့လည်း ပြဿနာမရှိပါဘူး။ လတ်တလောအနေအထားအရဆိုရင် ကိုဗစ်က စိတ်ပူစရာမရှိပါဘူး။ ဒါပေမယ့် ကိုဗစ်ကတော့ စောင့်ကြပ်ကြည့်ရှုနေရတဲ့ ရောဂါထဲမှာတော့ ပါနေတုန်းပါပဲ” ဟု ဒေါက်တာဌေးလွင်က ပြောကြားသည်။
ဇူလိုင်လအတွင်း တစ်နိုင်ငံလုံး၌ ကိုဗစ် – ၁၉ ပိုးတွေ့ရှိမှုအခြေအနေအရ ဇူလိုင်လ (၁) ရက်တွင် (၃၁) ဦး၊ ဇူလိုင်လ (၂) ရက်တွင် (၂၂) ဦး၊ ဇူလိုင်လ (၃) ရက်တွင် (၂၀) ဦး၊ ဇူလိုင်လ (၄) ရက်တွင် (၃၆) ဦး၊ ဇူလိုင်လ (၅) ရက်တွင် (၆၁) ဦး၊ ဇူလိုင်လ (၆) ရက်တွင် ပိုးတွေ့လူနာသစ် (၈၃) ဦး၊ ဇူလိုင်လ (၇) ရက်တွင် (၂၂) ဦး၊ ဇူလိုင်လ (၈) ရက်တွင် (၁၉) ဦး၊ ဇူလိုင်လ (၉) ရက်တွင် (၂၂)ဦးနှင့် ဇူလိုင်လ (၁၀) ရက်တွင် (၄၄) ဦးရှိကြောင်း ကျန်းမာရေးဝန်ကြီးဌာနက ထုတ်ပြန်ခဲ့သော အချက်အလက်များအရ သိရသည်။
