ပါဇာဆစ်ခ်၊ဖေဖော်ဝါရီ ၁၈
တုကီယေးနိုင်ငံ ပါဇာဆစ်ခ်မြို့၌ လွန်ခဲ့သော ၁၁ ရက်နေ့ကလှုပ်ခတ်ခဲ့သောငလျင်ကြောင့် ယခင်ကဘောလုံးကွင်းသည် ယခုအခါသေဆုံးသူများမြှုပ်နှံရာ သုဿန်အဖြစ်သို့ပြောင်းလဲသွားခဲ့ပြီး အမှိုက်ပုံများ၊အပျက်အစီးများနှင့်ပြည့်နှက်နေခဲ့သည်ဟုဖော်ပြထားသည်။
“သေဆုံးသွားတဲ့ကျွန်မတို့ရဲ့ဆွေမျိုးတွေကိုမြှုပ်နှံနိုင်ဖို့အတွက် ရုပ်အလောင်းပြန်ရဖို့ဆယ်ရက်လောက်စောင့်လိုက်ရပါတယ်” ဟု ၎င်း၏တူမ၊ တူမ၏ခင်ပွန်းနှင့် ကလေးနှစ်ယောက်အား မြှုပ်နှံသင်္ဂြိုဟ်ပေးနေသည့်အမျိုးသမီးတစ်ဦးကပြောကြားခဲ့သည်။
ဖေဖော်ဝါရီလ ၆ ရက်နေ့ကလှုပ်ခတ်ခဲ့သောငလျင်ကြောင့် တုကီယေးနှင့်၎င်း၏အိမ်နီးချင်းဆီးရီးယား၌ ယနေ့အချိန်ထိလူပေါင်း ၄၃,၀၀၀ ကျော်သေဆုံးခဲ့ပြီဖြစ်ကြောင်းသိရှိရသည်။သေဆုံးသူများအား အစ္စလာမ်ဓလေ့ထုံးတမ်းအတိုင်း သင်္ဂြိုဟ်နိုင်ရန်ပြင်ဆင်ထားပြီး ရုပ်အလောင်းများမှာလည်း ပုံလျက်ရှိနေကာ မွတ်စလင်ဘာသာရေးဆရာတစ်ဦးက ဓလေ့ထုံးတမ်းအတိုင်း သင်္ဂြိုဟ်ပေးနိုင်ရန်အဆင်သင့်စောင့်ဆိုင်းနေသည်။
လူများသည်မိမိတို့၏ဆွေမျိုးများအား သင်္ဂြိုဟ်နိုင်ရန် ရုပ်အလောင်းများအား အိတ်များနှင့်သင်္ချိုင်းသို့ဦးစွာသယ်ဆောင်သွားကြပြီး ရုပ်အလောင်းများမြှုပ်နှံရန်မြေတူးနေသံများနှင့် ထုံးတမ်းစဉ်လာနှင့်အညီပြိုင်တူဆုတောင်းရွတ်ဆိုသံများလည်းဆူညံနေခဲ့သည်။
အစ္စလာမ်ထုံးတမ်းစဉ်လာအရ သေဆုံးသူများအား မြန်နိုင်သမျှမြန်မြန်မြှုပ်နှံရမည်ဖြစ်သည်။သို့သော်လက်ရှိအခြေအနေနှင့်ရုပ်အလောင်းများအား အပျက်အစီးများအောက်မှပြန်လည်ရရှိရန်ခက်ခဲနေမှုများကြောင့် ဓလေ့ထုံးတမ်းများသည်လည်း အခြေနေအရပြောင်းလဲနေပြီဖြစ်သည်ဟု ဘာသာရေးအကြီးအကဲတစ်ဦးကပြောကြားခဲ့သည်။
ရုပ်အလောင်းများအား မြှုပ်နှံရန်အချို့နေရာများ၌ အခက်အခဲရှိနေသဖြင့် သေဆုံးသူများအား မိမိတို့ဆွေမျိုးသားချင်းဖြစ်ကြောင်းအတည်ပြုပြီးပါက အခြားမြို့နေရာများသို့ရွှေ့ပြောင်းသင်္ဂြိုဟ်ရသည်အထိဖြစ်လာခဲ့သည်။
အသက်ရှင်ကျန်ရစ်သူအများအပြားသည်လည်း မိမိတို့ဆွေမျိုးများ၏ရုပ်အလောင်းများအား သင်္ဂြိုဟ်ခွင့်ရရန်ရှာဖွေစောင့်ဆိုင်းနေကြပြီး သောကြာနေ့ကမူ တုကီယေးတစ်နိုင်ငံလုံးမှ လူထောင်ပေါင်းများစွာသည် ယနေ့အချိန်အထိအပျက်အစီးများအောက်မှမသယ်ထုတ်နိုင်သေးသော သေဆုံးသူများအတွက် စုပေါင်းဈာပနတစ်ခုကိုလည်းပြုလုပ်ပေးခဲ့ကြသည်ဟုသိရသည်။
Source : Reuters
