တိုင်းရင်းသားများအနေဖြင့် မိမိတို့၏ အခွင့်အရေး တောင်းဆိုနိုင်ရေး နိုင်ငံရေးစင်မြင့် လွှတ်တော်တွင် ပါ၀င်လာရမည်ဟု နစက ဥက္ကဋ္ဌ ပြောကြား

တိုင်းရင်းသားများအနေဖြင့် မိမိတို့၏ အခွင့်အရေး တောင်းဆိုနိုင်ရေး နိုင်ငံရေးစင်မြင့် လွှတ်တော်တွင် ပါ၀င်လာရမည်ဟု နစက ဥက္ကဋ္ဌ ပြောကြား

ဒီမိုကရေစီစနစ်တွင် လွှတ်တော်သည်နိုင်ငံရေးအရ အမြင့်ဆုံးဖြစ်ပြီး၊ တိုင်းရင်းသားများအနေဖြင့်လည်း မိမိတို့ဒေသ၏အခွင့်အရေးများကို တရားဥပဒေနှင့်အညီ တောင်းဆိုနိုင်ရေးအတွက် နိုင်ငံရေးစင်မြင့် လွှတ်တော်တွင် ပိုမိုပါ၀င်လာရမည်ဟု နစကဥက္ကဋ္ဌ ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။

ယနေ့ သြဂုတ် ၄ ရက် နံနက်ပိုင်းက နေပြည်တော် ဘုရင့်နောင်ရိပ်သာဧည့်ခန်းမဆောင်တွင် နစကဥက္ကဋ္ဌနှင့် ရှမ်းပြည်တိုးတက်ရေးပါတီ(SSPP)မှ ဒုတိယဥက္ကဋ္ဌ(၁) စဝ်ခေးတိုင်းဦးဆောင်သည့် ငြိမ်းချမ်းရေး ကိုယ်စား လှယ်အဖွဲ့နှင့် တွေ့ဆုံစဉ် တိုင်းရင်းသားအခွင့်အရေးနှင့် ပတ်သက်၍ အထက်ပါအတိုင်းပြောကြား ခဲ့ခြင်း ဖြစ်သည်။

ယင်းအပြင် ပါတီစုံ ဒီမိုကရေစီ လမ်းကြောင်းပေါ်သို့ ရောက်ရှိနိုင်ရေး တပ်မတော်မှ ကြိုးပမ်းဆောင်ရွက်နေမှုများ အပါအဝင် ဒီမိုကရေစီ စနစ်တွင် လွတ်လပ်စွာတွေးခေါ်ပြောဆိုပိုင်ခွင့် ၊ လုပ်ပိုင်ခွင့်များနှင့် လိုအပ်ချက်များကို ပြောဆိုနိုင်သည် ဖြစ်သော်လည်း ဥပဒေနှင့် အညီငြိမ်းချမ်းသည့် နည်းလမ်းများဖြင့်သာဆွေးနွေဆောင်ရွက်ရန်လိုကြောင်း တဆက်တည်း ပြောကြားခဲ့သည်။

လက်ရှိ ငြိမ်းချမ်းရေးတွေ့ဆုံဆွေးနွေးရာတွင် တိုင်းရင်းသား လက်နက်ကိုင်အဖွဲ့များ၏ တောင်းဆိုချက်များ၊ ဒေသနှင့် တိုင်းပြည်အတွက် အမှန်တကယ်လိုအပ်ပြီး ဖြစ်သင့်ဖြစ်ထိုက်သည်များကို ပွင့်လင်းစွာအကြေအလည် ဆွေးနွေးသွားကြမည်ဖြစ်ကြောင်းထပ်လောင်းပြောကြားသည်။

ထို့အပြင် ပြည်သူလူထုဆန္ဒနှင့် ကိုက်ညီသည့် ပါတီစုံဒီမိုကရေစီစနစ်ကျင့်သုံးဆောင်ရွက်နိုင်ရေး၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုတည်ဆောက်ရေးဆိုင်ရာကိစ္စရပ်များ ဆက်လက် ဆွေးနွေးခဲ့ကြသည်။

ရှမ်းပြည်တိုးတက်ရေးပါတီ ဒုတိယဥက္ကဋ္ဌ(၁) နှင့် ကိုယ်စားလှယ်အဖွဲ့များကလည်း ငြိမ်းချမ်းရေးတွေ့ဆုံ ဆွေးနွေးပွဲသို့ ပါ၀င်ဆွေးနွေးနိုင်ရန် ဖိတ်ခေါ်ပေးသည့်အတွက် အထူးဝမ်းမြောက်မိပြီး၊ ငြိမ်းချမ်းရေးအတွက် တက်ကြွစွာဆက်လက်ပါ၀င်သွားမည်ဖြစ်ကြောင်း၊ တိုင်းရင်းသားစည်းလုံးညီညွှတ်ရေးအတွက် ကြိုးပမ်းဆောင်ရွက်သွားမည်ဖြစ်ကြောင်း၊ ပါတီစုံဒီမိုကရေစီ စနစ်ကျင့်သုံးဆောင်ရွက်ရေးနှင့် ဒီမိုကရေစီ ဖက်ဒယ် ပြည်ထောင်စု တည်ဆောက်ရေးအတွက် သဘောထားအမြင်များကို ပြန်လည်ဆွေးနွေးခဲ့ကြောင်း သိရသည်။

ယင်းနောက် တပ်မတော်သည် တိုင်းပြည်ကို ထိန်းသိမ်းစောင့်ရှောက်သူအဖြင့် ဆက်လက်ဆောင်ရွက်သွားမည်ဖြစ်ပြီး၊ တိုင်းရင်းသားအဖွဲ့များအနေဖြင့်လည်း ဒီမိုကရေစီနှင့် ဖက်ဒရယ်အခွင့်အရေးကို ရရှိရန်အတွက် တရားဥပဒေနှင့် အညီ စည်းကမ်းနှင့် အညီ ၊ ဒီမိုကရေစီ ကျင့်စဉ်နှင့် အညီ လုပ်ကိုင်ဆောင်ရွက်ကြရန် တိုက်တွန်းပြောကြားခဲ့သည်။

နစက ဥက္ကဋ္ဌနှင့် SSPP ငြိမ်းချမ်းရေးကိုယ်စားလှယ်အဖွဲ့တို့ ဆွေးနွေးပြီးနောက် အမှတ်တရ လက်ဆောင်များပေးအပ်ခဲ့ပြီးနောက် အမျိုးသားစည်းလုံညီညွှတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီတို့ဖြင့် ဆက်လက်ဆွေးနွေးသွားမည်ဖြစ်ကြောင်း သိရသည်။