တာလီဘန်များ အာဏာရလာချိန်မှစ၍ အာဖဂန်ဒုက္ခသည် ၁၃၃ ဦးအား ဂျပန်လက်ခံထား

တာလီဘန်များ အာဏာရလာချိန်မှစ၍ အာဖဂန်ဒုက္ခသည် ၁၃၃ ဦးအား ဂျပန်လက်ခံထား

တိုကျို၊ဩဂုတ် ၂၆

တာလီဘန်များ အာဏာရလာပြီးနောက် တစ်နှစ်အတွင်း အာဖဂန်နစ္စတန်မှ ထွက်ပြေးလာသူ ၁၃၃ ဦးအား ဂျပန်နိုင်ငံမှ ဒုက္ခသည်အဖြစ် အသိအမှတ်ပြုထားကြောင်း တရားရေးဝန်ကြီး ရာဆုဟိရိုဟာနရှိ ကသောကြာနေ့တွင်ပြောကြားခဲ့သည်။

ထိုသူများထဲတွင် ယခုလအတွင်းကဘူးလ်မြို့ရှိ ဂျပန်သံရုံးတွင်အလုပ်လုပ်ကိုင်နေသော လူ ၉၈ ဦးနှင့် ၎င်းတို့၏မိသားစုများ ပါဝင်ကြောင်း ဝန်ကြီးကသတင်းစာရှင်းလင်းပွဲတွင် ပြောကြားခဲ့သည်။တင်းကြပ်သော ဒုက္ခသည်စိစစ်ရေးမူဝါဒရှိသော ဂျပန်အစိုးရ၏ ခွင့်ပြုချက်ရသူ ၁၃၃ ဦးဟူသောပမာဏသည် ၂၀၂၁ ခုနှစ်တွင် ခိုလှုံခွင့်ရခဲ့သည့် ၇၄ ဦးဟူ‌သော အမြင့်ဆုံးပမာဏထက်ပင်ကျော်လွန်ခဲ့သည်။

အာဖဂန်အစိုးရ အရာရှိဟောင်းများနှင့် ပူးပေါင်းဆောင်ရွက်သူများအဖြစ် ရှုမြင်ခံရသူများသည် နှိပ်စက်ညှဉ်းပန်းခံရမည်ကို စိုးရိမ်သောကြောင့် အာဖဂန်မှလူပေါင်း ၈၀၀ ခန့်သည် ဂျပန်သို့ထွက်ပြေးခဲ့ကြသည်။၂၀၂၁ ခုနှစ် ဩဂုတ်လတွင် နိုင်ငံတွင်းမှ တပ်များရုပ်သိမ်းရန် အမေရိကန်က ဆုံးဖြတ်ပြီးနောက် တာလီဘန်တို့ကအစိုးရကို ဖြုတ်ချကာအာဏာပြန်ရခဲ့သည်။

လွန်ခဲ့သည့်တစ်နှစ်ခွဲအတွင်း အာဖဂန်နစ္စတန်မှ လူပေါင်းအနည်းဆုံး ၁၈၀,၀၀၀ ထက်မနည်းထွက်ပြေးခဲ့ရကြောင်း ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက သတင်းထုတ်ပြန်ခဲ့သည်။

ဒုက္ခသည်များအား ဒုက္ခသည်ကွန်ဗင်းရှင်း ကပေးအပ်သော အတည်ပြုချက်အရအမှန်တကယ်ဒုက္ခသည်ဟုတ်မဟုတ် သင့်လျော်အောင် အတည်ပြုဆုံးဖြတ်ထားကြောင်း ဟာနရှိ ကပြောကြားခဲ့သည်။

“အမှန်တကယ် ခိုလှုံခွင့်လိုအပ်နေသူများအား လုံခြုံသောအကာအကွယ်များ ဆက်လက်ပေးအပ်သွားရန်မျှော်လင့်ပါသည်” ဟုလည်း၎င်းကပြောကြားခဲ့သည်။

သံရုံးနှင့်ဆက်သွယ်မှုရှိသည့် လူ ၉၈ ဦးအား ဩဂုတ်လ ၁၉ ရက် နေ့စွဲဖြင့် ဒုက္ခသည်အဖြစ်အတည်ပြုခဲ့ကြောင်း အစိုးရသတင်းရင်းမြစ်များက ပြောကြားခဲ့သည်။အဘယ်‌ ကြောင့်ဆိုသော် ၎င်းတို့၏ “နိုင်ငံရေးအမြင်များ” သည် ၎င်းတို့အားနှိပ်စက်ညှဉ်းပန်းမှု အန္တရာယ်နှင့် ရင်ဆိုင်ရနိုင်သောကြောင့်ဖြစ်သည်။

သို့သော်အခြားအာဖဂန်များကလည်း ဒုက္ခသည်အဖြစ်ထောက်ပံ့ဖို့ လျှောက်ထားနေကာ ယခုကိစ္စနှင့်ပတ်သက်၍ ဂျပန်၏‌နှောင့်နှေးသော ဆုံးဖြတ်ချက်သည် အခြေခံအားဖြင့်မပြောင်းလဲကြောင်း ဒုက္ခသည်များကို ကူညီပေးနေသူရှေ့နေတဦးကထောက်ပြခဲ့သည်။နှိပ်စက်ညှဉ်းပန်းမှုမှထွက်ပြေးလာသည့် အခြားလူများကိုလည်း ပိုမိုလက်ခံပေးရန် ရှေ့နေများကတောင်းဆိုခဲ့သည်။

ဂျပန်နိုင်ငံ၏ လူဝင်မှုကြီးကြပ်ရေးဌာနသည် အာဖဂန်နစ္စတန်နိုင်ငံမှ ထွက်ခွာလာသူများကို အချို့သောအခြေအနေများအရ တစ်နှစ်ကြာ နေထိုင်ခွင့်ပြုထားပြီး အလုပ်လုပ်နိုင်သည့်သတ်မှတ်ချက်များပါဝင်သည့် ဗီဇာများထုတ်ပေးခဲ့သည်။

ဂျပန်နိုင်ငံရှိ ဒုက္ခသည်များအတွက် ပုံမှန်အားဖြင့် ငါးနှစ်နေထိုင်ခွင့်ပေးထားကာ အမြဲတမ်းနေထိုင်ခွင့်လျှောက်ထားရန် အရည်အချင်းပြည့်မီပြီး သတ်မှတ်ချက်များနှင့်ကိုက်ညီပါကလျှောက်ထားခွင့်ပြုသည်ဟုဖော်ပြထားသည်။

Source -ကျိုတိုသတင်း