နိုင်ငံတော်အစိုးရမှချီးမြှင့်ပေးအပ်သည့် သာသနာတော်ဆိုင်ရာဘွဲ့တံဆိပ်တော်ဖြစ်သည့် “သုဓမ္မသိင်္ဂီ”ဘွဲ့ချီးမြှင့်ခြင်းခံခဲ့ရသော တာချီလိတ်မြို့နယ်ဂုဏ်ဆောင် ဒေါက်တာနန်းဖြူနှင်း(ဖြူစင်သင်္ကန်းတိုက်)အား တာချီလိတ်လေဆိပ်၌ဂုဏ်ပြုကြိုဆိုသူအများအပြားရှိခဲ့ကြောင်း သိရသည်။
“သုဓမ္မသိင်္ဂီ”ဘွဲ့ရ ဒေါက်တာနန်းဖြူနှင်း(ဖြူစင်သင်္ကန်းတိုက်)သည် ယနေ့ မတ် ၆ ရက်နေ့လည်ပိုင်းက တာချီလိတ်လေဆိပ်သို့ရောက်ရှိခဲ့ခြင်းဖြစ်ပြီး နဂါးနှစ်ကောင်ကျောင်းတိုက်၏ ဦးစီးပဓါနနာယက ဆရာတော်ကြီးအပါအဝင် တာချီလိတ်မြို့နယ်တာဝန်ရှိသူများ၊ ဒေသအခြေစိုက် လူမှုကူညီရေးအသင်းဝင်များ၊ ကြက်ခြေနီတပ်ဖွဲ့ဝင်များ၊ ဒေသခံရပ်မိရပ်ဖများ၊ တိုင်းရင်းသား စာပေနှင့်ယဉ်ကျေးမှုအဖွဲ့များ၊ ဆရာ၊ ဆရာမများနှင့် ကျောင်းသား၊ ကျောင်းသူများကဂုဏ်ပြုကြိုဆိုခဲ့ကြကြောင်း သိရသည်။
ဒေါက်တာနန်းဖြူနှင်းသည် ဥပါသိကာဂုဏ်ရည်(၁ဝ) ပါးကိုစောင့်ထိန်းနေထိုင်ပြီး ဗုဒ္ဓသာသနာတော်ထွန်း ကားပြန့်ပွားစေရန် ရှင်သာမဏေ(၂၀၅)ပါးအား တစ်ဦးတည်းဒါယိကာခံယူ၍ ရှင်ပြုပေးခြင်း၊ စာသင်သားသာ မဏေ(၂၁)ပါးအား တစ်ဦးတည်းဒါယိကာခံ၍ ရဟန်းခံပေးပြီး ပစ္စည်းလေးပါးတို့ကို ထာဝရထောက်ပံ့လှူဒါန်းခြင်းတို့ကိုပြုလုပ်လျက်ရှိကြောင်း သိရသည်။
ထို့ပြင် ဗုဒ္ဓသာသနာထွန်းကားမှုအားနည်းသောဒေသများဖြစ်သည့် ရှမ်းပြည်နယ်(အရှေ့ပိုင်း)၊ ကျိုင်းတုံမြို့၊ လွယ်မွေကျေးရွာအုပ်စု၊ နောင်လျန်ကျေးရွာရှိ နောင်လျန်ထေရဝါဒဗုဒ္ဓသာသနာပြုကျောင်းအပါအဝင် ဘုရား၊ စေတီ၊ ပုထိုး၊ သိမ်၊ ကျောင်း၊ ဇရပ်၊ ရေတွင်း၊ ရေကန်၊ သာသနိကအဆောက်အဦများအား အသစ်တည် ဆောက်လှူဒါန်းခြင်း၊ ပြုပြင်မွမ်းမံခြင်းတို့ကိုလည်းပြု လုပ်ပေးလျက်ရှိကြောင်း သိရသည်။
ထို့အတူ ပရိယတ္တိတက္ကသိုလ်၊ ပရိယတ္တိစာသင်တိုက်တို့တွင် ပစ္စည်းလေးပါးနှင့် သာသနိကအဆောက်အဦတို့အတွက် ထာဝရငွေပဒေသာပင်စိုက်ထူလှူဒါန်းခြင်းနှင့် အခြား သာသနာရေးဆိုင်ရာများတွင်လည်းလှူဒါန်းမှုများ၊ လက်ရှိအချိန်တွင်လည်း ဗုဒ္ဓသာသနာတော်အ တွက်ဆက်လက်လှူဒါန်းနေမှုများကြောင့် နိုင်ငံတော်အ စိုးရမှ “သုဓမ္မသိင်္ဂီ”ဘွဲ့ကိုချီးမြှင့်အပ်နှင်းခဲ့ခြင်းဖြစ် ကြောင်း သိရသည်။
အဆိုပါ “သုဓမ္မသိင်္ဂီ”ဘွဲ့အား မတ် ၂ ရက်နေ့လည်ပိုင်းက ရန်ကုန်မြို့၊ သီရိမင်္ဂလာကမ္ဘာအေးကုန်းမြေရှိ ဆဋ္ဌသင်္ဂါယနာတင် မဟာပါသာဏလိုဏ်ဂူသိမ်တော်ကြီး၌ ရန်ကုန်တိုင်းအစိုးရအဖွဲ့ကကြီးမှူးကျင်းပသည့် ၂၀၂၆ ခုနှစ် သာသနာတော်ဆိုင်ရာဘွဲ့တံဆိပ်တော်ရ ဆရာ တော်ကြီးများ၊ သီလရှင်ဆရာကြီးများနှင့် လူပုဂ္ဂိုလ်များအား သာသနာတော်ဆိုင်ရာဘွဲ့တံဆိပ်တော်များ ဆက်ကပ်ချီးမြှင့်ပွဲတွင် ချီးမြှင့်အပ်နှင်းခံခဲ့ရခြင်းဖြစ် ကြောင်း သိရသည်။