ရှမ်းပြည်နယ်(အရှေ့ပိုင်း)၊ တာချီလိတ်မြို့တွင် နိုဝင်ဘာ ၁၃ ရက်နံနက် ၁၀ နာရီ ၄၅ မိနစ်ခန့်က ဖုန်းဆိုင်အတွင်းဝင်ရောက်၍ သေနတ်ဖြင့်ပစ်ခတ်ကာလုယက်မှုကျူးလွန်သူ အမျိုးသား(၄)ဦးအား အသေပစ်ခတ်ဖမ်းဆီးနိုင်ခဲ့ကြောင်း နစက ၏သတင်းထုတ်ပြန်ရေးအဖွဲ့ထံမှ သိရသည်။
တာချီလိတ်မြို့၊ ရန်အောင်မြေရပ်ကွက်၊ ဗိုလ် ချုပ်လမ်းမဘေးတွင်ဖွင့်လှစ်ထားသော First Rate Mobile ဖုန်းဆိုင်အတွင်းသို့ အမျိုးသား(၄) ဦးမှ သေနတ်များကိုင်ဆောင်၍ဝင်ရောက်လာပြီးနောက် ဆိုင်ဝန်ထမ်းများအား ကြမ်းပြင်ပေါ်တွင်မှောက်ခိုင်းပြီးနောက် ဆိုင်နောက်ခန်း၌ ဖုန်းပြင်နေသော ဆိုင်ဝန်ထမ်း ကိုဟိန်းမြတ်သူ(၂၁) နှစ်အား သေနတ်ဖြင့်ပစ်ခတ်ခဲ့ကြကြောင်း သိရသည်။
ထိုသို့ ပစ်ခတ်ပြီးနောက် ဆိုင်အတွင်းရှိ ငွေကျပ် (၁၁၂၁)သိန်းခန့်တန်ဖိုးရှိ iPhone (၂၀)လုံးအား လုယက်ယူဆောင်ကာထွက်ပြေးသွားခဲ့ကြသဖြင့် ပြစ်မှုကျူးလွန်သူများအား ဖမ်းဆီးရမိရေးအ တွက် တာချီလိတ်မြို့မရဲစခန်းက (ပ) ၁၆၈/ ၂၀၂၄၊ ရာဇသတ်ကြီးဥပဒေပုဒ်မ ၃၉၂/၃၀၂/၃၄ ဖြင့်အမှုဖွင့်ကာ ပိတ်ဆို့စစ်ဆေးမှုများပြုလုပ်ခဲ့ကြသည်။
ထို့ကြောင့် ပြစ်မှုကျူးလွန်သူများသည် တာချီလိတ်မြို့နယ်၊ ဖန်ပင်ကျေးရွာအုပ်စု၊ ဝမ်ကျောက်လုံကျေးရွာရှိ ဦးဆမ်ကြွက်(စိစစ်ဆဲ)၏ အငှားနေအိမ်လိုင်းခန်း၏ အခန်းအမှတ်(၁၀) တွင်ရောက်ရှိနေကြောင်း သတင်းအရ ည ၁၂ နာ ရီခွဲတွင် လုံခြုံရေးအဖွဲ့ဝင်များက ယင်း အငှားနေ အိမ်လိုင်းခန်းအား ဝင်ရောက်စီးနင်းရှာဖွေခဲ့ရာ ပြစ်မှုကျူးလွန်သူများက သေနတ်များဖြင့် စ တင်ပစ်ခတ်ပြီး ထွက်ပြေးရန်ကြိုးစားခဲ့ကြကြောင်း သိရသည်။
ထိုသို့ ပြုလုပ်ခဲ့မှုကြောင့် လုံခြုံရေးအဖွဲ့ဝင်များက ပြန်လည်ခုခံပစ်ခတ်ဖမ်းဆီးခဲ့ရာ ပြစ်မှုကျူး လွန်ခဲ့သူများဖြစ်သည့် ဖန်လီ(၃၄)နှစ်အပါအ ဝင်(၄)ဦးအားအသေပစ်ခတ်ဖမ်းဆီးရမိခဲ့ပြီး ရှာ ဖွေစစ်ဆေးမှုများပြုလုပ်ရာ BWHE 610 Glock ပစ္စတို(၁)လက်၊ ၎င်းကျည်(၂)တောင့်၊ ကျည်အိမ် (၂)ခု၊ အမေရိကန်နိုင်ငံထုတ် ZEV ပစ္စတို(၁) လက်၊ ၎င်းကျည်(၂)တောင့်၊ ကျည်အိမ်(၁)ခု၊ အ သံတိတ်ပြောင်း(၁)ခု၊ အမေရိကန်နိုင်ငံထုတ် SIGSAUER ပစ္စတို(၁)လက်၊ ကျည်အိမ်(၁)ခု၊ ဩ စတြေးလျနိုင်ငံထုတ် TARAN TACTICAL INNOVATION (COMBAT MASTER) ပစ္စတို(၁) လက်၊ ၎င်းကျည်(၃)တောင့်၊ ကျည်အိမ်(၁)ခု၊ အ သံတိတ်ပြောင်း(၁)ခု၊ TOYOTA WISH ကား(၁) စီးနှင့် အနက်ရောင်လက်ဆွဲအိတ်အတွင်းထည့်ထားသော လုယက်ယူဆောင်သွားခဲ့သည့် ဖုန်း (၁၂)လုံးတို့အား သိမ်းဆည်းရမိခဲ့ကြောင်း သိရသည်။
လုယက်မှုဖြစ်စဉ်၌ သေနတ်ဖြင့်ပစ်ခတ်ခံခဲ့ရသော ဖုန်းဆိုင်ဝန်ထမ်းဖြစ်သော ကိုဟိန်းမြတ်သူသည် ကျည်ထိမှန်ဒဏ်ရာ(၁)ချက်ရရှိကာ အခင်း ဖြစ်နေရာတွင် သေဆုံးသွားခဲ့ကြောင်း သိရသည်။