ကွာလာလမ်ပူ၊ဧပြီ ၁၄
အမေရိကန်သမ္မတထရမ့်ပ်၏ အခွန်စည်းကြပ်မှုများကြောင့် နိုင်ငံအများအပြားအကျပ်ရိုက်နေချိန်၌ သမ္မတရှီကျင့်ဖျင်သည် အာဆီယံဒေသတွင်းနိုင်ငံများသို့ခရီးထွက်လျက်ရှိရာ မလေးရှားနိုင်ငံသို့လည်း ဝင်ရောက်မည်ဟုသိရသည်။
သမ္မတရှီ၏သုံးရက်ကြာခရီးစဉ်သည် ထရမ့်ပ်၏ အခွန်စည်းကြပ်မှုဒဏ်ကိုခံရမည့် မလေးရှားနိုင်ငံရှိလုပ်ငန်းများအတွက် တရုတ်နိုင်ငံသို့ဝင်ရာက်နိုင်ရန်အခွင့်အလမ်းတစ်ရပ်ဖြစ်လာနိုင်သည်ဟု ကျွမ်းကျင်သူများကသုံးသပ်ကြသည်။
ထရမ့်ပ်၏အခွန်စည်းကြပ်မှုများကြောင့် တစ်ကမ္ဘာလုံးတွင် ကမောက်ကမဖြစ်နေချိန်၌ အာဆီယံဒေသတွင်းနိုင်ငံများရှိ တင်ပို့သူများနှင့်လုပ်ငန်းများအနေဖြင့်လည်း ယခုအခြေအနေအတွက် မျှမျှတတကြားနေနိုင်မှုရှိမရှိနှင့်ပတ်သက်၍ မေးခွန်းထုတ်စရာလည်းဖြစ်လာခဲ့သည်။
၂၀၁၃ ခုနှစ်နောက်ပိုင်း ပထမဆုံးခရီးဖြစ်သည့်မလေးရှားခရီးစဉ်အတွင်း သမ္မတရှီသည် မလေးရှား၌ သုံးရက်ကြာနေထိုင်မည်ဖြစ်ပြီးမလေးရှားဘုရင်နှင့်ဝန်ကြီးချုပ်တို့နှင့်တွေ့ဆုံကာ သဘောတူညီချက်များစွာကိုလက်မှတ်ထိုးနိုင်ခြေရှိသည်ဟုလည်းဆိုသည်။
တရုတ်သည် မလေးရှား၏ ၁၆ နှစ်ဆက်တိုက် အကြီးဆုံးကုန်သွယ်ဖက်နိုင်ငံဖြစ်ခဲ့ပြီး နှစ်နိုင်ငံကုန်သွယ်မှုသည် ယမန်နှစ်က ရင်းဂစ် ၄၈၄ ဒသမ ၁ ဘီလျံ (အမေရိကန်ဒေါ်လာ ၁၁၀ ဘီလျံ) အထိရှိခဲ့သည်ဟုသိရသည်။
သို့သော် အမေရိက၏ ကြီးမားလှသည့်စားသုံးသူဈေးကွက်က မလေးရှားကုန်ပစ္စည်းအများစုကို ဝယ်ယူနေဆဲဖြစ်ကာ ယမန်နှစ်ကအထိ အမေရိကန်ဒေါ်လာ ၄၅ ဘီလျံအထိရှိခဲ့ပြီး အများစုမှာ တန်ဖိုးကြီးချစ်ပ်များထုတ်လုပ်ခြင်းအတွက် အဓိကသော့ချက်ဖြစ်သည့် တပိုင်းလျှပ်ကူးပစ္စည်း များဝယ်ယူခြင်းဖြစ်သည်ဟုဆိုသည်။
မလေးရှားနိုင်ငံမှ ကုန်ပစ္စည်းအများစုအပေါ် အခွန်စည်းကြပ်မှုကို ၂၄ ရာခိုင်နှုန်းအထိမြှင့်လိုက်ခြင်းသည် အဆိုပါ အရေးကြီးသောပို့ကုန်များကို ခြိမ်းခြောက်လျက်ရှိသည်ဟုလည်းဆိုခဲ့သည်။
လက်ရှိတွင် ထရမ့်ပ်သည် အခွန်စည်းကြပ်မှုများကို ရက်ပေါင်း ၉၀ ကြာဆိုင်းငံ့ထားသော်လည်း ရှီ၏ ခရီးစဉ်သည် မလေးရှားကုမ္ပဏီများကို တရုတ်နိုင်ငံသို့ ပိုမိုကောင်းမွန်စွာဝင်ရောက်ခွင့်အခွင့်အရေးပေးနိုင်သည်ဟု ကျွမ်းကျင်သူများကပြောကြားလျှက်ရှိကြသည်။
Source : ဆော့ထ်ချိုင်းနားမောနင်းပို့စ်ထ်