တရုတ်သမ္မတက ရုရှား – ယူကရိန်းအရေးသည် “လူသားမျိုးနွယ်အတွက် သတိပေးချက်”ဟုဆို
ပေကျင်း၊ဇွန် ၂၃
အွန်လိုင်းမှကျင်းပသောစီးပွားရေးဖိုရမ်တွင် တရုတ်သမ္မတက ရုရှားအပေါ် ပိတ်ဆို့အရေးယူခြင်းဟာဘာများကောင်းသွားပါလဲဟု လက်ရှိ အခြေအနေနှင့်ပတ်သက်၍မေးခွန်းထုတ်ခဲ့သည်။
ယူကရိန်းပဋိပက္ခသည် လူသားမျိုးနွယ်အတွက် သတိပေးချက်တစ်ခုဖြစ်ကြောင်း တရုတ်ခေါင်းဆောင် ရှီကျင့်ဖျင်က ပြောကြားခဲ့သည်။
တရုတ်အနေဖြင့်ယူကရိန်း နှင့်ဆက်ဆံရေးကောင်းမွန်အောင်ကြိုးစားနေသလို ရုရှားအပေါ် အနောက်နိုင်ငံများ၏ ပိတ်ဆို့အရေးယူမှုများကိုလည်း ပြစ်တင်ဝေဖန်ခဲ့သည်။
“နိုင်ငံတွေဟာ ကိုယ့်အင်အား အနေအထားကို မျက်ကန်းယုံကြည်ပြီး စစ်ရေးမဟာမိတ်ချဲ့ထွင်တာ၊ ကိုယ့်လုံခြုံမူအတွက်အခြားနိုင်ငံရဲ့အထောက်ပံ့ကိုအားကိုးမယ်ဆိုရင် အဲ့ဒီနိုင်ငံဟာ လုံခြုံရေးအခက်အခဲတွေနဲ့ ကြုံတွေ့ရမှာပါပဲ” ဟု တရုတ်သမ္မတကပြောကြားခဲ့ကြောင်း နိုင်ငံပိုင်မီဒီယာများကဆိုသည်။
တရုတ်သမ္မတသည် BRICS နိုင်ငံများဖြစ်သည့် ဘရာဇီး၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံများ၏ ၁၄ ကြိမ်မြောက်ထိပ်သီးအစည်းအဝေးမတိုင်မီ အွန်လိုင်းစီးပွားရေးဖိုရမ်ဖွင့်ပွဲတွင် ယခုကဲ့သို့ပြောဆိုခဲ့ခြင်းဖြစ်သည်။
တရုတ်သမ္မတကပိတ်ဆို့အရေးယူခြင်းသည် “တစ်ဦးနှင့်တစ်ဦးအကျိုးစီးပွားကိုသာ ထိခိုက်စေပြီး နှစ်ဖက်စလုံးအတွက်နစ်နာသည်” ဟုဆိုခဲ့သည်။အမေရိကန်၊ ဗြိတိန်၊ဥရောပသမဂ္ဂတို့နှင့်အတူ ဂျပန်၊ တောင်ကိုရီးယားနှင့် စင်္ကာပူနိုင်ငံများသည် စစ်ပွဲကြောင့် ပိတ်ဆို့အရေးယူမှုများ ချမှတ်ခဲ့သည်။
တရုတ်နိုင်ငံ၏ ပိုမိုခိုင်မာအားကောင်းသော နိုင်ငံခြားရေးမူဝါဒနှင့် ကမ္ဘာ့စျေးကွက်များကို လွှမ်းမိုးလာမှုသည် အမေရိကန်၊ဥရောပနှင့် အခြားနေရာများတွင် တုံ့ပြန်မှုများဖြစ်ပေါ်စေခဲ့သည်။တရုတ်ကုန်ပစ္စည်းများကို အစားထိုးရန် တောင်းဆိုမှုများလည်းရှိလာကာ တရုတ်စီးပွားရေးအပေါ် ကမ္ဘာ့မှီခိုအားထားမှုကို လျှော့ချရန် အနောက်နိုင်ငံအချို့ကတွန်းအားပေးနေသည်။
“သမိုင်းကိုနောက်ပြန်လှည့်ပြီး တခြားသူတွေရဲ့လမ်းကို ပိတ်ဆို့ဖို့ကြိုးစားတာဟာ နောက်ဆုံးမှာ ကိုယ့်ရဲ့ကိုယ်ပိုင်လမ်းကိုပါ ပိတ်ဆို့စေပါလိမ့်မယ်” ဟုလည်း ရှီကဆိုခဲ့သည်။
Source – Aljerzeera/The Associated Press