တရုတ်နှင့်ဆက်ဆံရေး အဆင့်သစ်ဖွင့်လှစ်ထူထောင်လို- လီဂျေးမြောင်

ရာထူးတာဝန်ယူပြီးနောက်ပိုင်း လီ၏ ပထမဆုံး ပေကျင်းခရီးစဉ်အတွင်း၌ သမ္မတ ရှီကျင့်ဖျင်နှင့် တွေ့ဆုံခဲ့အပြီးတွင် တရုတ်နိုင်ငံနှင့် ဆက်ဆံရေးအတွက် အဆင့်သစ် ဖွင့်လှစ်လိုကြောင်း တောင်ကိုရီးယားသမ္မတ လီဂျေးမြောင်က တနင်္လာနေ့တွင် ပြောကြားခဲ့သည်။

ယခုထိပ်သီးအစည်းအဝေးသည် ၂၀၂၆ ခုနှစ်ကို ကိုရီးယား-တရုတ်ဆက်ဆံရေး အပြည့်အဝပြန်လည်ထူထောင်သည့် ပထမနှစ်အဖြစ် ဖန်တီးရန် အရေးကြီးသော အခွင့်အလမ်းတစ်ခုဖြစ်လာလိမ့်မည်ဟု လီက ပြောကြားခဲ့သည်။ နှစ်နိုင်ငံအကြား မဟာဗျူဟာ‌မြောက်ပူးပေါင်းဆောင်ရွက်မှုနှင့် မိတ်ဖက်ဆက်ဆံရေး ဖွံ့ဖြိုးတိုးတက်မှုကို ခေတ်ကာလ၏ ပြန်လည်ပြောင်းလဲ၍ မရနိုင်သော လမ်းကြောင်းတစ်ခုအဖြစ် ဆက်လက်လုပ်ဆောင်သွားမည်ဟု မိမိယုံကြည်ပါကြောင်း ပြောကြားခဲ့သည်။

တရုတ်နိုင်ငံပိုင်သတင်းဌာန ရှင်းဟွာက သတင်းဖော်ပြခဲ့သော မှတ်ချက်များတွင် ရှီသည် ဒုတိယကမ္ဘာစစ်အတွင်း ဂျပန်ကို တွန်းလှန်ခဲ့သည့် တရုတ်နှင့် ကိုရီးယားတို့၏ တူညီသော အတွေ့အကြုံကို ထူးထူးခြားခြားပင် တိုက်ရိုက်ရည်ညွှန်း ပြောကြားခဲ့သည်။

“လွန်ခဲ့တဲ့ နှစ်ပေါင်း ၈၀ ကျော်က တရုတ်နဲ့ တောင်ကိုရီးယားတို့ဟာ ကြီးမားတဲ့ အမျိုးသားရေးစွန့်လွှတ်စွန့်စားမှုတွေ လုပ်ခဲ့ရပြီး ဂျပန်စစ်ဝါဒအပေါ် အောင်ပွဲခံခဲ့ကြပါတယ်” ဟု ရှီက လီကို ပြောကြားခဲ့သည်။

နှစ်နိုင်ငံအနေဖြင့် အရှေ့မြောက်အာရှ၏ ငြိမ်းချမ်းရေးနှင့် တည်ငြိမ်ရေးကို ကာကွယ်စောင့်ရှောက်သင့်ကြောင်း ရှီက ဆက်လက်ပြောကြားခဲ့သည်။

တောင်ကိုရီးယားနှင့် တရုတ်တို့သည် မြောက်ကိုရီးယားနိုင်ငံနှင့် ဆွေးနွေးမှုများ ပြန်လည်စတင်ခြင်း၏ အရေးပါမှုကို အတည်ပြုခဲ့ပြီး ကိုရီးယားကျွန်းဆွယ်တွင် ငြိမ်းချမ်းရေးတည်ဆောက်ရန်နှင့် တင်းမာမှုများ လျှော့ချရန်အတွက် နည်းလမ်းများကို ဆက်လက်ရှာဖွေသွားရန် သဘောတူခဲ့ကြကြောင်း လီနှင့် ရှီ တွေ့ဆုံအပြီး သတင်းစာရှင်းလင်းပွဲတွင် လီ၏ လုံခြုံရေးအကြံပေး ဝီဆွန်လက်က ပြောကြားခဲ့သည်။

Ref: အင်န်ဘီစီနူးစ်