တရုတ်နိုင်ငံ၏ လေအားလျှပ်စစ် တာဘိုင်ရင်ပြင် နှင့် မြန်မာနိုင်ငံတွင် အကောင်အထည်ဖော်ရန် အလားအလာရှိနိုင်သည့် ဒေသများ

မြန်မာနိုင်ငံတော်သမ္မတ တရုတ်နိုင်ငံသို့ ရောက်ရှိစဉ် ပေကျင်းမြို့မှ ရှန်ဟိုင်းမြို့သို့ ရထားဖြင့် သွားရောက်ခဲ့ရာ ရထားလမ်းဘေး ကွင်းပြင်ကျယ်ကြီးများနှင့် တောင်ကုန်းများပေါ်တွင် ဧရာမဒလက်တိုင်ကြီးများကို အစီအရီ မြင်တွေ့ခဲ့ရသည်။

အဆိုပါ ဧရာမဒလက်တိုင်ကြီးများသည် ကမ္ဘာ့စွမ်းအင်ကဏ္ဍတွင် ထိပ်တန်းသို့ ရောက်ရှိနေသည့် တရုတ်နိုင်ငံ၏ Wind Turbine ခေါ် လေအားလျှပ်စစ် တာဘိုင်ကြီးများ ဖြစ်ကြသည်။

ကွင်းပြင်ကျယ်များတွင် တည်ဆောက်ရခြင်း၏ အကြောင်းရင်း

ယခုကဲ့သို့ ကွင်းပြင်ကျယ်ကြီးများတွင် လေအားလျှပ်စစ်တာဘိုင်များကို တည်ဆောက်ရခြင်းမှာ ထိုနေရာများသည် လေတိုက်နှုန်း မှန်ကန်ပြီး အဟန့်အတားမရှိ တိုက်ခတ်ခြင်းကြောင့် လေစွမ်းအင် ထုတ်ယူရန် ပထဝီဝင်အနေအထားအရ အကောင်းဆုံး ဖြစ်ခြင်းကြောင့် ဖြစ်သည်။
ထို့ပြင် တရုတ်နိုင်ငံတွင် လယ်ယာစိုက်ခင်းများ၏ မြေနေရာကို အကျိုးရှိရှိ ပေါင်းစပ်အသုံးချခြင်း စနစ်ကို ကျင့်သုံးထားသည်။ ရထားလမ်းမကြီးများ၏ ဘေးတစ်လျှောက်တွင် အဆင်သင့် ရှိနေတတ်သည့် Power Grid ခေါ် လျှပ်စစ်ဓာတ်အားလိုင်း မီးတိုင်များနှင့် တာဘိုင်မှ ထွက်ရှိလာသော လျှပ်စစ်ဓာတ်အားကို တိုက်ရိုက် ချိတ်ဆက်နိုင်သဖြင့် သယ်ယူပို့လွှတ်ခ ကုန်ကျစရိတ်ကိုလည်း များစွာ သက်သာစေသည်။

အဆိုပါ တာဘိုင်ကြီးများသည် လေတိုက်ခတ်မှုကြောင့် ဧရာမဒလက်ကြီးများ လည်ပတ်သောအခါ ဖြစ်ပေါ်လာသည့် အရွေ့စွမ်းအင်ကို တာဘိုင်အတွင်းရှိ စက်သို့ ပို့လွှတ်ကာ လျှပ်စစ်စွမ်းအင်အဖြစ် ပြောင်းလဲပေးခြင်း ဖြစ်သည်။ အဝေးမှ လှမ်းကြည့်လိုက်လျှင် တာဘိုင်တိုင်လုံးကြီးများသည် သာမန်မျက်စိဖြင့် ကြည့်ပါက သေးငယ်သည်ဟု ထင်ရသော်လည်း တကယ်တမ်း မြေပြင်တွင်မူ တိုင်တစ်လုံးချင်းစီသည် အထပ်မြင့်တိုက် ၂၀ ကျော်စာမက သို့မဟုတ် မီတာ ၁၀၀ ကျော်အထိ မြင့်မားပြီး ဒလက်တစ်ခုတည်းတင်ကိုပင် လေယာဉ်ပျံတောင်ပံထက် ရှည်လျားလှသည်။

မြန်မာ့လေစွမ်းအင် အနာဂတ်နှင့် လေတိုက်နှုန်းပေါ်မူတည်၍ လေအားလျှပ်စစ် ထုတ်လုပ်နိုင်စွမ်းကို ကွင်းဆင်းစမ်းသပ် တိုင်းတာလျက်ရှိမှု

မြန်မာနိုင်ငံတွင် လေအားလျှပ်စစ် ထုတ်လုပ်ရာ၌ စီးပွားဖြစ် အောင်မြင်နိုင်ခြေ ရှိ၊ မရှိကို ဆုံးဖြတ်ပေးသည့် အဓိကသော့ချက်မှာ လေတိုက်နှုန်း ပမာဏနှင့် လေတိုက်ခတ်မှု တည်ငြိမ်မှုတို့ ဖြစ်သည်။

ထို့ကြောင့် အင်ဂျင်နီယာများနှင့် စွမ်းအင်ပညာရှင်များသည် ရွေးချယ်ထားသည့် စမ်းသပ်ကွင်းပြင်များတွင် Met Mast ခေါ် လေတိုင်းတာရေးမျှော်စင်များ စိုက်ထူကာ တစ်နှစ်ပတ်လုံး လေတိုက်နှုန်း၊ လေဦးတည်ရာ လမ်းကြောင်းများနှင့် လေထုသိပ်သည်းဆများကို နေ့ညမပြတ် စနစ်တကျ မှတ်တမ်းတင် တိုင်းတာလျက်ရှိသည်။

သာမန်အားဖြင့် လေအားလျှပ်စစ် တာဘိုင်ကြီးများ လည်ပတ်ပြီး လျှပ်စစ်ဓာတ်အား စတင်ထုတ်လုပ်နိုင်ရန်အတွက် အနည်းဆုံး တစ်စက္ကန့်လျှင် လေတိုက်နှုန်း ၃ မီတာမှ ၅ မီတာခန့် ရှိရမည် ဖြစ်ပြီး၊ စီးပွားဖြစ် ထိရောက်စွာ ထုတ်လုပ်နိုင်ရန်အတွက်မူ တစ်စက္ကန့်လျှင် ၆.၅ မီတာကျော် အထက် ရှိရန် လိုအပ်သည်။

မြန်မာနိုင်ငံတွင် ဖော်ဆောင်နိုင်ခြေ ရှိနိုင်သည့် ဒေသများ

မြန်မာနိုင်ငံအတွင်း လေ့လာဆန်းစစ်ချက်များအရ အောက်ပါဒေသများတွင် သဘာဝပတ်ဝန်းကျင်ကို မထိခိုက်စေဘဲ အကျိုးရှိစေမည့် သန့်စင်စွမ်းအင်များကို ရရှိစေနိုင်မည့် အလားအလာကောင်းများ ရှိနိုင်သည် –

ကမ်းရိုးတန်းဒေသများ
ဧရာဝတီတိုင်းဒေသကြီး၊ ရန်ကုန်တိုင်းဒေသကြီးနှင့် တနင်္သာရီတိုင်းဒေသကြီးတို့၏ ကမ်းရိုးတန်းတစ်လျှောက် နေရာများ။

အလယ်ပိုင်းဒေသများ
မြန်မာနိုင်ငံအလယ်ပိုင်း မိုးခေါင်ရေရှားဒေသများနှင့် ကွင်းပြင်ကျယ်များ ရှိသည့် မန္တလေးတိုင်းဒေသကြီး၊ မကွေးတိုင်းဒေသကြီးနှင့် စစ်ကိုင်းတိုင်းဒေသကြီးတို့အတွင်းရှိ နေရာများ။

ကုန်းမြင့်ဒေသများ
ရှမ်းကုန်းပြင်မြင့်ဒေသ ဖြစ်သည့် ရှမ်းပြည်နယ်တောင်ပိုင်းနှင့် မြောက်ပိုင်းတို့ရှိ တောင်ကုန်းတောင်တန်းများ။

အဆိုပါ ဒေသကြီးများတွင် လေအားလျှပ်စစ်စီမံကိန်းများကို စနစ်တကျ စမ်းသပ်ဖော်ဆောင်နိုင်ပါက ရေရှည်တွင် နိုင်ငံတော်အတွက် သန့်စင်စွမ်းအင်ကို ထိရောက်စွာ ရရှိစေမည် ဖြစ်သည်။