ပညာရေးဖိအားများကို လျှော့ချခြင်း၊ ဖုန်း၊ တီဗီကြည့်ချိန်ကို လျှော့ချခြင်းနှင့် နေ့စဉ် အချိန်နှစ်နာရီကြာ ကိုယ်လက်လေ့ကျင့်ခန်းလုပ်စေခြင်းဖြင့် မူလတန်းနှင့် အလယ်တန်းကျောင်းသားများ၏ စိတ်ကျန်းမာရေး တိုးတက်စေမည့် ဆောင်ရွက်ချက်များကို တရုတ်အာဏာပိုင်များက ကြေညာခဲ့သည်။
ပညာရေးဝန်ကြီးဌာနက အောက်တိုဘာလတွင် ကြေညာခဲ့သော အစီအစဉ်များအရ စာသင်ခန်းအတွင်းသို့ မိုဘိုင်းလ်ဖုန်းယူဆောင်ခွင့် ပိတ်ပင်ခြင်းနှင့် အင်တာနက်ကို အလွန်အကျွံ့အမှီပြုခြင်းကို လျှော့ချရန် ဖုန်း၊ အင်တာနက်မသုံးရအချိန်ကာလ သတ်မှတ်ခြင်းတို့ ပါဝင်သည်။
စာသင်ကျောင်းများသည် စုစုပေါင်း အိမ်စာပမာဏကို တင်းတင်းကြပ်ကြပ် ထိန်းချုပ်ရမည်ဖြစ်ကာ ကျောင်းဖွင့်ရက်တိုင်းတွင် မူလတန်းနှင့် အလယ်တန်းကျောင်းသားများကို ကိုယ်လက်လှုပ်ရှားမှုလေ့ကျင့်ခန်းများကို အနည်းဆုံးအချိန်နှစ်နာရီ ပေးကြရမည်ဖြစ်သည်။
ကျောင်းများအနေဖြင့် ကျောင်းတက်ချိန်နှင့် ကျောင်းဆင်းချိန်များကို လက်တွေ့ကျသောနည်းလမ်းဖြင့် စီစဉ်ပေးခြင်းနှင့် နေ့လည်စာစားချိန်ကို လုံလောက်စွာခွင့်ပြုခြင်းဖြင့် ကျောင်းသားများသည် အိပ်စက်ချိန်ကိုလုံလောက်စွာရရှိစေရန် ဆောင်ရွက်ပေးရမည်လည်းဖြစ်သည်။
အိပ်စက်မှုစီမံခန့်ခွဲရေးစည်းမျဉ်းများကို လိုက်နာစေရန် တင်းကြပ်ခြင်း၊ အလွန်အကျွံ စာကျက်ရစေခြင်းကဲ့သို့ စည်းကမ်း ချိုးဖေ-ာက်မှုများကို ပြတ်ပြတ်သားသားထိန်းချုပ်ခြင်း နှင့် ပညာရေးဝန်ထုပ်ဝန်ပိုး အလွန်အကျွံ့မဖြစ်စေရန်ကာကွယ်ရေး အစီအမံများကို ဝန်ကြီးဌာနက ချမှတ်ထားသည်။
ထိုအစီအမံများသည် ကျောင်းသားများကို အထူးသဖြင့် စာမေးပွဲနီးချိန်တွင် စိတ်ဖိစီးမှု၊ စိုးရိမ်ပူပန်မှုတို့ကို ဖြေရှင်းနိုင်စေရန် ရည်ရွယ်သည်။
တရုတ်နိုင်ငံတစ်ဝန်းရှိ ကျောင်းများတွင် အိမ်စာများကို အလွန်အကျွံပေးလေ့ရှိသဖြင့် အိပ်ရေးပျက်ခြင်း၊ စိုးရိမ်ပူပန်ခြင်းနှင့် စိတ်ဓာတ်ကျခြင်းတို့ များပြားနေကြောင်း ပညာရှင်များက ထောက်ပြပြောဆိုခဲ့ကြသည်။
Ref: သည်စထရိတ်တိုင်းမ်စ်