တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီမှ သြဂုတ် ၂ ရက် တစ်ရက်တည်းတွင် ကရင်ပြည်နယ်၊ရှမ်းပြည်နယ်၊မြန်မာစက်မှုဆိပ်ကမ်းနှင့်ဇရပ်ကွင်းကျေးရွာအနီးတို့မှ တရားမဝင်တင်သွင်းလာသည့်ပစ္စည်းများအား ဖမ်းဆီးရမိခဲ့ကြောင်း သိရသည်။
ဖမ်းဆီးရမိမှုများအနေဖြင့် ကရင်ပြည်နယ်တရား မဝင်ကုန်သွယ်မှုတိုက်ဖျက်ရေးအထူးအဖွဲ့ဝင်များပါဝင်သည့်ပူးပေါင်းအဖွဲ့သည် ဘားအံမြို့၊ကမော့ကစင်ကျေးရွာ၌ မြဝတီမြို့မှရန်ကုန်မြို့သို့မောင်းလာသည့် Nissan Diesel Truck ကားအားတားဆီးစစ်ဆေးခဲ့ကြသည်။
ကားပေါ်တွင် သွင်းကုန်ကြေညာလွှာတွင်ကြေညာထားသည်ထက်ပိုမိုပါရှိလာသည့် Cotton Fabric Printed (၄၀၀ ကီလိုဂရမ်)၊ Rubber တုံး(၂၀)အပါအဝင် ငွေကျပ် ၂၂၂၂၀၀၀၀ သိန်းတန်ဖိုးရှိ ကုန်ပစ္စည်း ၅ မျိုးကိုဖမ်းဆီးရမိခဲ့သည်။
ထို့ပြင် ရှမ်းပြည်နယ်တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဝင်များပါဝင်သည့် ပူးပေါင်းအဖွဲ့သည် တောင်ကြီးမြို့၊ (၄)မိုင်ပူးပေါင်းစစ်ဆေးရေးဂိတ်တွင် ကျိုင်းတုံမြို့မှတောင်ကြီးမြို့သို့မောင်းလာသည့် Fuso Diesel ကားအားစစ်ဆေးရာ သွင်းကုန်ကြေညာလွှာနှင့်ကွဲလွဲစွာတင်သွင်းလာသည့် သုံးယောက်စီး ဒန်းလျှောစီးစင်ပါ Amusement Equipment တစ်စုံအပါအဝင် ငွေကျပ် ၈၄၂၁၉၉၂ သိန်းတန်ဖိုးရှိ Amusement Equipment ၂၂ မျိုးကိုဖမ်းဆီးရမိခဲ့ကြောင်း သိရသည်။
ထို့အတူ အကောက်ခွန်ဦးစီးဌာန၏ အကောက်ခွန်ဝန်ထမ်းများက မြန်မာစက်မှုဆိပ်ကမ်း၌ ကုန်သေတ္တာ ၄ လုံးအတွင်း သွင်းကုန်လိုင်စင်မရရှိမီ ဆိပ်ကမ်းသို့ရောက်ရှိသည့်ရက် (၆၁)ရက်ကျော်လွန်နေသည့် Trixon Master Antenna Television Satellite (၄၁၃ ကီလိုဂရမ်)၊ Lighting Pole (၁၀) ခု၊ Door Camera (၆)ခု၊ Wanwha Network Dome Camera အခု(၆၀)အပါအဝင် ငွေကျပ် ၆၀၁၇၁၂၃၈၆ သိန်းတန်ဖိုးရှိ ကုန်ပစ္စည်း ၈၅ မျိုးကို ဖမ်းဆီးရမိခဲ့သည်။
ထို့ပြင် အမှတ်(၂)လမ်းမကြီး၏ ဇရပ်ကွင်းကျေးရွာအနီး၌ Nissan Diesel ကားပေါ်မှ သွင်းကုန်ကြေညာလွှာတွင် ကြေညာထားသည်နှင့်ကွဲလွဲစွာပါရှိလာသော Chaokoh Coconut Cream (၂၃၀၄ ကီလိုဂရမ်)အပါအဝင် ငွေကျပ် ၁၁၅၁၆၁၂၈ သိန်းတန်ဖိုးရှိ ကုန်ပစ္စည်း ၃ မျိုးကို ဖမ်းဆီးရမိခဲ့ကြောင်း သိရသည်။
ထို့ကြောင့် သြဂုတ် ၂ ရက်တစ်ရက်တည်းဖြင့် ငွေကျပ် ၇၉၃၈၇၀၅၀၆ သိန်းတန်ဖိုးရှိ တရားမဝင်တင်သွင်းလာသည့် ကုန်ပစ္စည်းများဖမ်းဆီးရမိမှု အမှုတွဲ ၁၁ မှုရှိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ကြောင်း တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီမှ သိရသည်။