ဧရာဝတီတိုင်းဒေသကြီး ၊ ညောင်တုန်းမြို့နယ် ၊ ရန်ကုန် – ပုသိမ် အမြန်လမ်းမကြီးဘေးရှိ အမှတ် (၃) တူးမြောင်းအတွင်း စက်လှေတိမ်းမှောက်မှုဖြစ်ပွားခဲ့ပြီး ကလေးတစ်ဦး သေဆုံးကာ တစ်ဦးပျောက်ဆုံး နေပြီး ရှာဖွေကယ်ဆယ်ရေးလုပ်ငန်များဆောင်ရွက်နေကြောင်း သိရသည်။
ယနေ့ ဇန်နဝါရီလ (၂၆) ရက် နံနက် (၁၁) နာရီဝန်းကျင်က အဆိုပါ စက်လှေတိမ်းမှောက်မှု ဖြစ်ပွားခဲ့ခြင်းဖြစ်ပြီး ဆားမလောက်နယ်မြေ မီးသတ်တပ်ဖွဲ့နှင့် နယ်မြေခံ ပရဟိတအဖွဲ့များ ၊ ဒေသခံများ ပူးပေါင်းကာ ရှာဖွေကယ်ဆယ်ရေး လုပ်ငန်းများ ဆောင်ရွက်လျက်ရှိကြောင်း သိရသည်။
” ကလေးတစ်ယောက်တော့ ပျောက်နေတယ်။ ယောက်ျားလေးပါ။ မိန်းကလေး တစ်ယောက်ကတော့ အလောင်းပြန်ရပြီ” ဟု အခင်းဖြစ်ပွားရာသို့ ရောက်ရှိနေသည့် ဆားမလောက်ဒေသခံတစ်ဉီးက ပြောသည်။
တိမ်းမှောက်ခဲ့သည့် စက်လှေပေါ်တွင် လူကြီး ကျား(၅) ဦး ၊ မ (၄) ဦး ၊ ကလေး ကျား (၁) ဦး ၊ မ (၁) ဦး လိုက်ပါလာကြောင်း မြန်မာနိုင်ငံ မီးသတ်တပ်ဖွဲ့ထံမှလည်း သိရသည်။
အဆိုပါ စက်လှေပေါ်လိုက်ပါလာသူများအနက် ပျောက်ဆုံးနေသည့် ကလေး (၂) ဦးကို ဆားမလောက်မီးသတ်တပ်ဖွဲ့နှင့် နယ်မြေခံ ပရဟိတအဖွဲ့များ ၊ ဒေသခံများ ဝိုင်းဝန်းရှာဖွေခဲ့ကြရာ နေ့လယ် ၁၂ နာရီခွဲဝန်းကျင်တွင်အမျိုးသမီးငယ်၏ အလောင်းကို ပြန်လည်တွေ့ရှိခဲ့သည့်အတွက် မေတ္တာရှင်နာရေးကူညီမှုအသင်းယာဉ်ဖြင့် ဆားလောက်မြို့နယ်ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။
