ဆန်ရှင်ထိ​နေ​သောဗင်နီဇွဲလားနိုင်ငံမှ ဥရောပသို့ရေနံပြန်လည်တင်ပို့မည်

ဆန်ရှင်ထိ​နေ​သောဗင်နီဇွဲလားနိုင်ငံမှ ဥရောပသို့ရေနံပြန်လည်တင်ပို့မည်

ကာရာကက်စ်၊ဇွန် ၁၈
အမေရိကန်မှဗင်နီဇွဲလားနိုင်ငံအပေါ်ပိတ်ဆို့အရေးယူထား​သော်လည်း နှစ်နှစ်အကြာ ယခုချိန်တွင် ဗင်နီဇွဲလားမှ ဥရောပသို့ ရေနံတင်ပို့မှုများပြန်လည်လုပ်ဆောင်ရန် ပြင်ဆင်​နေပြီဖြစ်သည်။

ရုရှား – ယူကရိန်းအရေးနှင့်ပတ်သက်၍ ရုရှားထံမှရေနံစိမ်းဝယ်ယူမှုများကိုဖြတ်ချနိုင်ရန် ဥရောပကကြိုးပမ်း‌နေချိန်တွင် ယခင်က ဆန်ရှင်လုပ်ထား​သောဗီနီဇွဲလားထံမှ ​ရေနံ ပို့ကုန်များကိုလက်ခံလိုက်ခြင်းဖြစ်သည်။

အီတလီနိုင်ငံ Eni ကုမ္ပဏီကမှာယူထားသော ဗင်နီဇွဲလားရေနံစည် ၆၅၀,၀၀၀ ကိုပို့ဆောင်ပေးရန်အသင့်ဖြစ်နေပြီဟု သောကြာနေ့ကထုတ်ပြန်ခဲ့သော Refinitiv Eikon ၏ထုတ်ပြန်ချက်ကိုကိုးကား၍ Reuters သတင်းဌာနကဖော်ပြထားသည်။

ထို့အပြင် ဒုတိယအကြိမ်မြောက်အဖြစ် Eni ကုမ္ပဏီသို့ထပ်မံတင်ပို့ရန်အတွက် Pantanassa သင်္ဘောသည် ဗင်နီဇွဲလားသို့လာနေပြီး ဥရောပသို့‌‌ရေနံစည်ပေါင်း ၂ သန်းကျော်ယူဆောင်သွားနိုင်ရန်မျှော်လင့်ထားသည်ဟု Eikon အခက်လက်များအရသိရှိရသည်။

သတင်းရင်းမြစ်များ၏ပြောကြားချက်အရ Eni ကုမ္ပဏီ နှင့် စပိန်ရှိ Repsol ကုမ္ပဏီပိုင် Cartagena နှင့် Bilbao ရေနံသန့်စင်စက်ရုံများအတွက် မှာယူထားသောရေနံများကို ဗင်နီဇွဲလားနိုင်ငံပိုင် PDVSA ကုမ္ပဏီထံမှ ယခုလကုန်ပိုင်းတွင်ပို့ဆောင်ပေးရန်မျှော်လင့်ထားသည်ဟု သိရသည်။

အမေရိကန်နိုင်ငံခြားရေးဝန်ကြီးဌာနက ဗင်နီဇွဲလားနိုင်ငံမှ OPEC သို့ဆပ်ရန်ကျန်ရှိ‌နေသေးသည့် ဘီလီယံနဲ့ချီသောဒေါ်လာကြွေးမြီများနှင့်အမြတ်‌ဝေစုကို ပြေလည်အောင်ဖြေရှင်းနိုင်မည့် နည်းလမ်းတစ်ရပ်အနေဖြင့် ဗင်နီဇွဲလားမှရေနံတင်သွင်းမှုကို ဆက်လက်လုပ်ဆောင်ရန်ခွင့်ပြုကြောင်းစာများကို မေလက Eni နှင့် Repsol ကုမ္ပဏီများသို့ပေးပို့ခဲ့သည်။(OPEC – Organisation of the Petroleum Exporting Countries)

၂၀၁၈ ခုနှစ်တွင် ငွေကြေးဖောင်းပွမှုနှုန်းအမြင့်ဆုံးအဆင့်သို့ရောက်ရှိသွားသောကြောင့် ကြွေးမြီဝန်ထုပ်ဝန်ပိုးဖြစ်သည့် ဗင်နီဇွဲလား၏စီးပွားရေးကို ရေနံတင်ပို့ခြင်းအားဖြင့်သက်သာရာရစေနိုင်သည်။အင်္ဂလန်ရှိ ရေနံနှင့်သဘာဝဓာတ်ငွေ့ကုမ္ပဏီ BP သည် ဗင်နီဇွဲလားတွင်ကမ္ဘာ့အကြီးဆုံးရေနံသိုက်ကြီးရှိကြောင်းလည်းဖော်ပြထားသည်။

၂၀၁၉ ခုနှစ် သမ္မတဒေါ်နယ်ထရမ့် လက်ထက်၌ ဗင်နီဇွဲလားသမ္မတ နီကိုလပ်စ်မာဒူရို၏ လူ့အခွင့်အရေးချိုးဖောက်ကျူးလွန်မှုများကြောင့် ဗင်နီဇွဲလားအပေါ် ရေနံရောင်းဝယ်ရေးပိတ်ဆို့မှုပြုလုပ်ခဲ့ခြင်းဖြစ်သည်။

သမ္မတဘိုင်ဒင်လက်ထက်တွင် လူသားချင်းစာနာထောက်ထားမှုဆိုင်ရာ ရည်ရွယ်ချက်ဖြင့် ဒီဇယ်နှင့်ရေနံစိမ်းလဲလှယ်ခွင့်ပြုကာကုန်သွယ်ချိတ်ဆက်မှုများကို ပြန်လည်ဖွင့်လှစ်နိုင်ရန်ဆွေးနွေးမှုများ ရှိခဲ့သော်လည်းအကောင်အထည်မပေါ်ခဲ့ပေ။

ယခုခါတွင်မူ အိမ်ဖြူတော်က ဗင်နီဇွဲလားအားရေနံပိတ်ဆို့မှုအပေါ်ပြန်လည်သုံးသပ်နေပြီး မာဒူရိုနှင့်ဝင်ရောက်ဆွေးနွေးရန်စဉ်းစားနေကြောင်းကို လည်းမေလကကြေငြာခဲ့သည်။

Source – WionNews