စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ စီးပွားရေးလုပ်ငန်းဆောင်ရွက်ရန်အတွက် ဆန်တန်ချိန် (၂၅) တန်နှင့်အထက် (သို့) စပါးတင်း (၂,၅၀၀) နှင့်အထက်သိုလှောင်ထားသော ဆန်စပါးသိုလှောင်ရုံပိုင်ရှင်များအနေဖြင့် မြန်မာဆန်စပါးအွန်လိုင်း(MyRO) (www.myro.com.mm)တွင် ဆန်စပါးသိုလှောင်ရုံ မှတ်ပုံတင်လက်မှတ်လျှောက်ထားရမည်ဟု အသိပေးခဲ့သည်။
MyRO စနစ်တွင်မှတ်ပုံတင်ထားပြီးဖြစ်သော သိုလှောင်ရုံများသည် လစဉ်လဆန်း(၁)ရက်မှ (၇)ရက်အတွင်း သတ်မှတ်ထားသည့် ကာလအတွင်း၌ ကုန်ရ၊ ကုန်ထုတ်၊ ကုန်လက်ကျန်စာရင်းအပြည့်အစုံကို MyRO Website ရှိ မိမိတို့၏ Account တွင် မပျက်မကွက်ထည့်သွင်းပေးရမည်ဖြစ်သည်။
ထိုသို့ ထည့်သွင်းရာ၌ သိုလှောင်ရုံပိုင်ရှင်များသည် ပြည့်စုံမှန်ကန်သော အချက်အလက်များကို တာဝန်ယူ၊ တာဝန်ခံ၍ ထည့်သွင်းပေးရမည်ဖြစ်ကာ ဝန်ကြီးဌာနမှလာရောက်စစ်ဆေးမှုချိန်တွင် ပူးပေါင်းပါဝင်ဆောင်ရွက်ရန်လည်း အသိပေးတိုက်တွန်းထားကာ လိုက်နာရန်ပျက်ကွက်သူများကို ပြင်းထန်စွာအရေးယူသွားမည်ဟု အသိပေးခဲ့သည်။
သိုလှောင်ရုံမှတ်ပုံတင်လက်မှတ်လျှောက်ထားရန်ပျက် ကွက်ခြင်း၊ လစဉ် ကုန်စာရင်းကိုပြည့်စုံမှန်ကန်စွာ သတ်မှတ်ချိန်အတွင်းမဆောင်ရွက်ခြင်းများတွေ့ရှိပါက အမိန့်အမှတ်(၈၂/၂ဝ၂၄)တွင်ပါရှိသောသတ်မှတ်ချက်များနှင့်အညီ အရေးယူခြင်း၊ မှတ်ပုံတင်လက်မှတ်ပယ်ဖျက်ခြင်း(သို့)နည်းလမ်းနှစ်ရပ်စလုံးဖြင့် အရေးယူခြင်းများကိုဆောင်ရွက်သွားမည်ဟု အသိပေးခဲ့သည်။
မှတ်ပုံတင်ခြင်းနှင့် စာရင်းပေးသွင်းခြင်းဆိုင်ရာ အသေးစိတ်အချက်အလက်များသိရှိလိုပါက မြန်မာဆန်စပါးအွန်လိုင်း(www.myro.com.mm)၊ စားသုံးသူရေး ရာဦးစီးဌာန၏ တိုင်း/ပြည်နယ်/ခရိုင်/မြို့နယ်ရုံးများ၊ မြန်မာနိုင်ငံဆန်စပါးအသင်းချုပ်ရုံးတို့တွင် ဆက်သွယ်မေးမြန်းစုံစမ်းနိုင်သည်ဟု အသိပေးခဲ့သည်။