စူးအက်နှင့်ပနားမားတူးမြောင်းများအခမဲ့ဖြတ်သန်းခွင့်ရသင့်–ထရမ့်ပ်

စူးအက်နှင့် ပနားမားတူးမြောင်းများတွင် အမေရိကန် ကုန်သွယ်သင်္ဘောများနှင့် စစ်သင်္ဘောများ အခမဲ့ဖြတ်သန်းခွင့်ရရန် အမေရိကန်သမ္မတ ဒေါ်နယ်ထရမ့်ပ်က တောင်းဆိုခဲ့ပြီး ယင်း ကိစ္စအတွက် ချက်ချင်းတိုးတက်မှုရအောင်ဆောင်ရွက်ရန် ၎င်း၏ နိုင်ငံခြားရေးဝန်ကြီးကို တာဝန်ပေးလိုက်သည်။
          
ထရမ့်ပ်သည် ပနားမားတူးမြောင်းကို အမေရိကန်ပြည်ထောင်စုက လွှဲပြောင်းထိန်းချုပ်နိုင်ရေးအတွက် တောင်းဆိုနေခဲ့သော်လည်း သူ၏ ဆိုရှယ်မီဒီယာပို့စ်အရ အရေးပါသည့် စူးအက်တူးမြောင်းရေလမ်းကြောင်းဘက်ကို အာရုံပြောင်းသွားခဲ့သည်။ “အမေရိကရဲ့ စစ်ဖက်နဲ့ ကူးသန်းရောင်းဝယ်ရေးသင်္ဘောနှစ်မျိုးလုံးကို ပနားမားနဲ့ စူးအက်တူးမြောင်းတွေမှာ အခမဲ့ ဖြတ်သန်းခွင့်ပြုသင့်တယ်” ဟု ထရမ့်ပ်က စနေနေ့တွင် ပို့စ်တင် ပြောဆိုခဲ့သည်။
          
အမေရိက မရှိလျှင် ရေလမ်းကြောင်းနှစ်ခုလုံး တည်ရှိလိမ့်မည်မဟုတ်ဟု သူက ပြောဆိုခဲ့ပြီး အခြေအနေကို ချက်ချင်းအလေးဂရုပြုဆောင်ရွက်ရန် နိုင်ငံခြားရေးဝန်ကြီး မာကို ရူဘီယိုကို သူက ပြောခဲ့သည်။
         
တူးမြောင်းဖြတ်သန်းခကို ကုန်သွယ်လမ်းကြောင်းအား ကြီးကြပ်သည့် ကိုယ်ပိုင်အုပ်ချုပ်ခွင့်ရအဖွဲ့အစည်းဖြစ်သော ပနားမားတူးမြောင်းအာဏာပိုင်အဖွဲ့(ACP) က ကောက်ခံခြင်းဖြစ်ကြောင်း ပနားမားသမ္မတ ဟိုဆေး ရာအူးမူလင်နိုက ထရမ့်ပ်ကို တိုက်ရိုက်မရည်ညွှန်းပဲ စနေနေ့တွင် ပြောကြားခဲ့ပြီး အပြောင်းအလဲဖြစ်သော သဘောတူညီချက်မျိုး မရှိဟု ဆိုခဲ့သည်။
           
အမေရိကန်ကာကွယ်ရေးဝန်ကြီး Pete Hegseth က ယခုလအတွင်း ပနားမားစီးတီးသို့ သွားရောက်ခဲ့စဉ် အမေရိကသည် ၎င်း၏ စစ်သင်္ဘောများ ကို တူးမြောင်းကို အခမဲ့ဖြတ်သန်းနိုင်ရေး သဘောတူညီချက်ရရန် ကြိုးပမ်းနေသည်ဟု ပြောဆိုခဲ့သည်။ ထို့အပြင် ၎င်း၏ မဟာဗျူဟာမြောက်အရေးပါသော တူးမြောင်းကို လုံခြုံအောင်ဆောင်ရွက်ရန် အမေရိကန်တပ်များ ပနားမားသို့ ပြန်လည်ဝင်ရောက်မည့် အကြံအစည်ကိုလည်း ထုတ်ဖော်ပြောဆိုခဲ့ပြီး ယင်းအကြံအစည်ကို ပနားမားအစိုးရက အလျင်အမြန်ပယ်ချခဲ့သည်။

Ref: သည်ဂါဒီးယန်း