ရှမ်းပြည်နယ်၊တောင်ကြီးမြို့ရှိ စူဠာမုနိလောကချမ်းသာစေတီတော်နှင့်ရွှေဘုန်းပွင့်စေတီတော်မြတ်ကြီးတို့အား နစက ဥက္ကဋ္ဌမှ မေ ၂၈ ရက်ညနေပိုင်းကဖူးမြော်ကြည်ညိုစဥ် တာဝန်ရှိသူများအား မှာကြားခဲ့ခြင်းဖြစ်သည်။
နစက ဥက္ကဋ္ဌသည် စူဠာမုနိလောကချမ်းသာစေတီတော်လိုဏ်အတွင်းရှိ ဗုဒ္ဓရုပ်ပွားတော်မြတ်ကြီးနှင့်စေတီတော်လိုဏ်အတွင်း လက်ယာရစ်လှည့်လည်ဖူးမြော်ကြည်ညိုခဲ့သည်။
ထို့နောက် တာဝန်ရှိသူများအား စေတီတော်လိုဏ်အတွင်း အမိုးနှင့်နံရံတို့တွင် ရေယိုစိမ့်မှုများကြောင့်ဆေးကွာနေမှုများအား ပြန်လည်စစ်ဆေး၍ ပြုပြင်မွမ်းမံရန်၊ပုဂံအာနန္ဒာဘုရား၏ မူရင်းပုံစံအနုလက်ရာများအတိုင်း အချိုးအစားကျစွာတည်ထားကိုးကွယ်ထားသကဲ့သို့ အတွင်းလိုဏ် နံရံနှင့်အမိုးများတွင်လည်း မြန်မာမှုလက်ရာကနုတ်ပန်းများကိုရေးဆွဲရန် မှာကြားခဲ့သည်။
ထို့ပြင် ရှမ်းတိုင်းရင်းသားများနှင့်သက်ဆိုင်သည့် ဆေးရေးပန်းချီများအားရေးဆွဲနိုင်ရန် ဆရာတော်ကြီးများထံ လျှောက်ထားဆောင်ရွက်ရန်၊ ယင်းအနုသုခုမလက်ရာများသည် နောင်နှစ်ကာလကြာမြင့်လာချိန်၌ ရှေးဟောင်းလက်ရာများ ဖြစ်လာမည်ဖြစ်၍ ရေရှည်တည်တံ့မှုရှိအောင် ဆောင်ရွက်ရန် မှာကြားခဲ့သည်။
စေတီတော်မြတ်ကြီးရေရှည်တည်တံ့ခိုင်မြဲရေးအတွက် မွမ်းမံထိန်းသိမ်းမှုများကို စနစ်တကျဆောင်ရွက်ရန်၊အနောက်ဘက်မုခ်စောင်းတန်းရှိ စေတီတော်အတက်လမ်းကို စနစ်တကျပြန်လည်ဆောင်ရွက်ရန်၊စေတီတော်ကြီး အရှေ့ဘက်တွင် စိုက်ပျိုးပူဇော်ထားရှိသည့် ဗောဓိညောင်ပင်မှအမြစ်များသည် နောင်အချိန်တွင် ဘုရားရင်ပြင်တော်အား ထိခိုက်မှုများဖြစ်ပေါ်လာနိုင်၍ ကြိုတင်စဉ်းစားဆောင်ရွက်ရန်လည်း မှာကြားခဲ့သည်။
ထို့နောက် နစက ဥက္ကဋ္ဌမှ စေတီတော်မြတ်ကြီးအတွက် ဘက်စုံအလှူငွေများကိုပေးအပ်လှူဒါန်းခဲ့ပြီးနောက် ဘုရားဖူးလာသူများအား နှုတ်ဆက်ခဲ့သည်။
ထို့အတူ နစက ဥက္ကဋ္ဌသည် ရွှေဘုန်းပွင့်စေတီတော်မြတ်ကြီးဖူးမြော်ကြည်ညိုကာ စေတီတော်မြတ်ကြီးပေါ်ရှိ ရှုခင်းသာ view point မှတဆင့် တောင်ကြီးမြို့အားကြည့်ရှု၍ တောင်ကြီးမြို့ရှိ သဘာဝအရင်းအမြစ်များ မပျောက်ပျက်ရန်၊ရေရှည်တည်တံ့ခိုင်မြဲမှုရှိအောင် ထိန်းသိမ်းဆောင်ရွက်ရန် တာဝန်ရှိသူများအားမှာကြားကာ စေတီတော်မြတ်ကြီးအတွက် ဘက်စုံအလှူငွေများကိုပေးအပ်လှူဒါန်းခဲ့သည်။
