အောက်တိုဘာ ၁၃ ရက်နေ့တွင် ရန်ကုန်မြို့ Lotte Hotel ၌ စိန့်ပီတာစဘတ်နေ့ အခမ်းအနားကို ကျင်းပခဲ့သည်။
ရုရှားဖက်ဒရေးရှင်းနိုင်ငံ စိန့်ပီတာစဘတ်မြို့အစိုးရအဖွဲ့ဝင်၊ စိန့်ပီတာစဘတ်ပြည်ပဆက်ဆံရေး ကော်မတီဥက္ကဋ္ဌ HE Mr.Evgeny Grigoriev ဦးဆောင်သည့် ကိုယ်စားလှယ်အဖွဲ့သည် အောက်တိုဘာ ၁၃ နံနက်ပိုင်းတွင် လေကြောင်းခရီးစဉ်ဖြင့် ရန်ကုန်မြို့သို့ ရောက်ရှိခဲ့သည်။
ထို့နောက် စိန့်ပီတာစဘတ်နေ့အခမ်းအနားကို ရန်ကုန်မြို့ Lotte Hotel ၌ ကျင်းပခဲ့ပြီး စိန့်ပီတာစဘတ်မြို့၏ အထင်ကရနေရာများ၊ မြန်မာနိုင်ငံ၏ အထင်ကရနေရာများ ပါဝင်သည့် ရုပ်သံမှတ်တမ်းနှင့် စိန့်ပီတာစဘတ်မြို့တော်ဝန် H.E. Mr. Alexander Beglov ၏ နှုတ်ခွန်းဆက်ရုပ်သံ မိန့်ခွန်းကို ဖွင့်လှစ်ပြသခဲ့သည်။
ထို့နောက် မြန်မာနိုင်ငံဆိုင်ရာ ရုရှားသံရုံးမှ ရုရှား ရိုးရာ အဆိုအကများဖြင့် လည်းကောင်း၊ ဘယ်လာရုစ်နိုင်ငံမှ အနုပညာရှင်များက တေးသီချင်းများဖြင့် လည်းကောင်း၊ ရန်ကုန်နိုင်ငံခြားဘာသာတက္ကသိုလ် အဆိုအကများဖြင့် လည်းကောင်း၊ အမျိုးသားယဉ်ကျေးမှုနှင့် အနုပညာတက္ကသိုလ်မှ မြန်မာ့ ယဉ်ကျေးမှုအဆိုအကများဖြင့်လည်းကောင်း ဖျော်ဖြေတင်ဆက်ခဲ့ကြကြောင်း သိရသည်။
ထို့ပြင် တိုင်းဒေသကြီး ဝန်ကြီးချုပ်နှင့် စိန့်ပီတာစဘတ်မြို့အစိုးရအဖွဲ့ဝင်၊ ပြည်ပဆက်ဆံ ရေးကော်မတီဥက္ကဋ္ဌတို့သည် အမှတ်တရလက်ဆောင်များ အပြန်အလှန်ပေးအပ်ခဲ့ကြပြီး ပြသထားသည့် မှတ်တမ်းဓာတ်ပုံများကို လှည့်လည်ကြည့်ရှု့ခဲ့ကြကြောင်း သိရသည်။