စားသုံးဆီစျေးများမြင့်တက်လာနေမူအပေါ် သာမန်ပြည်သူများ၏ညည်းသံထွက်လာသလို အစိုးရပိုင်းကလည်း ဖိအားပေး အရေးယူမည့်အသံများထွက်လျှက်ရှိနေသည်။
ယမန်နေ့နေလည်ပိုင်းလက်ကားစျေးမှာ ပီပါအလုံး(၁၀၀) အတွက် တစ်ပိဿာ (၇၈၀၀) နှုန်းခန့်ဖြစ်ပြီး၊ ပီပါ (၁၀)လုံးအတွက် (၈၇၀၀) နှုန်းဖြင့်အရောင်းအဝယ်ပြုနေကြကြောင်းသိရသည်။
အလုံး (၁၀၀) ဝယ်စျေးထက် (၁၀) လုံးဝယ်ယူခြင်းစျေးပိုမြင့်နေခြင်းမှာ အချို့တင်သွင်းသူကုမ္မဏီများမှ အမှန်တကယ်ရောင်းချခြင်းမဟုတ်ပဲ အများဆုံး(၁၀)လုံး ခန့်သာချွေရောင်းနေသည် သဘောကြောင့်ဖြစ်ကြောင်းသုံးသပ်ကြသည်
“ဆီဈေးက အခုအစ်မတို့ဆီမှာ တစ်ပိဿာကို ၁၂၀၀၀ ဈေးရောက်နေပြီ။ စားဆီဈေးနော်။ ပဲဆီဈေးက အဲဒီထက်များတယ်။ အစ်မတို့ ဝယ်ရတဲ့ဈေးကိုက ၁၀၅၀၀ ပေါ့နော်။ နယ်မှာက အကုန်လုံးက ငါးကျပ်သား ၊ တစ်ဆယ်သား ဝယ်ကြ ရောင်းကြရတာများတယ်လေ။ ဈေးကသာ တက်နေတာ အကျိုး အမြတ်ရလားဆိုတော့ ဘာမှဟုတ်တိပတ်တိရတာမဟုတ်ပါဘူး။ တကယ်လို့ ဈေးကျအောင် လုပ်ပေးမယ်ဆိုရင်တော့ ကောင်းတာပေါ့။ ရောင်းရဝယ်ရတာ စိတ်သန့်တာပေါ့။ အခုဟာက ဘယ်တော့ ဘယ်ဈေးဖြစ်မလဲ အမြဲတမ်း နားစွင့်နေရတာ။ အကုန်ကိုတက်နေတာလေ။ ဆန်လည်းတက် ၊ ဆီလည်းတက် ၊ အကုန်တက်တယ်” ဟုဧရာဝတီတိုင်းအတွင်းမှ ဆီကုန်သည်တစ်ဦးက ပေါ်ပြူလာနယူးစ်သို့ဖြေကြားခဲ့သည်။
ယနေ့မနက်တွင် ဆီကုန်သည်နှင့်ဆီလုပ်ငန်းရှင်များအသင်းမှ ဆီတင်သွင်းသူ ကုမ္မဏီများ၊ ဘုရင်နောင်ပွဲရုံများနှင့် ညောင်ပင်လေးစျေးလက်ကားဆိုင်များအား ဘုရင့်နောင်ကုန်စည်ဒိုင်သို့ခေါ်ယူပြီး ကုမ္မဏီများမှ လက်ကားဆိုင်များသို့ စုပေါင်းရောင်ချခြင်းဖြင့် ရောင်းလိုအားမြှင့်တင်၍စျေးနှုန်းဆွဲချရန် စီမံ ဆောင်ရွက်သွားနေသည်ဟုသိရသည်။
“ကျနော်တို့ကို အမြန်ထုတ်ရောင်းခိုင်းနေတယ်၊ကျနော်တို့လို သွင်းတဲ့သူတွေကတော့ ရှင်းတယ်၊မကြာခင်ရည်ညွန်းစျေးနဲ့ အရောင်းထွက်လာကြမှာပါ။ဝယ်ပြီးပိုက်မိနေတဲ့သူတွေက ပိုက်မိတဲ့စျေးနဲ့အရင်ဖြည်ကြဦးမှာ၊ဆီးဟောင်းပိုက်မိသူတွေက ချက်ချင်းဆွဲချဖို့ ခက်နေနိုင်တယ်၊တပတ်လောက်နေရင်တော့ ကျမှာပါ။ Supply နဲ့ Demand မျှရင်တော့ ဖြစ်သင့်တဲ့စျေးဖြစ်လာမှာပါ”ဟု ဆီသွင်းသူတစ်ဦးက ပေါ်ပြူလာနယူးစ်သို့ပြောကြားခဲ့သည်။
” အေးပေါ့ ။ တစ်ခါတည်း ဟိုး လေးငါးထောင်အထိ ဆွဲချလိုက်ရင်တော့ ကုန်ပြီပေါ့။ ရင်းနှီးထားရတာလေ။ ပီပါလိုက်တွေ စျေးကြီးပေး ဝယ်ထားရတာလေ။တက်စျေးနဲ့မိထားတဲ့ ကုန်သည်တွေ ၊ ဆိုင်ကြီးသမားတွေတော့ နစ်နာမှာပေါ့။ တဖြေးဖြေးနဲ့ ကျသွားအောင်တော့ လုပ်ရမှာပါပဲ ။အခုဈေးတွေနဲ့က ဘယ်လိုမှ အဆင်မပြေဘူး။ အခြေခံပြည်သူတွေ တောသူ တောင်သားတွေအတွက်လေ”ဟု ဆိုင်သမားတစ်ဦးက ဆိုသည်။
