“မိုခါ”မုန်တိုင်းဒဏ်ကြောင့် မကွေးတိုင်း၊စလင်းမြို့နယ်တွင် မိုးသည်းထန်စွာရွာသွန်းပြီး နေအိမ်များအတွင်းသို့ရေဝင်ရောက်ခဲ့၍ ယင်း နေအိမ်များတွင်နေထိုင်သူများ၏ သန်းခေါင်စာရင်းများနှင့်မှတ်ပုံတင်များ ပျောက်ဆုံး/ပျက်စီးမှုဖြစ်ပေါ်ခဲ့သည်။
ထို့ကြောင့် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနမှ ဝန်ထမ်းများနှင့်မြို့နယ်တာဝန်ရှိသူများပူးပေါင်း၍ ပျောက်ဆုံး/ပျက်စီးသွားခဲ့သည့် သန်းခေါင်စာရင်းနှင့်မှတ်ပုံတင်များကို အခမဲ့ ပြန်လည်ပြုလုပ်ပေးခဲ့ကြသည်။
ထိုသို့ ပြုလုပ်ပေးခဲ့ရာ ဇွန် ပထမပတ်နှင့်ဒုတိယပတ်တို့၌ စလင်းမြို့နယ်ရှိ သမြင်ကင်းကျေးရွာ အုပ်စုမှ သန်းခေါင်စာရင်း ၁၆၀ ခု၊မှတ်ပုံတင် ၃၁၉ ကတ်၊မြောက်ရှားတောကျေးရွာအုပ်စု၌သန်းခေါင်စာရင်း ၁၁၃ ခု၊မှတ်ပုံတင် ၂၁၁ ကတ်၊ပန်းတော ကျေးရွာအုပ်စု၌ သန်းခေါင်စာရင်း ၉၁ ခုနှင့်မှတ်ပုံတင် ၂၃၂ ကတ်တို့ကို အသစ်ပြန်လည်ပြုလုပ်ပေးခဲ့ကြသည်။
ထို့ပြင် စလင်းမြို့နယ်အတွင်း၌ ပြုလုပ်ပေးရန်ကျန်ရှိသည့် သန်းခေါင်စာရင်းနှင့်မှတ်ပုံတင်များအား တာဝန်ရှိသူများက နေ့စဉ်အလှည့်ကျဆောင်ရွက်ပေးသွားမည်ဖြစ်ကြောင်း သိရသည်။
